भांगरभूंय | प्रतिनिधी
वास्को: आमकां परत परत ‘घांटी’ म्हणू नाकात. एक भाव म्हणून तुमकां सांगतां, उपकार करून आमकां ‘घांटी, घांटी’ अशें म्हणूं नाकात. आमचे जिणे शैलींत आनी वेवसायांत बदल जाला. आमचे कपडे पळयात आनी तुमचे कपडे पळयात. आमची जी भारतीय संस्कृती आसा, ती आमी फुडें व्हरुया, असो उलो अखिल गोंय कन्नड महासंघाचे अध्यक्ष सिद्धण्णा मेट्टी हांणी मारलो.
एके वटेन तुमचें नांव तुमचें नांव घेवपाक आमकां लज दिसता अशें आरजीच्या मनशाक उद्देशून म्हणपी मेट्टी, दुसरे कडेन, तुमी आमकां वेंचणुकेंत मजत करात, आमी तुमकां वेंचणुकेंत वेंचून हाडटटात अशेंय म्हणटा. ह्या वेळार त्या आरजीच्या मनशाचें तांणी नांव घेवंक ना. ताची कुंडली नागरिकांनी काडल्या, अशें तांणी सांगलें.
कन्नड राज्योत्सव सुवाळ्याचे फाटभूंयेर सांकवाळे आयोजीत मेळाव्याक बसनगौडा पाटील यत्नल हाजीर आशिल्ले. हे कार्यावळी उपरांत मेट्टी हांणी गोंयांत कांय जाण आमकां घांटी, घांटी म्हणून चाळयतात म्हूण तांणी तिडक उक्तायली. मेट्टी हांणी मुरगांव मतदार संघांतल्यान विधानसभा वेंचणूक लढयिल्ली. तेन्ना तांणी प्रचारा खातीर आदले प्रधानमंत्री दैवगौडा हांकां बायणा हाडिल्ले.
सिद्धण्णा मेट्टी हांचे भाव शरण हे सांकवाळचे सरपंच आशिल्ले. मेट्टी हांचें समाजकारण, राजकारण फाटल्या कांय वर्सां सावन सुरू जालां. आतां तांणी कुठ्ठाळी मतदार संघांत स्थलांतरितांची लोकसंख्या व्हड आशिल्ल्यान थंय कानडी उमेदवारांचो विचार करचो असो उलो मारलो. आमकां घांटी म्हणप्यांनी कानडी समुदायाचे गोंयां खातीर योगदान आनी शक्तीची दखल घेवपाची गरज तांणी ह्या वेळार उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
