आमचो फुडार आसतलो तंत्रज्ञानाचेर आदारून

भांगरभूंय | प्रतिनिधी

मंत्री शिरोडकार : रोबोटीक्स चवथ, रोबोटीक्स नरकासूर सर्तींचीं इनामां भेटयलीं

भांगरभूंय । प्रतिनिधी

पणजी : शिक्षणांत कादेन आनी पेनाची सुवात मोबायल आनी लॅपटॉप घेवपाचे आसात. आमी आमचो फुडार तंत्रज्ञानाच्या आदाराचेर जगपाचे आसात. हे खातीर दर घरांतल्या दरेका भुरग्या कडेन तंत्रज्ञान पावोवप गरजेचें आसा, अशें मत उदकास्रोत मंत्री सुभाष शिरोडकार हांणी उक्तायलें.

पणजे मिरामार विज्ञान केंद्रांत घडोवन हाडिल्ले रोबोटीक्स चवथ आनी रोबोटीक्स नरकासूर हे सर्तींचीं इनामां भेटवण सुवाळ्या वेळार मंत्री शिरोडकार उलयताले. ह्या वेळार गोंय बॅडमिंटन संघटनेचे चेअरमन मनोज पाटील आनी हेर मानेस्त हजर आशिल्ले. सर्तींत वांटेकार जाल्ल्या जैतिवंत शाळेच्या विद्यार्थ्यांक पुरस्काराचें वांटप जालें.

हे सर्तीत अंदूं देड हजार भुरग्यांनी वांटो घेतिल्लो. फुडल्या वर्सा दिवाळीक जावपी सर्तींत 5 हजार भुरगीं वांटेकार जातलीं ही मोख आमी दवरपाक जाय, असो उलो शिरोडकार हांणी मारलो.

जेन्ना हांव विद्यार्थी आशिल्लो तेन्ना आमी पाटी आनी पेन्सील शाळेंत व्हरताले. कालांतरान हाची सुवात कादेन आनी पेनान घेतली. फुडाराक कादेन आनी पेन गायब जावन तांचे सुवातेर मोबायल आनी लॅपटॉपाचेर शिकप जातलें. देखून आमी तंत्रज्ञानाक उर्बा दिवपाचो निर्णय घेवन विज्ञान, तंत्रज्ञान, आभियांत्रिकी आनी गणीत हे दरेका घरांतल्या दरेका विद्यार्थ्या मेरेन पावोवपाक जाय, अशें शिरोडकार हांणी म्हणलें.

तंत्रज्ञानाचो आमी व्हड प्रमाणांत आस्पाव करपाक जाय. दर वर्सा 12 हजार भुरगीं शिकून तयार जातात. पूण तांचो फुडार कितें, हो एक व्हड प्रस्न उप्रासता. ह्या प्रस्नाची जाप म्हणल्यार तंत्रज्ञान विज्ञान. ज्या भुरग्या कडेन उत्कृश्टताय आसा ताकाच संवसार घेवपाक तयार आसा. देखून आमी प्रॉग्रामींग आनी वेगवेगळ्यो भाशा तयार करपाचेर भर दिवपाक जाय, अशें शिरोडकार हांणी सांगलें. पालकांनी आपल्या भुरग्यांक सर्तींत वांटेकार जावपा खातीर उरबा दिवपाक जाय. भुरगे मोबायालाचेर गेमी खेळून वेळ वगडायतात. तांकां हातूंतल्यान भायर काडपा खातीर आमी हे सारकिल्ल्यो सर्ती घडोवन हाडटात. गोंयांत 50 ए श्रेणीचें गांवांनी आनी 14 पालिकांनी आमकां बांदकाम आनी प्रॉग्रामींग विशयाचेर 10 दिसांचें प्रशिक्षण आनी कीट वांटपाचेर आमी लक्ष केंद्रीत केलां, अशी म्हायती शिरोडकार हांणी दिली.