भांगरभूंय | प्रतिनिधी
आगरवाडो चोपडेंच्या लोकांचें म्हणणें : रस्तो रुंदीकरणाक खर हरकत
भांगरभूंय । प्रतिनिधी
पेडणें : आगरवाडो चोपडें पंचायत वाठारांतलो रस्तो हो ग्रामीण रस्तो, तो एमडीआर रस्तो न्हय. ते खातीर रस्तो आनीक रूंद करपाची गरज ना, असो सूर आगरवाडो चोपडें पंचायतीन घेतिल्ले बसकेंत लोकांनी उक्तायलो. आगरवाडो चोपडें पंचायत वाठारांतलो रस्तो एमडीआर काय ग्रामीण रस्तो हें भौशीक बांदकाम खात्यान आदीं स्पश्ट करचें आनी उपरांतूच फुडली कार्यवाही करची, अशेंय मत तांणी उक्तायलें. उच्च न्यायालयाचो आदेश ह्या रस्त्या कुशीच्या बांदकामांक लागू करचो न्हय, अशेंय लोकांनी ह्या वेळार चर्चा करपा खातीर आपयिल्लें खाशेले बसकेंत सांगलें.
मंगळारा पंचायत मंडळा वांगडा पंचायत कार्यालयांत जाल्ले बसकेंत तशी मागणी लोकांनी केली. ह्या वेळार अॅड. प्रसाद शहापूरकार, प्रभारी सरपंच शिल्पा नायक, पंच संगिता नायक, भगीरथ गांवकार, अन्थोनी फर्नांडीस हाजीर आसले.
उच्च न्यायालयाच्या ह्या आदेशा प्रमाण आगरवाडो ते चोपडें मेरेन मुख्य रस्त्या कुशीक आशिल्ल्या कांय बांदकामांचेर कारवाय करतले, अशे संकेत मेळ्ळ्यात. पंचायत मंडळांनी सर्व्हे करून अश्या बांदकामांचेर निर्णय घेवचो, अशें कळयलां. गांवांतल्या लोकांनी एकवटीत हाचे आड लढो दिवपाचो निर्णय घेतला. हे संबंदांत कायदेशीर सल्लो घेवचे खातीर आनी पंचायतीची भुमिका समजावपाक लोकां वांगडा खास बसका आपयल्ली.
अॅड. शहापूरकार हांणी हे संबंदांत गोंयांतल्या मुंबय उच्च न्यायालयान काडिल्ल्या आदेसाचेर खोलायेन मार्गदर्शन केलें. ते उपरांत ह्या आदेशाक लागून उप्राशिल्ले परिस्थितीचेर खोलायेन चर्चा केली. ह्या वेळार हाजीर आशिल्ल्या लोकांनी पंचायत मंडळान हे संबंदांत खाशेली ग्रामसभा घेवंक नाशिल्ल्यान हरकत घेवन पंचायत मंडळ बेजापसालदार आशिल्ल्याचो आरोप केलो. ह्या वेळार पंचायत मंडळान लोकां वांगडा रावतले, अशी हमी दिली. आगरवाडो रस्त्या संबंदांत थळावे आमदार जीत आरोलकार हांणी केल्ल्या विधाना कडेन लोकांनी पंचायत मंडळाचें लक्ष ओडलें. तांच्या म्हणण्या प्रमाण हो रस्तो फक्त 9 मिटर रूंद जातलो, हे खातीर लोकांनी हुस्को करचो न्हय. हे खातीर बेगिनात बेगीन पंचायत मंडळान आमदार आरोलकार हांचे वांगडा बसका घेवची, तशेंच हे गजालींत आमदाराचो आदार लोकांक मेळटलो, अशी आस्त उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
