भांगरभूंय | प्रतिनिधी
माथाळो थोडो वेगळो दिसता खरो; पूण गोश्ट सारकी खरी. आमगेल्या देशाची पयली डिटेक्टीव्ह बायल मनीस अशी वळख आशिल्या भोमानेस्त रजनी पंडित हिचे विशीं म्हाका ह्या लेखांत तुमका सांगपाचें आसा.
घडिल्ल्या गुन्यावाचो सोद घेवप हे काम तशें पळयल्यार जितलें कश्टाचें तितलेंच जिवित संकश्टांत घालून करपाचें काम. एक बायल मनीस ह्या कार्यक्षेत्रांत आसप हीच व्हड अजापाची गजाल. मात रजनी पंडित हांकां ह्या कामाची रुच लागली आसत, चड करून तिगेल्या बापायच्या कामा वयल्यान. तो सब इन्स्पेक्टर म्हूण महाराष्ट्र राज्य पुलिस दलात कार करपी आनी तेंय बी, गुन्यांवकारी तपास विभागांत (सीआयडी). 1962 या वर्सा शंताराम आनि प्रमिला हांगेल्या कुटुंबांत पालघर, ठाणे हांगां जल्मल्ली रजनीबाय आतां 63 वर्सांची. तिगेली गुन्यांव सोडोवपाची पयली हाताळणी ती रुपारेल कॉलेजांत शिकतना 1983 सालांतली. मागीर तिने फाटल्यान पळयलें ना. शिक्षण सोंपतकच पिरायेच्या फक्त चोवीसाव्या वर्सा तिणें आपल्या नांवान दादर, मुंबयंत डिटेक्टीव्ह एजन्सी काडून काम सुरू केलें.
फाटलीं चाळीस वर्सां तिणें हजारा वयर गुन्यावांचे सोद लायल्यात. तातूंत बायलांक फटोवपाचे, शेणिल्या लोकांक सोदपाचे, घरांघरां भितरले प्रश्न, वेंचणुका वेळार जावपी राजकी घुस्पा गोंधळ, व्हडल्या कंपनीं भितरली किजिलां, बॉलीवूडांतले नाका जाल्ले प्रश्न, ताचे भायर खून, हत्येच्यो घडणुकीय आसात. ती सल्लागार म्हूण काम करता. अशे काम करतना तिने खूबश्या रस्तो चुकिल्ल्या भुरग्यांक आनी वेसनी लोकांक जाग्यार हाडल्यात. तिची पयली मुलाखत ‘हर किसीसे कम नही’ हो माथाळो दिवन दिल्ली दूरदर्शनान घेतली आनी ते मुलखतीन तिगेलो व्यवसाय वाडपाक मदत केली.
गुन्यांव सोदतना तिका वेगवेगळ्यो भुमिका करच्यो पडल्यो; कुड्डी बायल, भीक मागपी, रस्त्यार भाजी वा हेर जिन्नस विकपी, घरकाम करपी वावराडी अशे तरांतरांचे रोल करून तिने आपले काम सादोवन घेतलां.
आता मेरेन रजनी पंडित हिका खूब मानाचे पुरस्कार मेळ्ळ्यात, तातूत चड म्हत्वाचे म्हणचे सह्याद्री दूरदर्शनचो ‘हिरकणी’ पुरकार. तिगेल्या कामाचेर ‘इन्डीयन लेडी जेम्स बॉन्ड‘ ही डाॅक्युमेंन्टरी दिनकर राव हांणी काडिल्ली. तमीळ भाशेत एक सिनेमा देखून तिगेल्या कामाचेर आधारिल्लो आसा. तिची मराठींत भाशेंतल्यान दोन पुस्तकां उजवाडाक आयल्यांत; एकाचें नांव ‘मायाजाल‘ आनी दुसरें शिल्पा सरपोतदार हांकां सोबतीक घेवन बरयिल्लें ‘चेहऱ्याआडचे चेहरे’.
अशे सदाच आयकूक येता की आमगेल्या देशांत नोकऱ्यो सहज मेळनात. पूण या लेखातली भोवमानेस्त रजनी पंडित आनी फाटल्या लेखांतली डॉ संध्या शेणॉय हांगेली तोखणाय करची तितलीच कमी. तांणी स्वताचें शिक्षण, कश्ट आनी कृतीन तांगेल्या जिविताक निश्चित अशी दिशा दिल्या. आमगेल्या देशांत वळख पाळख नाशिल्ली कितलीशींच व्यक्तित्वां आसातस जांणी तांगेल्या जिवित- इतिहासांत व्हड काम केलां, पूण तांगेली म्हायती समाजा मुखार जशी जाय तशी येवंक ना. तांका तुमचे फुडें हाडपाचो हो एक यत्न. अशेंच एक रत्न तुमचे मुखार फुडल्या लेखांत.
दीपक पाणंदीकार
9423889659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
