आमकां भाजयो सवाय जाय आनी बऱ्योय जाय

भांगरभूंय | प्रतिनिधी

“आ रे, आयज कांदे आयले नात रे?” आर्लेमच्या गोवा बागायतदारांत म्हयनाळें सामान हाडूंक गेल्ल्या वेळार एका जाण्ट्या मनशान बागायतदारांतल्या एका कर्मचाऱ्याक विचारलें. म्हजी नदर त्याच खिणाक त्या जाण्ट्या मनशाचेर आनी कांदे दवरतात ते सुवातेर गेली. थंय कांद्याचो तकटो आसलो, पूण कांदे नासले. त्या कर्मचाऱ्यान सांगलें, ”पात्रांव, कांदे आयिल्ले, सोंपले.” कांदे नात हें आयकून तो जाण्टेलो मातसो निर्शेलो.
ताची निर्शेल्ली नुरा पळोवन म्हाका त्या जाण्टेल्याची काकुळट दिसली. लागीं कोण नासो पळोवन हांवें त्या जाण्टेल्याच्या कानांत ल्हवूच सांगलें, ”हाॅर्टिकल्चर गाड्यांचेर सवाय भाजयो मेळटात. थंय तुका कांदे मेळटले.”
”तें तुवें सांगपाची गरज ना. जाणां हांव. आमच्या घरा मुखारूच हाॅर्टिकल्चराचो गाडो आसा. पूण तो गाडेवालो आपणाक जाय तशे दर लायता. म्हणून हांव थंयच्यो भाजयो घेना.” त्या जाण्टेल्यान म्हाका सडसडीत, पूण मातशें रागानशें सांगलें आनी आपणाक जाय तें हेर सामान घेवपाक तो तुरतुरीत मुखार गेलो.
ताचीं उतरां म्हज्या कानांत घुमत रावलीं. हाॅर्टिकल्चर गाडेवाले आपणाक जाय तशे दर लावंक शकतात? फलोत्पादन महामंडळाचें तांचेर नियंत्रण ना? प्रस्न वाडत वताले. तेच परिस्थितींत बागायदारांतलें सामान घेतलें आनी घरा वतना हाॅर्टिकल्चराचे जितले गाडे मेळटात तितल्याय
गाड्यां कडेन रावन दराचें निरिक्षण केलें आनी त्या जाण्टेल्याच्या म्हणण्यांत तथ्य आशिल्ल्याचें जाणवलें.
“दरफलकाचेर बरयिल्लो हो दर सरकाराचो?” अशें विचारिल्ल्या वेळार एका गाडेवाल्यान दाखयलिपय करिनासतना सरळ जाप दिली, “पात्रांव, आयज सरकाराचो म्हाल येवंक ना. हांवें बाजारांतल्यान भाजी हाडल्या. म्हाकाय कितें सुटुंक जाय न्हय?” ताणें सांगलें.
सरकाराच्या हाॅर्टिकल्चराच्या गाड्यांचेर अशें कशें जावंक शकता? दर मंगळारा आनी आयतारा हाॅर्टिकल्चराचो म्हाल येना. तशें जाल्यार हे गाडे मंगळारा आनी आयतारा कशे आनी कित्याक उक्ते आसतात? तांकां बाजारांतलो म्हाल हाडून विकपाची मेकळीक आसा? सरकारान तशी तांकां सूट दिल्या? आपणाक जाय तसो दर लावपाचो अधिकार तांकां कोणें दिला? कांय गाड्यांचेर तर दरफलकूच आसनात. कांय कडेन आसतात, पूण दर स्पश्टपणान वाचूंक मेळनात. हें अशें कित्याक घडटा? कोण कोणाक फटयता? कोण खंय चुकता?
गोंयकारांक बाजारांतल्या दरा परस सवाय आनी बऱ्यो भाजयो मेळच्यो हो उद्देश दोळ्यां मुखार दवरून हें फलोत्पादन महामंडळ स्थापन केल्लें. हो उद्देश सफळ जाला? गोंयकारांक खऱ्यांनीच ह्या गाड्यांचेर बऱ्यो आनी ताज्यो भाजयो मेळटात? मेळटात जाल्यार लोक भाजयो घेवपा खातीर कुशीच्या भाजीवाल्यां कडेन कित्याक वतात? फलोत्पादन महामंडळाचे हजारां वयर गाडे आसतना ह्या भाजीवाल्यांक भाजयो घालपाचीं दुकानां उगडपाक परवानगी कशी मेळटा? काय ते परवाने घेनासतनाच भाजयांचीं दुकानां थाट््टात? तांचे कडेन भाजयो (कांदे, बटाट, तोमातां) ताज्यो टवटवीत कश्यो मेळटात? विचार करपा सारकी गजाल.
फलोत्पादन महामंडळाचे गाडे चलोवपी कांय गाडेवाल्यांनी आपलें भाजयांचें वेगळें दुकान थाटलां अशें कानार पडलां. खरें आसत काय कितें? जर हें खरें मानलें तर फलोत्पादन महामंडळ गाड्या खातीर जो म्हाल दिता, तातूंतलो बरो म्हाल आपल्या दुकानांत दवरून, आपल्या दुकानांतलो कालचो (शेळो) म्हाल हाडून ते सरकारी गाड्यांचेर हाडून दवरचो ना कित्या वयल्यान?
गोंयकारांक सवाय भाजयां खेरीज फळांय सवाय मेळचीं ह्या उद्देशान फलोत्पादन महामंडळ ह्या गाड्यांक फळांचीय पुरवण करता. पूण कांय वेंचीक गाड्यांचेरूच फळांची विक्री कित्याक जाता? कांय गाड्यांचेर आपोलां, केळीं, काळंगां विकूंक आसतात. तांचे दर बाजारा परस चड कित्याक आसतात? तांचे दर फलोत्पादन महामंडळान थारायिल्ले आसतात जाल्यार ते दर दरफलकाचेर कित्याक लायिल्ले आसनात? आमी बाजारांतल्यान केळीं, काळंगां हाडल्यांत अशें गाडेवाले कशे म्हणूंक शकतात? सरकाराच्या गाड्यांचेर खाजगी म्हाल दवरूं येता? आपल्या मनाक मारता त्या दरान हे गाडेवाले फळां विकूंक शकतात?
गोंयच्या बेकार तरणाट्यांक रोजगार मेळचो, तांच्या हातांत दोन पयशे खुळखुळचे, तांचो संवसार थोडो भोव फुलचो तशेंच शिक्षीत बेकार गोंयकार तरणाट्यांक रोजगार मेळचो म्हणून फलोत्पादन महामंडळ सुरू केल्लें. पूण कांय गोंयकारांनी हे गाडे बिगर गोंयकारांच्या हातांत सोंपयल्यात. भाड्याक दिल्यात. अशे गाडे भाड्याक दिवंक मेळटात? अश्या गाड्यांची पळोवणी करून तांचेर कारवाय करतले अशें अध्यक्ष प्रेमेंद्र शेट हांणी हालींच जाहीर केल्लें. खऱ्यांनीच तांणी कारवाय केल्या? गोंयकार जर बिगर गोंयकारांक अशे गाडे दिवंक लागले तर शिक्षीत बेकार गोंयकार तरणाट्यांक रोजगार मेळचो म्हणून सुरू केल्ल्या फलोत्पादन महामंडळाचो उद्देश सफळ जालो अशें कशें म्हणूं येत?
गोंय फलोत्पादन महामंडळाचो आपणें ताबो घेत सावन फाटल्या णव म्हयन्यांत दर दिसा 80 टन जावपी भाजयांची पुरवण 140 टनांचेर पावल्या, आदीं दर दिसा 2.5 टन फळां विकताले. हांवें ताबो घेतले उपरांत दर दिसा 7 टनांची विक्री जाता अशें फलोत्पादन महामंडळाचे अध्यक्ष आमदार प्रेमेंद्र शेट हांणी हालींच सांगलां. खूब बरी गजाल. तांच्या यत्नाक येवकार दिवंक जाय.
1993 वर्सा स्थापन जाल्ल्या फलोत्पादन महामंडळाचो विस्तार जावंक जाय, ताची प्रगतीय जावंक जाय, गाड्यांचो आंकडो वाडूंक जाय, पूण त्याच वांगडा ह्या महामंडळाचे वतीन ज्यो भाजयो आनी फळां गोंयकारांक मेळटात त्यो बरे प्रतीचीं आसूंक जाय. गोंयकारांक फलोत्पादन महामंडळा वरवीं ताज्यो भाजयो आनी फळां मेळटलीं हाची प्रेमेंद्रबाबान खात्री करूंक जाय जाल्यारूच फलोत्पादन महामंडळान सुरू केल्ल्या गाड्यांचो उद्देश सफळ
जालो अशें म्हणूं येतलें. फलोत्पादन महामंडळाचे अध्यक्ष प्रेमेंद्र शेट हाचेर विचार करीत व्हय?

अतुल र. पंडित
9623269013