भांगरभूंय | प्रतिनिधी
पुलिसां आड हक्कभंग थाराव मांडटलों, झोन बदल रद्द जायना तो मेरेन उपोशणः बोरकार
पणजीः कलम ३९ (अ) आड पाळी-शिरोदनकारांनी सुरू केल्ल्या आंदोलनाचो दुसरो दीस वादांत सुरू जालो. नगर नियोजनाचे खात्याचे कचेरे भितर आंदोलनाक बशिल्ले थळावे आनी सांत आंद्रेचे आमदार विरेश बोरकार हांकां बळयां कचेरे भायर ओडीत व्हेले. कसलेंच लेखी आस्वासन नासतना आपल्या फोर्सान भायर काडून जखमी केला. पुलिसां आड विधासभेंत हक्क भंगचो थाराव मांडटलो तशेंच पुलिसांचेर कायदेशीर खटलो चलयतलो, अशी शिटकावणी बोरकार हांणी दिली.
शुक्रारा सकाळीं सावन सांत आंद्रेचे आमदार विरेश बोरकार हांच्या फुडारपणा खाला पाळी- शिरोदन तशेंच पुराय सांत आंद्रे मतदारसंघांतले ३९ (अ) सकयल जाल्ले प्रस्तावीत झोन बदल रद्द करपाचे मागणे सयत खात्याचे कचेरेंत आंदोलन करीत बशिल्ले. जो मेरेन अधिकृत आस्वासनांची वाट पळयत पुराय रात आंदोलकांनी खात्याचे कचेरे भितर काडली.
दुसरे दिसा आंदोलन सदचे भशेन सुरू केले उपरांत पुलिसांची फौज कचेरे भितर घुसली आनी आंदोलकांक फोर्सान भायर काडपाक सुरवात केली. हातूंत विरेश बोरकार हांची पुलिसां मदीं धक्काबुक्की जावन तांकां जमीन आनी इस्काती वेल्यान पुलिसांनी तांकां फरफटत व्हेले. पुलिसांनी आपल्याचेर फोर्साचो वापर केल्ल्यान आपले मानेक आनी तकलेक मार लागिल्ल्याची कागाळ बोरकार हांणी केली. उपरांत १०८ एम्ब्युलन्स आपोवन बोरकार आनी आंदोलकांची तपासणी जाली.
थळाव्यांनी आपलें आंदोलन कचेरे भायर चालूच दवरलें. ह्या वेळार बोरकार आनी थळाव्यांक विरोधी पक्ष फुडारी युरी आलेमाव आनी बाणावलेचे आमदार वेन्झी व्हिएगस हांचो तेंको फावो जालो.
उपरांत बोरकार हांणी हें कलम रद्द जायना तो मेरेन आमरण उपोशण करपाची घोशणा केली. आंदोलकांनी आपलो मोर्चा आतां आझाद मैदाना कडेन घुंवडायला आनी थंय सद्या बोरकार हांचें उपोशण चालू आसा. सगळ्या गोंयकारांनी ह्या आंदोलनांत वाटेकार जावन बोरकार हांकां तेंको दिवचो अशी मागणी आंदोलकांनी केल्या.
प्रकल्प फ्रीज करून उडयतले : बोरकार
मजगतीं, कायदे हे विधानसभेंत जातात,रस्त्यार देवन न्ही. हे सारकिल्ले ब्लॅकमेल दावपेचाक बळी पडचो, अशी प्रतिक्रीया नगर नियोजन मंत्री विश्वजित राणे हांणी आंदोलना विशीं दिली. राणे हांणी केल्ल्या वक्तव्याचेर खर टिका बोरकार हांणी केली. सांत आंद्रे मतदारसंघांत थळाव्यांच्या जमनींचेर जीएमसी, एफडीए, मिलिट्री कॅम्प सारकिल्ले प्रकल्प आयल्यात. मात ह्या प्रकल्पांनी नोकर्यो फकत सत्तरीकारांक दिल्यात. हांगाच्या ज्या लोकांची जमीन गेल्या तांकां मात नोकर्यो नात. देखून राणे हांणी आमका ब्लॅकमेलर म्हणून आमची धजा मारची न्हय. आमी पुराय गांव एकठांय जावन हे प्रकल्प फ्रिज करून उडयतले, अशी शिटकावणी बोरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
