आमचे घराबे आनी जबाबदारी

भांगरभूंय | प्रतिनिधी

एका अर्दान आमचे राजकी फुडारी चोx आनी फxx म्हूण शिरापतांत जाल्यार दुसऱ्या अर्दान त्याच चोर फटींग म्हणपी फुडाऱ्यां सरशीं वचून आमचीं सगळीं कामां करून घेतात. हेच एके घडणेचेर नियाळ केल्यार राजकी फुडारी धोंगी आसाच. पूण आमी जेन्ना एकल्याक आमचें बोट दाखयतात, तेन्ना जण एकल्याचीं चार बोटां स्वताक दाखयता. हें आमी विसरूंक फावना. आमी नांवां दवरिल्ले हे राजकी फुडारी कोण? आमचेच परीं ते मनीस न्हय? आमच्याच परीं तेवूय एका घराब्यांतले पूत वा धुवो, मांय वा पाय वा शापाय वा शामांय न्हय? म्हणटकच हे मनीस आमीच आनी आमच्याच समाजांतल्या तयार केल्ले फुडारी आसात न्हय? हे आमी तयार केल्ले फुडारी जर निवडून येतकच नाडेपणा करतात जाल्यार तांचेंच न्हय पूण आमचेंच खंय पूण चुकता, तें आमी मानून घेवंक जाय.
उदारण
एक भुरगो खंय ल्हानपणार एका जंगलांत शेंणलो. त्या भुरग्याचो सांबाळ जनावरांनी केलो. आवय बापूय नासतना, भाव-भयणीं नासतना न्हय म्हूण कोणूच दुसरो मनीस नासतना, ह्या भुरग्याची वाड जनावरांच्या आदारान जाली. हो भुरगो मनीस रावतल्या समाजांत व्हड जालो ना. पूण जनावरां रावतल्या जंगलांत ताची वाड जाली. मनीस समाजांत रावन वाडपी भुरगो एका मनशा भशेन वागता. आनी जो जनावरां मदीं जंगलांत व्हड जाता. तो जनावरां परीं वागता. हो सैमांचो कायदो आसा. म्हणटकच हो भुरगो, मनीस आसुनय. जनावरां परीं वागूंक लागलो.
बीं तशें भात
हें उदारण आमकां एक देख दिता. ज्या वातावरणांत आमी व्हड जातात. त्या वातावरणाचो आमचेर प्रभाव पडटा. आनी त्याच प्रभावान आमी व्हड जातात म्हण प्रवार जाता. दुसऱ्या उतरांनी जर एक राजकी फुडारी भ्रश्टाचार करता. जाल्यार हे पाडे करणेक आमचो समाजय जबाबदार आसा. आनी अदीक करून ताचो घराबो जापसालदार आसा. त्या खातीर बऱ्या सबावाचे नागरीक तयार करपाची पयली आनी वयली जबाबदारी आमच्या घराब्याची आसा. एक फामील बऱ्या गुणांची जाली जाल्यार, ते फामिलींतले सगळे वांगडी बऱ्या गुणांचे जातले, हातूंत दुबाव ना. बीं तशें भात, ही आमच्या जाणट्यांची म्हणणीं खरेंच खूब अर्थभरींत आसा.
मुल्ल्यां
त्या खातीर आमी आमच्या राजकारण सुदारतले जाल्यार आमचे घराबे सुधारपाची मोठी गरज आसा. आमच्या भितर शिस्त, प्रामाणीकपण, पेल्यांचो मोग, पेल्यांची दया, वडिलांक रेस्पेत, खालतेंपण, वावराचो अभिमान, भावपण, एकसुरेंपण, देसभक्ती, धर्मीक शिक्षणाचें म्हत्व आदीं आमच्या भुरग्याच्या आंगांत रिगयतलीं जाल्यार तीं फकत तांकां भाशणां दिवनच रिगोवंक घडना. त्या खातीर आवय – बापयांनी आनी फामिलींतल्या वडिलांनी स्वताच्या करण्यां वरवीं, स्वताच्या सबावा वरवीं आनी स्वताच्या उदारणा वरवीं हीं मुल्ल्यां आपल्या भुरग्यांच्या काळजांनी रिगोवंक जाय.
शिक्षणूच न्हय?
आमी फकत भुरग्याच्या शिक्षणाचेर म्हत्व दिता. ताका अदीक आनी अदीक शिकोवन व्हड मनीस करूंक त्रास घेतात. दुडू मोडटात. मोलादीक वेळ वापरतात. आनी पोटतिडकेन वावुरतात. पूण वयर सांगिल्लीं मुल्ल्यां भुरग्यांच्या आंगांत रिगोवंक जांकां दुडू मोडचे पडनांत., वेळ वगडावचो पडना न्हय म्हण त्रास काडपाची गरज आसना. आमी इल्ले पर्यान प्रयत्न करीना. ही मोठी दुख्खाची खबर जावन आसा. शिक्षण मनशाक जाणवाय दिता पूण वयर उल्लेख केल्यांत तीं मुल्ल्यां मनशा भितर मनीसपण रिगता. कितलोय व्हड शिक्षणीक जाणकार परस पाश्ट म्हळ्यार फट जावंची ना.
घराबे सुदारुंया
त्या खातीर आमचे घराबे सुदारूया. आमचे वडिल शिस्त, प्रमाणीकपण, खालतेंपण, भावपण, आदीं हांचें जिवें उदारण जावप गरजेचें आसा. खेळाच्या वेळार खेळ, शिकपाच्या वेळार शिकप, देवसपणाच्या वेळार देवसपण, आदीं वडिलांनी केलें जाल्यार आपशींच ते फामिलींतलीं भुरगीं तेंच करूंक वावुरतलीं. आवय – बापायांनी आपल्या वडिलांक मान, रेस्पेत दिलो जाल्यार तांचीय भुरगीं तांकां तोच रेस्पेत आनी मान दितलीं. फामिलींत देवाचो मोग वसता जाल्यार भुरग्यांच्या काळजांनी एकवठाचो मोग वसतलो. देस भक्तिचीं, एकसारकेंपणांचीं , एकवठाची आदीं भावनां घराब्यांत पसरता. जाल्यार भुरग्यांच्याय काळजांनी तींच भावनां फळटलीं, आदीं, आदीं. थोडक्यांत फामिलींतले भुरगे जबाबदारेन आनी प्रमाणीकपणान कर्तंव्या पाळपी जाले जाल्यार, हेच भुरगे जेन्ना समाजीक वा राजकी फुडारी जातले, तेन्ना तेच जबाबदारेन आनी त्याच प्रमाणीकपणान आपलें कार्य सारकें करतले.
सोंपयतना…
म्हणटकच आमचें राजकारण फळादीक जातलें जाल्यार प्रत्येक घराब्याचेर आदारीत आसा. जशे परीं भुरगे शिक्षण दिवंकआमी घाम वारेयतात. तेच परीं भुरग्यां भितर मुल्ल्यां फुलोवंक वावर करूंया. बरीं मुल्ल्यां आपणावन वयर सरिल्लो भुरगो एक समाजीक वा राजकी फुडारी जालो जाल्यार तो केन्नाच फटींगपण, धोंगीपण, भ्रश्टाचार आदीं करचोना. पूण सुवार्थाक लागून कुशीक दवरून समाजाच्या बऱ्या खातीर वावुरतलो. म्हणचें हें राजकारण जावंक आमच्या घराब्यांचेरुच आधारीत आसा.
लिप्यांतरः विशाल सिनाय खांडेपारकार, 8080622370

तोमाझीन कार्दोज
9822170102