आमदार बाबुश मोन्सेरात हांच्या फुडारपणा खाला भाजपा पुरस्कृत पॅनेलान वेंचणुकेच्या मळार दवरलें पावल
भांगरभूंय | प्रतिनिधी
पणजी: पणजी महानगरपालिकेचे वेंचणुके खातीर वेंचणुकेची मोहीम सुरू जाल्या. आमदार बाबुश मोन्सेरात हांच्या नेतृत्वा खाला भारतीय जनता पक्ष पुरस्कृत पॅनेलान आयज आपलें शक्तिप्रदर्शन करीत वेंचणुकेच्या मळार अधिकृतपणान पावल दवरलां. उमेदवारी अर्ज भरचे पयलीं ह्या पॅनेलाच्या सगल्या उमेदवारांनी पणजीचें ग्रामदैवत श्री महालक्ष्मी मंदिरांत वचून दर्शन घेतलें आनी उपरांत महापौर रोहित मोन्सेरात हांणी आपलो उमेदवारी अर्ज वेंचणूक निर्णय अधिकार्यां कडेन सादर केलो. ह्या वेळार कार्यकर्त्यांची व्हड गर्दी पळोवपाक मेळ्ळी.
ह्या राजकी घडामोडीं मजगतीं आदले महापौर उदय मडकयकार हांणी मिडिया कडेन संवाद सादतना, विरोधकांच्या टिकेटी विशीं आपले विचार मांडले. पत्रकारांनी तांकां वेंचणुकेंतल्या प्रतिस्पर्धी उमेदवारांचें ’हेविवेट’ आशिल्ल्याचें विचारलें तेन्ना मडकयकार हांणी सामकी खर भुमिका घेतली. तांणी म्हणलें, हे वेंचणुकेंत कोणूच हेविवेट ना. राजकारणांत फकत नांवाच्या वजनाचो फायदो जायना, जाल्यार ज्या उमेदवारान फाटलीं पांच वर्सां प्रत्यक्ष जमनीर देंवून प्रभागांतल्या लोकांचीं कामां केल्यांत आनी जो जनतेच्या सुख-दुखांत धांवून गेला, तोच अंदूं वेंचणूकेंत जिखतलो. लोकांचो विस्वास फकत कामार असता आनी आमचो तो मुखेल आदार.
वेंचणूक लागीं पावतना विरोधकांनी केल्ल्या टिकेविशीं उलयतना मडकयकार हांणी, कॅसिनोच्या मुद्यार सामकें म्हत्वाचें स्पश्टीकरण दिलें. तांणी म्हणलें, शारांत कॅसिनो बाबुश मोन्सेरात वा रोहित मोन्सेरात हांणी हाडूंक नात. कॅसिनो शांरात नाकाच म्हणून बाबुश आनी हांवें स्वता जायते फावटीं खर विरोध केला.मात, आतां ताचीं पाळां खूब खोल गेल्ल्यान आतां हें सत स्विकारचें पडटलें. मुळांत महानगरपालिकेचे अधिकार कितें आसात, हें समजून घेवपाक जाय. महापालिकेचें काम फकत वेपारी परवाने दिवपाचे आसता. कॅसिनो काडप वा दवरप हें फकत पालिकेच्या हातांत नासता. विरोधक ह्या विशयाचें राजकारण जरी केलें तरी तांचे कडेन उदरगतीच्या कामाचेर उलोवपाक कसलेच तरेचे मुद्दे नात. विरोधकांकडे सध्या सत्ताधार्यां आड कसलोच प्रभावी मुद्दो उरूंक ना, म्हणून ते जनतेची दिकाभूल करपाचो यत्न करतात. पणजेच्या स्मार्ट सिटीचीं कामां आनी हेर मुळाव्या सुविधांच्या मुद्यांवर विचारलें तेन्ना मडकयकार हांणी नमूद केलें, विकासकामां करतना कांय काळ त्रास जाता, मात निमाणो फायदो जनतेचोच आसता. आमदार बाबुश मोन्सेरात हांच्या नेतृत्वा खाला ह्या पॅनलांत पोरण्या अणभवी मुखामळां वांगडाच उमेदवारांक संद दिवन तोल सांबाळपाचो यत्न केला. येवपी विधानसभा वेंचणुकेची ही रंगीत तालीम मानिल्ल्यान बाबुश मोन्सेरात हांचे खातीर ही वेंचणूक प्रतिश्ठेची आसा, अशें मडकयकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
