भांगरभूंय | प्रतिनिधी
पणजी: आमठाणें धरणांत 1 जुलय अखेरेक 4.7 टक्के उदकाचो सांठो शिल्लक आसा. सद्या पोरणीं दारां दुरुस्त करपाचें काम तशेंच नवीं आपचलीत दारां बसोवपाचें काम सुरू आसा. हाका लागून धरणांत येवपी पावसाचें उदक तात्पुरतें थांबयलां. काम पुराय जावपा खातीर 20 ते 25 दिसांचो काळ लागतलो. अशें आसलें तरी बेर्देस, पेडणें म्हालाक उदकाचो उणाव जाणवचो ना. गरज पडल्यार साळ न्हंयेंतल्यान उदकाचें पंपींग करतले अशी म्हायती उदका स्रोत खात्याच्या अधिकाऱ्यान दिली.
मेळिल्ले म्हायती प्रमाण जानेवारी म्हयन्यांत महाराष्ट्राचे शिमेंतल्या तिळारी कानालाच्या दुरुस्ती कामांक लागून जावपी उदका पुरवण बंद केल्ली. त्या वेळार आमठाणें धरणांतल्यान पर्यायी उदका पुरवण करपाचो निर्णय घेतलो. पूण धरणाची 50 वर्सां पयलींची एक गेट जाम जाल्ल्यान ती उक्तीं जाली ना. हाका लागून बार्देस म्हालाक उदकाचो खर उणाव जाणवलो. उपरांत खात्यान नौदळाचे मजतीन ही गेट उगडली. अशी परिस्थिती परतून उप्रासची न्हय हे खातीर नवी गेट घालप आनी हेर दुरुस्ती करपाचो निर्णय घेतिल्लो. मे म्हयन्यांत उदकाची पातळी कमी जाले उपरांत काम सुरू केल्लें.
फाटल्या वर्साचे तुळेन अंदूं एक जुलय अखेरेक गोंयांतल्या स पैकीं पांच धरणांनी उदकाचो सांठो चड शिल्लक आसा. 1 जुलय 2024 दिसा साळावली धरणांत 60.6 टक्के उदका सांठो शिल्लक आशिल्लो. अंदूं एक जुलय अखेरेक ह्या धरणांत 103.9 टक्के उदका सांठो शिल्लक आशिल्लो. अंजुणें धरणांत फाटल्या वर्सा 26.8 टक्के जाल्यार ह्या वर्सा 29.7 टक्के उदका सांठो आशिल्लो.
पंचवाडे फाटल्या वर्सा 43.3 टक्के जाल्यार अंदूं 92.7 टक्के उदका सांठो आशिल्लो. फाटल्या वर्सा एक जुलय दिसा आमठाणें धरणांत 52.8 टक्के इतलो उदका सांठो आशिल्लो. तिळारी धरणांत एक जुलय 2025 अखेरेक 73.6 टक्के उदका सांठो शिल्लक आशिल्लो.
जुलयांत सरासरी परस चड पावस
हवामान खात्याच्या म्हयन्याळ्या अदमासा प्रमाण जुलय म्हयन्यांत सरासरी परस चड पावस पडपाची शक्यताय आसा. जाल्यार चडांत चड आनी उण्यांत उणें तापमान लेगीत सरासरी परस चड आसपाची शक्यताय आसा. गोंयांत 1 जून ते 1 जुलय मजगतीं सरासरी 31.92 इंच पावसाची नोंद जाल्या. फुडले स दीस गोंयांत मध्यम स्वरुपाच्या पावसाची शक्यताय आसा.
दोन वर्सांतलो एक जुलय अखेरचो उदका सांठो (टक्क्यांत)
–
धरण / 2024 /2025
–
साळावली / 60.6 /103.9
गावणें / 52.9/ 100
पंचवाडी / 43.3/ 92.7
चापोली /58/ 73.6
अंजुणें / 26.8/ 29.7
आमठाणें / 52.8/ 4.7
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
