भांगरभूंय | प्रतिनिधी
अमीत पालेकार : मनोज परब हांकां ‘आरजी’चें पळोवपाचो सल्लो
भांगरभूंय । प्रतिनिधी
पणजी : रिव्हॉल्युशनरी गोवन्साचे (आरजीपी) अध्यक्ष मनोज परब हांणी आमकां तत्वज्ञान शिकोवचे परस स्वताच्या पक्षा कडेन लक्ष दिवचें. सत्ताधारी भाजपा आड परब केन्नाच आवाज काडिना. तांकां फकत विरोधी पक्षूच दिसता. तातूंतल्यान तांची भुमिका स्पश्ट जाता, अशी परती जाप आम आदमी पक्षाचे (आप) राज्य संयोजक अमीत पालेकार हांणी आयतारा ‘भागरभूंय’ कडेन उलयतना दिली.
दिल्लीची आदली मुख्यमंत्री तशेंच आमदार आतिषी हांणी हालींच गोंयांत येवन गोंयांतल्यो फुडल्यो वेंचणुको आप स्वबळाचेर लडटलो, अशी घोशणा केली. हाचे वयल्यान मनोज परब हांणी शेनवारा व्हिडियो जारी करून आप आमी काँग्रेसीचेर टिका केली. ह्या दोनूय पक्षांच्या प्रदेशाध्यक्षांक आपापल्या पक्षांचें कांयच देणें – घेणें ना. तांकां आमदार जावन भाजपाक तेंको दिवपाचो आसा. दोनूय प्रदेशाध्यक्ष सुवार्थी आसात, अशें परब हांणी म्हणिल्लें. मजगतीं, हाचेर उलयतना पालेकार हांणी लेगीत परब हांचेर टिका केली. मनोज परब हांकां फाटले कितलेशेच म्हयने गोंयकारांचे प्रस्न, समस्या दिसूंक नात. ते कुंभकर्णाची न्हीद घेताले. सरकारकाचे चुकीचे निर्णय, ध्येयधोरणा हे विशीं आवाज काडून लोकांक न्याय मेळोवन दिवपाचें सोडून परब परतून परतून फकत विरोधी पक्षांचेर आरोप करतात. हाचे वयल्यान तांची भुमिका कितें आसा, ती लोकांच्या लक्षांत आयल्या, अशें पालेकार हांणी सांगलें.
विरोधी पक्ष लोकांच्या प्रस्नांचेर एकवटान लडटले
काँग्रेस, आप, गोवा फॉरवर्ड आनी हेर विरोधी पक्ष लोकांच्या प्रस्नां संबंदांत एकवटान लडटले. वेंचणुको हो वेगळो विशय आसा. फुडल्या वेंचणुकांनी युती करपाची काय ना, ताचो निर्णय दोनूय पक्षांचे केंद्रीय फुडारी थारायतले. सध्याचे स्थितींत दोनूय पक्षांनी चाळिसूय मतदारसंघांत पक्षाक घटमूट करपाचो निर्णय घेतला. फुडारांत युतीन वचपाचें थारलें जाल्यार लोकसभे वरीच ताचो फायदो येता त्या वेंचणुकांनी दोनूय पक्षांक जातलो, अशें अमीत पालेकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
