भांगरभूंय | प्रतिनिधी
भांगरभूंय । प्रतिनिधी
केंपेंः केंपें मतदारसंघाचो आमदार अॅल्टन डिकॉस्ता आपणे केल्ल्या कामाचें स्रय घेवन मतदारसंघांतल्या लोकांची दिकाभूल करता असो आरोप आदलो आमदार आनी उपमुख्यमंत्री चंद्रकांत (बाबू) कऴेकार हाणे केप्यांत एक पत्रकार परिशद घेवंन केला. आपूण विरोधी पक्षाचो आमदार आशिल्ल्यान मतदारसंघा खातीर आपणे शिफारस केल्लीं कामां जायनात अशें एकेवटेन डिकॉस्ता सांगता आनी दुसरे वटेन मुख्यमंत्री डॉ प्रमोद सावंत आनी भाजपाची तुस्त करता. हातूंतल्यान तो लोकांक कसलो संदेश दिवपाक सोदता, असो प्रश्न कवळेकारान केला.
आपूण केपें मतदारसंघाचें प्रतिनिधीत्व करतना जायती कामां सरकारा कडल्यान मंजूर करून घेतिल्लीं. ह्या कामाचीं उक्तावणां करून डिकॉस्ता तीं करपाचें स्रय आपले कडेन घेता. आपणे जीं कामां मंजूर करून घेतिल्लीं आसात तांचो पुरावो आपले कडेन आसा. लोकांनी तो पळयल्यार अॅलन डिकॉस्ताची फटींगपणा उक्ताडार येतलीं अशें कवळेकारान सांगलें.
आपणे मंजूर करून घेतिल्ल्या कामाचे फकत नाल्ल फोडपाचें काम सध्या डिकॉस्ता करता. मुख्यमंत्र्यांच्या सहकार्यान केपें मतदारसंघात आपणे उदरगतीचीं बरींच कामा मंजूर करून घेतल्यांत. आमदार डिकॉस्तान लोकांची दिकाभूल करची न्हय. मुख्यमंत्र्यांक तो बापूय म्हणटा. तांच्या सहकार्यान जर मतदारसंघांची उदरगत जाता जाल्यार सध्या लोकां मदीं सध्या नाराजी कित्याक पातळ्ळ्या अशें विचारून लोकांनी डिकॉस्ताच्या बंडलांचेर विश्वास दवरचो न्हय अशें कवळेकारान मागलां. पत्रकार परिशदेक केंपें भाजपा मंडळ अध्यक्ष संजय वेळीप, दयेश नायक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
