भांगरभूंय | प्रतिनिधी
म्हज्या ‘जिणेची वाट’ पुस्तकाच्या विमोचन सुवाळ्याक हाजीर जावूंक हांवें आदिंच फुडें आमंत्रण धाडिल्लें. साबार जणांनी, “आमंत्रण पावलें. देव बरें करूं” म्हणून परतून ईमेलातल्यान कळयलें. कितलीं हाजीर आसलीं ती गजाल सोड; पूण ताणीं म्हजे सवें मोग- मोयपास दाखयलो आनी आपले प्राथमिकतायेक पयली सुवात दिली. आमच्या खंयच्याय सुवाळ्यांक/ समारंभांक आमी आमंत्रण धाडटात. कोणाकूय, म्हळ्यारूच आमच्या लागशिल्ल्यांक आमी आमंत्रण धाडुंक ना जाल्यार, आमकां कितें तरी चुकलल्या भशेन जाता आनी आमचें समाधान जायना. आमंत्रण कोणाक आनी कित्याक धाडचें, हाचेर म्हजो विचार जालो. थोडें तुमचे मेरेन पावयतां.
आमंत्रण कोणाक धाडचें? हो प्रस्न आयोजकांक सदांच आसता. कोणूच दोळे धांपून आमंत्रण धाडिना. ताचेर खूप विचार जाता. आमंत्रण धाडपा फाटलो हेतू मात वेग-वेगळो जावूं येता. थोडे फावटी आमी आमचोच फायदो पळेवन आमंत्रण धाडटात. आमचो खासगी समारंभ जाल्यार बरें आसा; पूण तो समारंभ/सुवाळो समाजाच्या बरेपणाखातीर आसल्यार मात फावो तसल्यांकूच आमंत्रण दिवूंक जाय.
आमी आदिंच फुडें आमंत्रण धाडटात. खूप बरें. आमंत्रण धाडिल्ल्यांक फावो तो वेळ मेळूंक जाय. फावो तितली तयारी करुंक ना जाल्यार आपयलीं म्हूण आयलीं, बसलीं आनी गेलीं, अशें जावंयेता. आमंत्रण दिलें म्हूण वचूंक जाय अशें ना. दर एकल्याक आमकां आमच्यो प्राथमिककतायो आसात. आपल्यो प्राथमिकतायो मनांत दवरून निर्णय घेवंक जाय. अशें जायना जाल्यार आमी घेतललो निर्णय चुकिचो जावंयेता.
आयचे परिस्थितिंत आमी आमकांच आमंत्रण दिवंची गरज उपरासल्या. आमी आमच्या सुवाळ्यांक दुसऱ्यांक आमंत्रण दितात आनी दुसऱ्यांक तयार जावूंक आदार दितात. पूण आमकां आमंत्रण दितलो कोण? आमकां म्हळ्यारूच आमच्या मनाक आमंत्रण गरजेचें. भायली सगळी तयारी जाता; पूण मन तयार ना जाल्यार आमी केल्ली तयारी येशस्वी जायना. हे परिस्थितिंत आमी मनाक बळ करतात. मन आप-खुशेन आमचे बरोबर आसना. घुस्पागोंदळ जावन आमी आमकांच दोश दितात.
आमच्या मनाक आमंत्रण कित्याक आनी केन्ना गरजेचें? आमचे जिणेंत आमी भितर सरल्यार जायतें वयर-सकल जाल्लें आमकां सहज दिसता. आमी आपणायलली वेग-वेगळी वृत्ती, आनी केन्ना-केन्नाय विचित्र वृत्ती, आमचेरूच शेक गाजयता. हें सगलें आमकां आनी आमच्या समाजाच्या बरेपणा खातीर उपकारना. आमचे जिणेचें आत्मपरिक्षण करुंक आमच्या मनाक आमी आमंत्रण दिवचें पडटलें आनी तें गरजेचें.
जिणेच्या वेग-वेगळ्या बाजुंचेर नदर मारल्यार बरिशी तयारी करप शाणेपणाचें अशें दिसता. भारतांतल्या एका केंद्रांत मसलतदाराचें ( Counselling) प्रशिक्षण घेताना सत्रां चलोवप्यांनी, ‘राग कसो हाताळचो’ हे विशीं दूसऱ्या दिसा सत्र आसतलें म्हूण जाहीर केलें. तेग तरणाट्यांनी तें आमंत्रण मानून घेवंक ना, म्हळ्यारूच आपली खुशी दाखयली ना. परतेंच जाल्यार मनाक हट्ट धरुंक आदार दिलो. त्या दिसाक दोग जणांक ताप आयलो जाल्यार तिसऱ्याक तकली फडाफड. खरें म्हळ्यार तांकां तांच्या आवय-बापायांनी बळ करून त्या केंद्रांत धाडिल्ले. तांचें मन मात तयार जावंक ना.
आमी आमकांच आमंत्रण दिलें जाल्यार आमचें मन तयार जाता. हें आमंत्रण दिवूंक आनी घेवूंक कोणेंच बळ करुंक जायना. बळ करून आमंत्रण दिलें जाल्यार ताचो परिणाम उरफाटो जाता. आमंत्रण आमकांच आमचे कडल्यान घेवूंक, आमची जीण अर्थाभरीत जियेवूंक, आमकां खुशी जाय. आमचेच जिणेंत भितर सरुंक आमकां धैर्य जाय. “आमी जायतें शिकचें आसा.” ही वृत्ती आमची आसून, फुडाराचे दिशेन आमी मारिल्लीं पावलां अर्थाभरीत थारतात.
दुसऱ्यांक आमंत्रण दिवंक सोंपें. मनशाळ जीण जियेवंचे नदरेन मनाकाळजाची तयारी करून जिणेंत कितें बरें तें घेतलें जाल्यार बरें दिसपाचें आनी आमकां मनीस कशें सोबपाचें. आमकां जाय ती फकत खुशी.
जॉन एम्. आल्फोंसो, कार्मेलीत
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
