भांगरभूंय | प्रतिनिधी
भायल्या लोकांक त्यो विकच्यो न्हय; फुडारा खातीर राखून दवरच्यो
फोंडें: आमच्यो जमनी, शेतां, भाटां सांबाळून दवरपाचें काम आमीच करूंक जाय. हांगाच्यो जमनीं आमच्याच लोकांच्या हातांत उरच्यो म्हूण आमी पॉलिसी लेगीत चालीक लायल्या. जे पर्यटक म्हूण गोंय पळोवंक येतात ते गोंयच्या मोगांत पडटात. तांचे कडेन घडये चड पयसो आसुये, ते हांगासरल्या जमनींनी पयसो गुंतयतात. भायले लोक व्हड प्रमाणांत जमनीं घेवंक लागले जाल्यार आमच्या भुरग्यां खातीर जमनी उरच्यो नात, हाचो दरेक गोंयकारान विचार करचो असो सल्लो कृशी मंत्री रवी नायक हांणी दिलो.
ह्यो जमनी आमच्या पुर्वजांनी आमच्या फुडारांतले पिळगे खातीर राखून दवरल्यात, हें लेगीत जमीन विकतना लक्षांत घेवचें अशेंय तांणी म्हणलें.
आमकां पर्यटक जाय. जे वतना आमकां बरो अणभव दिवन वतले. पूण आयज जे पर्यटक गोंयांत येतात तातूंतले थोडे गोंयचे नांव पेड्डेर करतात काय कितें असो दुबाव येवंक लागला. ते येतात खंयूय रांदून खातात. अशा पर्यटकांचो गोंयच्या पर्यटन वेवसायाक कसलोच फायदो ना. उरफाटें ते त्या वाठारांत सगली कडेन घाण करून दवरतात.
दिल्लीच्या पर्यटकां विशीं उलयतना रवी नायक हांणी म्हणलें, दिल्लींत व्हड प्रमाणांत प्रदुशण आसा. थंयचें वातावरण लेगीत गरम आसता. गोंयचें वातावरण सुखद आसलें तरी हांगा प्रदुशण उणें आसा. सहाजिकूच दिल्लींतल्या लोकांक गोंय आवडूंक लागलां आनी गोंयांत जमीन घेत आसात. तुमच्यो जमनी तुमच्या फुडारा खातीर आसात. जमनीच्या माध्यमांतल्यान उद्देग वेवसाय निर्माण करात. एखादी विकिल्ली जमीन परतून मेळना हें गोंयकारांनी लक्षांत घेवचें अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
