आमचो वाठार नितळ आसल्यार आमची भलायकी घटमूट उरतली: देवेंद्र प्रभूदेसाय

भांगरभूंय | प्रतिनिधी

सेंट फ्रांसीस झेवियर उच्च माध्यमीक शाळे वतीन नितळसाण मोहीम

पेडणें: दरेकल्यान आपल्या भोंवतणचो वाठार  नितळ दवरपाचो यत्न करचो. आमचो वाठार नितळ आसल्यार आमची भलायकीय घटमूट उरतली. सेंट फ्रांसीस झेवियर हायस्कुलाचे शिक्षक देवेंद्र प्रभूदेसाय हांणी मोरजी दर्यादेग वाठारांतले नितळसाण मोहिमेंत उलयतना सगळ्यांनी नितळसाण मोहिमेंत वांटो घेवचो आनी आपलो कोयर योग्य सुवातेर दवरचो अशें आवाहन केलें.

ह्या वेळार शिक्षक फा. सांतो जॉन. (प्रिन्सीपल सेंट फ्रान्सीस झेवियर्स एचएसएस, शिवोले), प्रकल्प प्रभारी तामातुर्गो डिसिल्वा, प्रसाद म्हामल, ट्र. रेशल डिसोझा, देवेंद्र प्रभुदेसाय, अंसिस परेरा, पर्पेच्युअल फर्नांडीस, मोरजी सरपंच सुरेखा अमित शेटगांवकार, आदले उपसरपंच अमित शेटगांवकार, पंच फोटू शेटगांवकार, पंच विलास मोरजे, पंच मुकेश गडेकार, फादर, शिक्षक आनी विद्यार्थी व्हडा संख्येन हाजीर आशिल्ले. 

सेंट फ्रांसीस झेवियर उच्च माध्यमीक शाळा, शिवोलेच्या एनएसएस युनिटान विठ्ठलदास वाडो मोरजी दर्यादेग वाठारांत नितळसाण मोहीम सुरू केली. हातूंत वट्ट 50 विद्यार्थी शिक्षकांनी वांटो घेतिल्लो. सकाळीं 8 वरांचेर ही मोहीम सुरू जाले उपरांत सकाळच्या 11 वरांचेर सोंपली. ह्या वेळार मुखेल सोयरे म्हणून सरपंच सुरेखा शेटगांवकार, पंच वांगडी मुकेश गडेकार, पंचविलास मोरजे, पंच फटू शेटगांवकार ,अमित शेटगांवकार, शिक्षक, विद्यार्थी वांटेकार जाल्ले. 

पंच मुकेश गडेकार हांणी, सरकार कोट्यांनी रुपया खर्च करून दर्यादेग वाठारांतलो कोयर उखलपा खातीर निविदा काडतूच आसतात आनी खंयचेय एके कंपनीक कंत्राट दिता. पूण हो कंत्राट दितना, कंत्राटदार आनी संबंदीत कर्मचारी योग्य रितीन कोयर एकठांय करीना असो दावो करून ह्या मोरजी दर्यादेगेच्या वाठारांत फकत दोन कर्मचारी कोयर कसो एकठांय करपाक शकतले? हो प्रस्न उबो करून सरकारान कंत्राटदारांक कोट्यांनी रुपयांचें कंत्राट दिलां. आनीक कामगार घेवन हो कोयर उखलपाचो यत्न करचो अशें कंत्राटदारान सांगलें. दर खेपे कोयर एकठांय करपाक शिक्षक आनी विद्यार्थी दर्यादेगेवेल्या वाठारांनी येवप कितलें योग्य? असो प्रस्न मुकेश गडेकार हांणी मांडलो.