भांगरभूंय | प्रतिनिधी
प्रदेश भाजपान केली राजिनाम्याची मागणी
भांगरभूंय । प्रतिनिधी
पणजीः फाटल्या कांय दिसां सावन गाजपी आमदाराच्या मोर्फ व्हिडियो वयल्यान गोंयांतलें राजकारण तापलां. ह्या प्रकरणा वयल्यान भाजप आक्रमक जाला. हें प्रकरण सेक्स स्कॅण्डल आसा काय कितें, असो प्रस्न भाजपाचे म्हणयारे गिरीराज पै वेर्णेंकार हांणी उपस्थीत केला. जाल्यार ह्या प्रकरणांतल्या आमदारान राजिनामो दिवचो, अशी मागणी म्हणयारे तशेंच हळदोणेंचे आदले आमदार ग्लेन टिकलो हांणी केल्या.
मोर्फ व्हिडियो तयार करून आपली बदनामी करपाची धमकी दिल्ल्याची तशेंच आपले कडल्यान पांच कोटींची खंडणी मागिल्ल्याची कागाळ उत्तर गोंयांतल्या एका आमदारान पोरूं पुलिशेंत केल्ली. हे कागाळे प्रमाण गुन्यांव फांट्यान ओडिशाच्या कुकेश रावता (25) ह्या दुबाविताक अटक केल्या.
ह्या प्रकरणाची चवकसी करतना, संबंदीत आमदारान दुबावीत कुकेस हाका 55 हजार रुपया दिल्ल्याचें मुखार आयलां. गुन्यांव फांट्यान ह्या प्रकरणांतल्या कागाळदार आमदाराचें नांव अजून जाहीर करूंक ना. पूण प्रदेश भाजप मात शेनवारा ह्या प्रकरणा वयल्यान चडूच आक्रमक जालो.
भाजप म्हणयारे गिरीराज पै वेर्णेंकार हांणी सोशल मिडिया वरवीं ‘हें सेक्सटोर्सन आसा काय पुराय सेक्स स्कॅण्डल?’ असो प्रस्न उपस्थीत केला. जाल्यार ग्लेन टिकलो हांणी पत्रकार परिशद घेवन ह्या प्रकरणांतल्या आमदारान तत्काल राजिनामो दिवचो, अशी मागणी केल्या.
राजकी मळार खवदळ
मोर्फ व्हिडियो प्रकरणांतलो दुबावीत कुकेश रावता सध्या न्यायालयीन कोठडेंत आसतनाच एका आमदाराचो हरकत घे सारको व्हिडियो सोशल मिडियाचेर व्हायरल जाल्ल्यान गोंयच्या राजकी मळार खवदळ पडला. दुबावीत पुलिसांच्या ताब्यांत आसतनाय व्हिडियो जाहीर जाल्ल्यान सगळ्याच मळा वयल्यान अजाप उक्तायतात. खूबशे तर्क वितर्क लेगीत काडटात.
कुकेशाचो जामिना खातीर अर्ज
मोर्फ व्हिडियो प्रकरणांतलो दुबावीत कुकेश रावता हाणें प्रथमश्रेणी न्यायालयांत दाखल केल्लो जामीन अर्ज शेनवारा फाटीं घेतलो. पुलीस कोठडी सोंपिल्ल्यान ताका न्यायालया मुखार उबो केलो, तेन्ना न्यायालयान ताका न्यायलयीन कोठडी फर्मायली. पूण ते उपरांत कुकेशान म्हापशेंच्या प्रथमश्रेणी न्यायालयांत जामीन अर्ज दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
