भांगरभूंय | प्रतिनिधी
हालींच आमच्या प्रधानमंत्र्यान भारतीय रेल्वेच्या शेंकड्यांनी कोटींच्या कामांचें व्हर्च्युअल पद्दतीन बुन्यादी
फातर बसयले. कितल्या तरी रेल्वे स्टेशनांचो कायापालट करपाचो प्रधानमंत्र्यान संकल्प सोडला. गोंयच्या कुडचडें रेल्वे स्टेशनाचोय हातूंत आस्पाव आसा. ह्या स्टेशना खातीर एकशें सत्तावन कोटी खर्च करपाचे आसात. खऱ्यांनीच ह्या स्टेशना खातीर इतलो खर्च करप गरजेचो आसा? प्रस्न पडले बगर रावना. आमच्याच बोल्सांतल्यान गेल्ले पयशे म्हणून इल्लें दुखता.
हे कार्यावळी खातीर आमचो दक्षीण गोंयचो खासदारूय सहभागी जाल्लो. जातलोच न्ही. ताच्या कार्यकाळांतल्या निमाण्या काळांतली कार्यावळ ही. फाल्यां इल्लें स्रय घेवंक मेळूं नाका? फातरार नांव पडलें तर पडलें. पूण हे कार्यावळीक हाजीर राविल्ले कडेन खासदाराक कसलो उगडास बी जालो काय? पांच वर्सां फाटीं आपणें ह्याच कुडचडें स्टेशना भायर रेल्वे रुळांचेर बसून आंदोलन बी केल्लें ताची याद आयली काय ताका? कित्याक केल्लें तें आंदोलन? वास्कोच्यान मुंबय वचपी दोन ट्रेनी रुळांचें ब्रोड गेजींत रुपांतर करता म्हणून बंद केल्ल्यो. त्यो ब्रोड गेज जाले उपरांतूय सुरू करूंक ना म्हणून हें आंदोलन आसलें. त्या आंदोलनाच्या नेटार मतां घेवन आपूण खासदार जालों म्हणपाचो उगडास जालो काय ताका? खासदार जातकूच परतो त्या विशयाचेर उलयिल्लो काय कोणे आयकूंक ना आनी अजून तरी त्यो ट्रेनी सुरूय जावंक नात. एकदां वेंचून येवन दिल्लीक पावतकूच उगडास कसो उरतलो न्ही? पूण आतां परत्यो वेंचणुको येवच्यो जाल्यात आनी ताचीच तर ही पुर्वतयारी चल्ल्या. म्हणटकूच आतां तरी उगडास जावंक जाय न्ही?
खरें म्हणल्यार खासदाराक त्या स्टेशनाचेर पांय दिवंकूच लज दिसूंक जाय आसली. कुडचडेंच्या लोकांच्या विस्वासाक आपूण पात्र थरलों ना हाची इल्ली तरी खंत आसूंक जाय आसली. ताणें तांची माफी मागूंक जाय आसली थंयच्या लोकांची. आपूण काम करूंक उणो पडलो म्हणपाचें मानून घेवंक जाय आसलें. पूण राजकारण्यां कडल्यान असली अपेक्षा तरी कशी धरप आमी? बरें आतां जो कायापालट जावपाचो आसा ताची खऱ्यांनीच गरज आसा? ज्या स्टेशनाचेर गाडयोच नात त्या स्टेशनाचो कायापालट कित्याक? फक्त पयश्यांचो धूप करपाक? हें स्टेशन ज्या गाडयां खातीर बांदिल्लें त्यो गाडयोच आतां बंद आसात. पाटणा आनी दिल्लीक वचपी दोन गाडयो सोडल्यार हांगाच्यान आनीक पॅसेंजर गाडयो वचनात. वतात त्यो गुडस म्हणल्यार म्हाल गाडयो. सद्याक तर फक्त कोळश्या गाडयो धांवतात. ज्यो गाडयो वतात ताचे खातीर स्टेशन न्ही जाल्यार गुदांव बांदपाचे.
गोंयांत वेगळ्यावेगळ्या वाठारांनी रेल्वेच्या दुपदरीकरणाक विरोध जायत आसा. कित्याक जावचो ना? जेन्ना हांगच्यान पॅसेंजर गाडयोच धांवनात आनी वता कितें काय म्हणल्यार कोळसो व्हांवोवपी म्हाल गाडयो ज्यो पुराय वाठार काळो करून उडयता. विरोध जातलोच न्ही? खरें म्हणल्यार रेल्वे हें लोकांक काम दिवपी, जोड दिवपी एक साधन. मागीर रेल्वे स्टेशना वयलें कॅण्टीन आसूं वा ल्हान सान दुकानां आसूं, त्या वाठारांतल्या लोकांच्या हाताक काम दिवपाचें साधन. फक्त स्टेशनूच न्हय जाल्यार ट्रेनींत भोवून सामान विकप्यांकूय एक आधार. पूण ते खातीर पॅसेंजर ट्रेनी चलूंक जाय. लोकांची येरादारी जाली तरूच हें शक्य आसा. कोळशाची येरादारी केल्यार कोणाक फायदो जातलो? लोकांचो म्हाल कोण घेतलो? जंय पॅसेंजरूच ना थंय स्टेशन तरी कित्याक?
हालींच अयोध्येक वचूंक आस्था ट्रेन सुरू जाल्या. बरी गजाल. लोकांक रामाचें दर्शन घेवंक मेळटलें. पूण हे ट्रेनी परसूय गरजच्यो ट्रेनी म्हणल्यार वयर सांगल्या त्यो वास्को -मुंबय ट्रेनी ज्यो सद्याक बंद आसात. गोंय, कर्नाटक आनी महाराष्ट्र अश्या तीन राज्यांतल्यान ह्यो ट्रेनी वताल्यो. गोंयच्या खुबश्या लोकांक हाचो उपेग जातालो. गोंयचे खूबशे लोक दोतोर आनी हॉस्पिटल सोदूंक बेळगांव, घटप्रभा, मिरज ह्या वाठारांनी वतात. कांय दुयेंसांचेर ह्या वाठारांनी बरो इलाज जाता. ट्रेन सुरू जाल्ली जाल्यार खूबश्या दुयेंतींक ती बरी पडपाची. पूण हाचेर कोण लक्ष दिनात. ह्या दुयेंतीचेर ‘हे राम’ म्हणपाची पाळी. लोकप्रतिनीधी दुबळे आसले म्हणजे असलीच परिस्थिती येवपाची. आमी फक्त कायापालट करूंक दुडू मोडुंया. गरजेच्या गजालींचेर लक्ष दिवचें न्ही.
ह्या लोकप्रतिनिधींनी केन्नाय रेल्वे वता त्या वाठारांचेर नदर मारूंक जाय. हांव एक दोनूच उदाहरणां दितां, दवर्ले आनी नेसाय. दोनूय वाठारांनी रेल्वे गेट लागता. आतां हांगा ट्रेकाचें दुपदरीकरण केलां. मात्शे नदर मारून पळेयात. सकाळच्या वेळार तशेंच दनपारचें ह्या गेटींचेर रांको आसतात. केन्ना गेट उगडटली आनी आमी कामाक वा घरा पावतले. तशी ह्या गेटींचेर दिसभरूय रांक आसता. पूण सकाळीं शाळांचो वेळ आनी दनपारचो शाळा सुट्टकूच भुरग्यांचो घरा वचपाचो वेळ. ह्या वेळार गेट बंद जातकूच कितें जातलें तें पळेयात. बाबडीं उपाशीं भुरगीं दनपारच्या कडार अर्द-पाऊण वर थंय तातकळटात. कोणाचेच नदरेक येना हें? आनी दुसरे कडल्यान वचूंक दुसरी वाटूय ना. नेसाय तर ट्रेका कडलो रस्तो असो केला, दुचाकीन नमस्कार घालुंकूच जाय.
हांगच्या आमदार-खासदाराक हें कशें दिसना काय? हांगा एखादो ओव्हरब्रीज जावचो हे खातीर ते कित्याक यत्न करिनात? दवर्लेची सर्वे जावन एस्टीमेट सरकाराक धाडल्यार पंदरा वर्सां जालीं. भौशीक बांदकाम खात्यांतल्या जाणे कोणें हें काम केल्लें तो रिटायर जावन पांच वर्सां जालीं. कित्याक जायनात हीं कामां? हो कायापालट, तें सोबीतकरण हाचेर कोट्यांनी रुपया व्हगडावचे परस अश्या जाग्यांचेर ओव्हरब्रीज जाल्यार लोकांचेर व्हड उपकार जावचे नात?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
