आमकां मॅन बुकर पुरस्कार केन्ना मेळटलो ?

भांगरभूंय | प्रतिनिधी

गोंयचें अस्मिताये खातीर झुजपी निसुवार्थी नीज गोंयकार हांवें केलें, हांवें केलें, अशें तरेचें आपलेंच टुणटुणें केन्नाच वाजोवचो ना. अशा भांगराळ्या गोंयकाराची आमी देख घेवपाक जाय.

नोव्हेंबर म्हयनो लागलो म्हणटकच साहित्य अकादेमीच्या पुरस्कारा विशींचे चर्चेक ओतो येता खरो. खूब जाण सपनां रंगोवन धोंपराक बांशींग बांदून तयार आसतात. तांकां आपल्या पुस्तकाचे पती परस आपणाले लॉबिंगींचेर चड विश्वास आसता. खंय तरी आपली बाजू मांडपी कोण तरी गॉड फादर हो जायच आसता. ना जाल्यार आपलें पुस्तक 100 नंबरी आसचें पडटा. पूण अशेंय आसा, केन्ना केन्ना कोणाचे तरी मुर्वतीक लागून, ना तर कोणाक थारावपा खातीर शंबर नंबरी पुस्तकाचेर आनी लेखकाचेरूय अन्याय जाता हें बरोबर लागना. साहित्य अकादेमीचो वावर सामको प्रामाणीक आसता हातूंत इल्लोय दुबाव ना. पूण पयल्या 10 त जीं पुस्तकां निवडटात तीं निवड समिती खूब म्हत्वाचीं आसता. धांवूय पुस्तकां हीं साहित्यीक दर्जाची निवडूंक जाय. वेंचून काडटा त्या लेखकाचें योगदान पळोवप तितलेंच महत्वाचें आसा.
खंयच्याय साहित्यिकां विशीं पुर्वग्रहदुशीत विचार मनांत हाडून ताच्या साहित्याचेर अन्याय जावंक दिवंक फावना. दुसऱ्यांक कमी लेखून कोणेंच व्हड जावपाचो यत्न करचो न्हय. एकामेका विशीं मनांत दुस्वास बाळगुवप आसना. आमच्यांत दाखयलिपय वृत्ती दिशीं माशीं वाडतच आसा हें समा न्हय. आमी जण एकल्याचे कोंकणी पासतचें योगदान पळोवंक जाय. आमकां एक वायट संवय आसा, आमी आमचेच टुणटुणें वाजयता. आमी कोंकणी चळवळींत मार खाल्ला म्हूण आयज तुमी फळां चाकतात. अशें परत परत वयर काडपाक तुमी झगडिल्ले तर? तशें जाल्यार गोंयच्या सटके झुजाऱ्यांनीय म्हणूं येता आमी पुर्तुगेजांचो मार खाल्लो म्हूण तुमी आयज मेकळो स्वास घेतात? स्वतंत्र उपभोगता. तशें आसना. त्या त्या काळार ते ते परिस्थिती बरोबर त्या त्या लोकांनी आपले कर्तव्य केलें. जशें आतां वेगळ्यावेगळ्या मळाचेर एक्टिव्हिस्ट सरकाराच्या विरोधांत उबे रावतात. हेतू इतलोच गोंयचें अस्तित्व तिगपाक जाय. गोंयची अस्मिताय जिवी उरपाक जाय. गोंयचें अस्मिताये खातीर झुजपी निसुवार्थी नीज गोंयकार हांवें केलें, हांवें केलें, अशें तरेचें आपलेच टुणटुणें केन्नाच वाजोवचो ना. अशा भांगराळ्या गोंयकारांची आमी देख घेवपाक जाय.
दुसऱ्यांक कमी लेखून कोणेंच व्हड जावपाचो यत्न करचो न्हय. आयज संवसार खंय पावला? आमी खंय आसात? आमच्या साहित्याचो जागतीक मळार कस कितें? हें आमी केन्ना येवजिता व्हय? दी पारा दी पुरस्कार, अशें साहित्याचे बाबतींत जावंक जायना. नवी दिल्लीचो कथा पुरस्कार हो साहित्य अकादेमी परस व्हडलो पुरस्कार, कारण तो भारतांतल्या साबार भासांतल्यान एकल्याकूच मेळटा. तो खरो कस. साहित्य अकादेमी पुरस्कार प्रत्येक भाशेक एक मेळटा. आमी साहित्य अकादेमीच्या पुरस्काराक झगडटात. मुळांत आमी पुरस्कारा खातीर बरयतात व्हय? ना न्हय, मागीर अंदूं हाका मेळटलो, फुडाराक ताका मेळटलो. हो उरला तो उरला. हो अजून भुरगो आसा. ह्यो वांटण्यो आमचे आमी कित्याक घालतात?
युवा साहित्य पुरस्काराचेंय तशेंच. कोण तरी एकूच पुस्तक काडटा ताका लेगीत फावो जाता हें कितले मेरेन योग्य. कमीत कमी तीन तरी पुस्तकां ताच्या नांवांर आसूंक जाय काय नाका. नातर पुस्तक दर्जेदार तरी आसूंक जाय. दोन चार भासांनी अणकारीत तरी जावंक जाय. सोमतोच युवा साहित्य अकादेमी पुरस्कार. मागीर तांची जाग आसना. लेखकाचो साहित्यीक वावर आनी भाशेक दिल्लें योगदानूय केन्ना केन्ना जमेक धरप जाता. देखून मरणा उपरांतूय साहित्य अकादेमी पुरस्कार भेटयल्यात. दर्जो नाशिल्ल्या पुस्तकाक साहित्य अकादेमीचो पुरस्कार दिवन कोंकणी भाशेची पत व्हगडावचें परस एक दोन वर्सा दिनासतना रावप चड बरें. साहित्य अकादेमी आनी युवा साहित्य पुरस्कार लेगीत.
साहित्य अकादेमी, ज्ञानपीठ पुरस्कार, सरस्वती पुरस्कार, पद्मश्री, पद्मभूषण, पद्मविभूषण, भारतरत्न
आंतरराष्ट्रीय बुकर पुरस्कार, नोबॅल पुरस्कार अशे जायते पुरस्कार आसात. ते आमी आपणाल्या कर्तुत्वान मेळोवपाक जाय. तितलें आमी प्रतिभा संपन्न मनीस जावपाक जाय.
आमी लेखक म्हूण जें कितें बरयतात तें आख्ख्या संवसारांतल्या मनशाच्या काळजाक भिडपाक जाय. आसा व्हय तितलीं तांक आमच्या साहित्याक?
22 य भासांनी आमचें साहित्य अणकारीत जावन देशभर पावपाक जाय. आसा व्हय तितलो दम आमच्या साहित्यांत? दम नाशिल्लें साहित्य बरोवन कसलोच फायदो ना. तो फक्त नग जाता. हांवें इतलीं पुस्तकां बरयल्यांत हें सांगपा खातीर तीं रद्दी छापप जाता. एके एके कांदबंरीची 10-20 पानां लेगीत वाचूं नजं जाता. हाका साहित्य म्हणप? कोणा कोणाक प्रस्थावनां बरयिल्ल्यो तांचे संकलन करून आमी समिक्षा म्हूण खपयता हें कितले योग्य? कांय जेश्ठ जाणकार साहित्यीक दुसऱ्या भाशेंतलें साहित्य तशाक तशें कोंकणींत अणकार करून आपल्या नांवांर खपयता. चित्र लेगीत बदली ना. अणकार लेगीत म्हणनात. मोठ्या विद्वानान बरयला म्हणटकच कोण विचारपाकूय वचनात. कांय पुस्तकां संकलीत आसता थंय लेगीत स्वताक लेखक म्हणटां हें चूक. संकलन केल्लें पुस्तक तुजें जायना. देखीक लोकांकाणयो, म्हणी फाटली काणी, ओंपारी, धालो गितां, फुगड्यो, लग्नां गितां, रामयण, महाभरतांतल्यो काणयो हें सगले संकलन तें आमी आमच्या नांवांर खपोवप कितलें योग्य.
बुकर पुरस्कारा कडेन आमचे कोंकणी पुस्तक अणकारीत जावन पावपाक जाय. थंय पावतलो जाल्यार आमची खर साधनां जाय. आमी संकुचीत वृत्ती नानपयत करून आमी विशाल अंतस्करणाचे जावंक जाय. आमची सर्त वैश्वीक पांवड्यार आसपाक जाय. आमी दुसऱ्यांक आयकुपाक जाय. आमचे परस श्रेष्ठ साहित्या कडेन आनी तांच्या दर्जात्मक साहित्या कडेन आमी आमचे साहित्याची तुळा करून पळोवंक जाय हांव साहित्यीक म्हूण खंय आसा. हे आयचे घडयेक खूब म्हत्वाचें. आमी वैचारीक खोलाय आशिल्लें दर्जात्मक साहित्य निर्मुवपाक जाय. ते खातीर संवसारीक पांवड्या वेलें साहित्य वाचपाक जाय.
आयज मेरेन संवसारीक पांवड्या वेलें भारताक साहित्या खातीर एकूच नोबॅल पुरस्कार मेळ्ळा, आनी चौगां साहित्यिकांक बुकर पुरस्कार फावो जाला. आमी थंय केन्ना पावतले?

काशिनाथ नायक
9158345844