भांगरभूंय | प्रतिनिधी
देशांत सगल्यांत चड इनकम टॅक्स भरपी राज्य म्हणजे गोंय म्हणपाचें हालींच जाहीर जालां. गोंयचे पंदरा प्रतिशें लोक इनकम टॅक्स भरतात. हाचोच अर्थ गोंयचे पंच्यायशीं प्रतिशें लोकां कडेन टॅक्स भरपा सारकी जोड ना. म्हणजेच गोंयचे पंच्यायशीं प्रतिशें लोक पांच लाखां परस उणी जोड जोडटात. म्हणजेच फक्त पंदरा प्रतिशें लोकांच्या म्हालवजार गोंयच्या विकासा चीं कामां जातात अशें म्हणचें पडटलें. पूण हें कितलें खरें? आनी हें जर सारकें जालें जाल्यार आत्मनिर्भर म्हणटात तें खंय उरलें? काय जांची जोड दिश्टी पडटा, जांकां जोडिल्लें लिपोवंक मेळना तेच टॅक्स भरतात आनी बाकीचे आत्मनिर्भर भोंवतात?
गोंयचे लोकसंखेचो विचार करीत जाल्यार तांतले धा ते पंदरा प्रतिशें सरकारी बाबू. सरकारान सातवो आयोग लायत सावन ह्या सगल्यांकूच टॅक्स लागला आसूंक जाय. ते भायर जायत्या खाजगी आस्थापनांनी काम करपी लोकूय टॅक्स भरतात. भरतांत म्हणजे कंपनीच तांचो टॅक्स कापता. गोंयांत कितल्यो तरी फॅक्टर्यो चलतात. चडश्यो फायद्यांतूच आसात. ते भायर होटॅलां, दुकानां, रॅस्टोरंण्ट, टुरिस्ट सेवा कितलीं तरी आस्थापनां आसात. तरी टॅक्स पंदरा प्रतिशेंच लोक भरतात हें कशें? देशाचे तुळेंत जरी आमी पयले आसले तरी हो आंकडो मानपा सारको ना. गोंयचोच न्ही, पुराय देशांतली आंकडेवारी सारकी ना काय दिसता. जर एदेश्या गोंयांत पंदरा प्रतिशें लोक इनकम टॅक्स भरतात जाल्यार देशांतल्या हेर राज्यांनी जंय गोंया परस चड जोड आसा, गोंया परस चड पगार मेळटा त्या राज्यांनी उणे लोक टॅक्स भरतात हें कशें? गोंयचे कितलेशेच तरणाटे बंगळुरू, पुणें, हैद्राबाद राज्यांनी नोकरी करतात. हे भुरगे थंय कित्याक वतात तर त्या राज्यांनी पगार चड मेळटा. म्हणटकूच थंयच्या लोकांचें उत्पन्न चड आसतलेंच. तरी ते टॅक्स भरिनात? कशें शक्य आसा हें? आनी हें चित्र जर खरें आसत जाल्यार हाचो अर्थ नोटबंदी जावन कांयच फायदो जालो ना. अजुनूय लोक टॅक्स भरपा पासून फाटीं रावतात आनी धा ते पंदरा प्रतिशें लोकांच्याच माथ्यार सगलो भार पडटा.
एके वटेन गोंयांत चड लोक टॅक्स भरतात म्हणपाचें जाहीर जाता आनी रोखड्योच हांगा धाडी सुरू जातात. कोट्यांनी रुपया जप्त जातात म्हणजेच दुडू लिपोवन दवरपांतूय गोंय पयल्या नंबरार काय? धाडी घालचे खातीरूच बी गोंयांक पयल्या नंबरार दवरूंक नासलें मूं?
कांय जाणांनी ईलेक्टोरल बाँड्स घेवंक ना तांचेर बी ह्यो धाडी?
सद्याक दर एके गजालीचो दुबाव मारूंक लागला. ज्या कंपनींनी धंदोच केलो ना, ज्यो कंपनीं लुकसाणेंत आसात त्योच कंपनीं कोट्यांनी रुपयांचे बाँड्स घेतात आनी राजकीय पक्षांक दितात तें पळेतकूच दुबाव कित्याक येवचो ना. जोड नासतनाच हे कोट्यांनी कशे मोडटात? हांचेर इनकम टॅक्सान धाडी घालूंक नाका? हे पयशे खंयच्यान आयले तें विचारूंक नाका? आमकां सामान्य लोकांकूच सतावपाचे? जे प्रामाणीकपणान टॅक्स भरतात तांकांच नोटीस येवपाची? तुजो एक रुपया चुकता, कसो तें कळय हें आमकांच? फट सांगिना अश्योय नोटिसो येतात.
तशें पळोवंक गेल्यार आमी हो इनकम टॅक्स भरचोच कित्याक? कोणूय एकादो वर्सभर खपता. हात पांय बडोवन म्हणटा तसो तो काम करता आनी जोडटा. ह्या जोडींतल्या लावाचेर सरकाराक टॅक्स दिवपाचो. पूण लुकसाण जालें तर? तें सरकाराक लागना. सरकार म्हणटा तें मुखार व्हर. मुखार केन्ना लाव जातलो तेन्ना तांतल्यान वजा कर. म्हणजेच तुजें तूं पळोवन घे. आमी फक्त लावाचे धनी. जर म्हज्या लुकसाणींत सरकार वांटेकार जावचें ना जाल्यार म्हजो लाव तरी हांवें सरकाराक कित्याक म्हणून दिवपाचो? म्हाका जेन्ना शंबर रुपया लाव जाता सरकार तांतले तेत्तीस रुपया व्हरता. हाचोच अर्थ म्हज्या जिविताचीं तेत्तीस वर्सां सरकार खाता. हातल्यान आमकां कितें मेळटा? कांय ना. मागीर कित्याक म्हणून आमी जोडपाचें? कित्याक म्हणून हातपांय धोडावपाचे? सरकाराक दिवपाक? आनी वेवस्थीत दिलें म्हणून तरी समाधान आसा?
ह्या पंदरा प्रतिशें टॅक्स भरपी लोकांक विचारात. हांतल्या वीस प्रतिशें लोकांक तरी नोटिसो आयल्या आसतल्यो ‘इनकम मिसमेच’ म्हणून. सद्याचे परिस्थितींत कोणाकूच कांयच लिपोवंक मेळना. पेन नंबर घालून एक क्लीक मारली म्हणजे सगळी कुंडली हाताक लागता तरी इनकम टॅक्स म्हणटा इनकम सारकें ना. आनी हें सांगपाक तांकां वर्स वर्स लागता. धंदेवाल्याक सांगता हें एक वेळ समजूं येता पूण रिटायर्ड, सिनियर सिटिझन ताकाय नोटीस. आतां रिटायर्ड मनशाची जोड ती कितें तर ताणें जाणटेपणा खातीर सांठोवन दवरिल्ली पोटली. एक तर ती बँकेंत आसतली वा खंयचेय कंपनींत शेरांच्या रुपांत. आनी ताका नेमान मेळटलें तें ज्यूर वा डिव्हिडंड. आनी तोय पयलींच टॅक्स कापून येतलो.
जाणटेपणांत मनशाक चड पयशे लागता. सगल्यो व्याधी जाणट्या वयाचेरूच लागतात न्ही? पूण आमचे पयशे आमकां मोडूंक मेळनात. सरकाराक टॅक्स दिवंक जाय न्ही. वर्साक आमचे फक्त तीन लाख. बाकीच्यांचेर टॅक्स आसाच. कोणूय दुयेंत पडलो जाल्यार वर्साक फकत पन्नास हजार मोडपाचे. आयज हॉसिपटलाची फी, वखदांचें बील कितलें जाता हें वित्त मंत्र्याक कशें कळटलें. तांचे सगळें सरकारी दुडवांचेर चलता न्ही! तांका सगळें फुकट मेळचें म्हणून तर आमच्या बोल्साक कातर लायतात. एके वटेन जोडीचेर इनकम टॅक्स आनी मोडीचेर जीएसटी. हें इतलें भरुनूय आमकां कितें मेळटा तर मनस्ताप. सरकाराच्या लक्षांत येता व्हय हें?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
