भांगरभूंय | प्रतिनिधी
आपल्या भुरग्या बराबर जितलो वेळ मेळटा, तितलो वेळ सारप खूब म्हत्वाचें. हो मेळटा तो वेळ कसोय सारलो म्हूण जायना, पूण तो वेळ भुरग्याचें बरेंपण करपा पसत आनी ….
म्हजें गोंय-म्हजे विचार पुस्तक अमर प्रकाशनान 2017 वर्सा उजवाडायले. पुस्तकाचें खाशेलपण म्हणल्यार सगळे लेख गोंयच्या प्रस्नांचेर आदारीत आसात. गोंयकारांक खूब प्रस्न सतायता. दिसान-दीस ते वाडत आसात. आयज गोंय बदल्लां. आयचे घराबे आदल्या काळा भशेन नात. देखून तोमाझीन बाबाच्या ह्या निबंदांत घटसाण आनी बळ मेळटा. ‘ भलायकी जिविताची व्हड गिरेस्तकाय ’ ह्या लेखांत: दुडवांनी आमी सगळें विकतें घेयत, पूण भलायकी मात विकती घेवंक मेळची ना. ‘ जिवितांत धर्मीक मुल्ल्यांची गरज’ ह्या लेखांत ते बरयतात- थोडो पूण लोक प्रमाणीकपणान धर्मीक शिकवणे प्रमाण वागता म्हणटकच आयज आमच्या समाजांतलें सत, इल्ली नीत. इल्ली शांती आनी इल्लें मनीसपण आसा. तेच परी ‘ आमचीं आवय बापूय आनी भुरगीं ’ ह्या लेखांत ते विचार मांडटा तो असो- ब-यातलो बरो उपाय म्हणल्यार वेळ. आपल्या भुरग्या बराबर जितलो वेळ मेळटा, तितलो वेळ सारप खूब म्हत्वाचें. हो मेळटा तो वेळ कसोय सारलो म्हूण जायना, पूण तो वेळ भुरग्याचें बरेंपण करपा पसत आनी भुरगीं आनी आमचो बापायचो संबंध अखंड दवरपाक पसत वापरप खूब म्हत्वाचें आसा.
‘ खरो मोग खोटो मोग ’ ह्या लेखांत बरयतात- मोगान जें घडपाक जाता , तें आनीक कित्यान घडपाक शकना अशे हे लेख स्पश्टीकरणा सयत जापो दितात. निमाणें राजकारण ह्या विभागांत साद्या आम आदमीचे विचार मांडपाचो बरोवप्यान सुरबूस यत्न केला. ‘ लोकसभा, विधानसभा आनी अपराधी ’ ह्या लेखांत बरोवपी सांगता- जे धर्मीक फुडारी दुस-या धर्मांचेर वीख ओंकतात आनी प्रजेक रगत वारोवंक उसकायतात. ते फुडारी धर्मीक फुडारी जावंकूच शकनात.
‘ लोकशाय आनी आम आदमी’ लोखांत बरोवपी बरयता- गरिबांनी अशिक्षितांनी भरिल्लो आसा. ह्या लोकांच्या मतांक लागून सरकार घडटा. पूण सरकार घडयतना, ह्या लोकांक फावो तशें सरकारांत प्रतिनिधित्व मेळटा काय? असो प्रस्न बोरवपी करता. उपरांत ‘ अस्तुरी आनी राजकारण ’ह्या आपल्या लेखांत बरोवपी बरयता- दादल्या खासदारांचें वर्चस्व आशिल्ल्या पार्लामेंतांत (संसद) अस्तु-यांक 33 % आरक्षण हें बील जावप खूब कठीण आसा, कित्याक आमच्या देसांत दादल्याची मानसिकताय अजून एकुणीसाव्या शेंकड्यांत आसा. फुडारी तयार करूंया, ह्या लेखांत ते सुंदर आपलो विचार मांडटना बरयतात- समजाचें बरेंपण घडोवंक ब-या फुडा-यांचीं गरज आसा आनी बरे फुडारी घडोवंक आमचीं म्हळ्यार ब-या नागरिकांची गरज आसा. तेच परी ‘ बीं तशें भात’ लेखांत जे मेरेन आमचे म्हालगडे फुडारी भ्रश्टाचार आनी सुवार्थ सोडचे नात, तो मेरेन आमचे तरणटाचे राजकी फुडारी प्रामाणीकपणाचो मार्ग चलचे नात. अशें हें पुस्तक तरणाट्यांच्या पसत ‘Reference book’ म्हूण उपेगाचे थरता.
– विशाल सिनाय खांडेपारकार
8080622370
बाॅक्स
तरणाट्यांक उलो
पुर्तूगेज ‘सिटिजन्शिपी’ क (नागरिकत्व) लागून भारताची सिटिजन्शिप वगडावंक लेगीत कांय लोक तयार आसात. ही खरेंच दुख्खाची घडणी अशी खंत लेखक तोमाझीन कार्दोज हांणी म्हजें गोंय- म्हजे विचार (वेंचीक लेख) ह्या पुस्तकांत उक्तायल्या. तोमाझीनबाब तरणाट्यांच्या लागीं मागतां- तुमकां खरोच गोंयचो मोग आसा जाल्यार गोंयांत येयात. गोंयचे उदरगतीक हात- बोट लायात. त्या खातीर आयच्या तरणाच्या गोंयकारांक, जे युरोवपी देसांनी वचपाची दिसांची सपनां सपनेतात, तांकां लेखकाचो हो सादो प्रस्न. तुमकां गोंयचो मोग आसा? हाची जाप तरणाट्यांनी उतरांनी न्हय पूण कृतीन दिवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
