भांगरभूंय | प्रतिनिधी
आयज आंतरराष्ट्रीय वाग दीस. ते निमतान वागाचें म्हत्व सांगपी विशेश लेख
वागाचें नांव आयकल्यार कितें मनांत येता? सुंदर, रानाचो राजा, मायावी, बळिश्ट, मांसाहारी प्राणी. पुण तुमकां खबर आसा, हें जनावर पर्यावरणा खातीर कितलें उपेगी तें? प्रत्येक प्राणी, पक्षी, नुस्तें, झाड, किडे पर्यावरणा खातीर आपली सैमिक भुमिका करता. म्हणल्यार सगलीं आपलें कर्तव्य करतात, पर्यावरणाचो तोल सांबाळपाक, दवरपाक. एकल्याचें काम दुसरो करूंक शकना.
वाग हो शिवराक जनावरां, देखीक हरणां, गवे, रानवटी दुकर, माकड खाता. ताका लागून दुयेंत, म्हाताऱ्या जनावरांचो आंकडो उणो उरता. वाग ना जाल्यार हरणां, गायो, तण, शेतकारांचे तांदुळ, भाजी ना जातली. कारण माकड सगलीं फळां खाता, रानदुकर कडण्णां, शेत ना करता. वाग झाडां आनी तणाचें प्रमाण संतुळीत करता. रानाचें पर्यावरण सांबाळटा. तण चड वा उणें जावप बेबे, शेड्डे आनी हेर जनावरांचेर अवलंबून आसना. म्हणटकच आमी वागाचें म्हत्व विसरूंक जायना.
वागाचे कातीक, हाडांक, नाखटां, दातांक आंतरराष्ट्रीय बाजारांत व्हडली मागणी आसा. म्हणून वागाचो कांस जाता. ताचे कातीचें फेरकोट, हाडांचीं वखदां करतात. हीं वखदां घेवन गुण येता काय ना, हें अजून सिद्ध जावंक ना. वागाची सैमांत कितें भुमिका हें गोंयकारांक खबर आसल्यार तांणी रानां खात्याची मजत करपाक जाता. पयलीं संवसारांत वागाच्यो आठ प्रजाती आशिल्ल्यो, आतां फक्त पांच उरल्यात. आमच्या भारतांत वागांची संख्या संवसारांत सगल्यांत चड आसा. हाचें कारण प्रोजेक्ट टायगर. रानां विभाग आनी लोकांनी एकठांय येवन विज्ञानिकांची मजत केल्या. वागांक वाटावपाचें स्रय देशांतल्या लोकांक वता, हें मान्य करचेंच पडटलें.
गोंयच्या सत्तरी तालुक्यांतल्या कांय गांवांनी वागाक देव मानतात. ताची पुजा करतात. हो वाघरो दुर्गादेवीचें वाहन आनी रानांचो रक्षक अशें लोक मानतात. कांसादोर वीख, सांपळे लावन वागांक मारतात म्हूण गांवच्या लोकांनी वागाची राखण करपाक रानां विभागाची मजत करूंक जाय. हो प्राणी आमच्या देशा खातीर खूब म्हत्वाचो. तो पर्यावरण सांबाळटा, शेतकारांचें उत्पन्न वांचयता. जतनाय घेतल्यार मनीस आनी जनावरां एकामेकां वांगडा एका जाग्यार रावपाक शकता. आमची आताची आनी फुडली पिळगी वागाची राखण करतली अशी आस्त बाळगुया.
– श्वेता रामाणी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
