भांगरभूंय | प्रतिनिधी
स्ट्रीट प्रोव्हिडन्स ह्या एनजीओक मंजूर जाल्लो निधी मेळूंक: संस्थेचे अध्यक्ष फर्नांडीस
पणजी : स्ट्रीट प्रोव्हिडन्स ह्या एनजीओक अर्थसंकल्पांत मंजूर जाल्लो निधी मेळूंक ना. हे विशीं मुख्यमंत्री डॉ. प्रमोद सावंत हांणी फाल्यां आमकां मेळपाक आपयलां. आमच्यो मागण्यो मान्य जाल्योनात जाल्यार संस्था वाटावपा खातीर पणजे २०० लोकांक घेवन भीक मागची पडटली, अशें संस्थेचे अध्यक्ष डोनाल्ड फर्नांडीस हांणी सांगलें. बिरेस्तारा तांणी आझाद मैदानांत आंदोलन केलें. ह्या वेळार आसरो गृहांत रावपी बायलो हजर आशिल्ल्यो.
अर्थसंकल्पांत आसरो घरां खातीर अर्थीक तरतूद केल्ली. ते प्रमाण आमचे संस्थेक निधी मेळप गरजेचें आशिल्लें. फाटलीं तीन वर्सां हो निधी मेळोवपा खातीर आमी झगडटात. सध्या सरकारा कडेन निधी उपलब्ध आसा. मात कांय सरकारी अधिकार्यांचो अहंकार आड आयिल्ल्यान हो निधी आमकां दिनात. मुख्यमंत्र्यांनी सरळ तरतूद केल्ल्यान तांचो अहंकार दुखावला जावं येता. हाका लागूनच ते आमकां सहकार्य करिनात, अशें फर्नांडीस हांणी म्हणलें
सध्या आमचे संस्थेंत सुमार १९० बायलो, ३५ केअर टेकर, ८५ कर्मचारी, दोन पुराय वेळ डॉक्टर, ३१ नर्स आसा. ह्या सगल्यांचो म्हयन्याचो खर्च खूब आसा. सध्या आमचे कडेन ३१ मे मेरेन पावतले इतले पयशे आसात. ताचे उपरांत आमकां संस्था चालोवपाची आसल्यार रस्त्यार येवन भीक मागपा बगर पर्याय ना. फांल्याचे भेटींत आमी मुख्यमंत्र्यांक आमची अर्थीक परिस्थिती समजावन सांगतले. तशेंच आमकां दिल्ल्या आदल्या आस्वासनांत म्हायती दितले. ते आमच्यो मागण्यो मान्य करतले, अशी अपेक्षा तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
