भांगरभूंय | प्रतिनिधी
पणजी : भाजप आमदारा कडल्यान शिस्तभंगाचे प्रकार खूब खेप जायत आसतना आतां काँग्रेस आमदारा कडल्यान लेगीत शिस्तभंगाचे प्रकार जावपाक लागल्यात. आमदार अॅड. कार्लोस फेरेरा हांचे आड पक्षविरोधी कारवायेची कागाळ प्रदेश काँग्रेस अध्यक्ष अमीत पाटकार हांणी अ. भा. काँग्रेस समिती कडेन केल्या. हे कागाळेक लागून काँग्रेस पक्षात खवदळ निर्माण जाला.
पक्षाचो हो अंतर्गत विशय आसा. कागाळीचेर हांव कांयच उलय ना, अशें प्रदेश काँग्रेस अध्यक्ष अमित पाटकार हांणी सांगलें.
प्रदेश काँग्रेस अध्यक्ष अमीत पाटकार हे म्हजे आड कागाळ करीत अशें म्हाका दिसना. ही गजाल कळटकच म्हाका हासपाक आयलें. म्हाका अजून नोटीस येवंक ना. नोटीस आयले उपरांत हांव स्पश्टपणान उलोवंक शकतलो, अशें आमदार कार्लोस फेरेरा हांणी सांगलें.
कागाळीची प्रत म्हाका पावल्या. पक्षाचे प्रभारी माणिकराव ठाकरे हांचे कडेन चर्चा करून निर्णय घेतले. आमदार कार्लोस फेरेरा हांची बाजू लेगीत आयकून उपरांत निर्णय जातलो, अशें पक्षाची निरिक्षक अंजली निंबाळकार हांणी सांगलें. आमदार कार्लोस फेरेरा हांणी कांय दिसां आदीं भाजप आमदार निलेश काब्राल हांच्या जल्मदिसाचे कार्यावळीक हाजेरी लायिल्ली. विधानसभेंत आमदार विजय सरदेसाय हांचे कडेन संगनमत करून ते प्रस्न विचारतात, असो आरोप जाला. हे फाटभुंयेर तांचे आड पक्षविरोधी कारवायेची कागाळ जाल्या. तांचेर पक्ष कारवाय करतलो काय, हे विशीं उमळशीक निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
