आफ्रिकेचें आनीक एक आकर्शक जैत

भांगरभूंय | प्रतिनिधी

दक्षीण आफ्रिकेन संवसारीक वन डे क्रिकेट सर्तीचे 10वे मॅचींत ऑस्ट्रेलिया पंगडाक 134 धांवड्यांनी हारयलो. मॅच हांगाच्या भारत रत्न श्री अटल बिहारी वाजपय स्टेडियमाचेर जाली.

टॉस हारल्या उपरांत पयलीं बॅटींग करपी दक्षीण आफ्रिकेन निर्धारीत ओव्हरींनी 7 विकेटी वगडावन 311 धांवड्यो केल्यो.ताका जाप दितना ऑस्ट्रेलियेक 40.5 ओव्हरींनी सगल्यो विकेटी वगडावन 177 मेरेन मजल मारप शक्य जालें.

दक्षीण आफ्रिकेन परतून एकदा तिनश्यांचो आंकडो हुपलो. क्विंटन डी कॉकान (109) सेगीत दुसरो शेंकडो मारलो. जाल्यार एडन मार्करमान (56) परतून एकदा आक्रमक खेळी केली. क्विंटन आनी बवमा हांणी पयले विकेटी खातीर 108 धांवड्यांची भागिदारी करून आपल्या पंगडाक बरें मुळावण घालून दिलें.

बवुमा (35), व्हॅन डेर ड्युसेन (26), हॅन्रिच क्लासेन (29) हांच्या योगदाना उपरांत मार्करमान अर्द शेंकडो नोंदयलो. ऑस्ट्रेलियेच्या ग्लॅन मॅक्सवॅल आनी मिचेल मार्श हांणी दरेकी दोन विकेटी घेतल्यो. मार्को यानसनान (26) अखेरचे ओव्हरींनी आक्रमक बॅटींग करून आफ्रिकेक 7 बाद 311 मेरेन पावयलो.

दक्षीण आफ्रिकेन सगल्याच विभागांनी आपलो शेक दवरलो. ऑस्ट्रेलियेच्या खेळगड्यांनी फिल्डिंगेंत साबार चुकी केल्यो. तांणी चार ते पांच कॅची सोडल्यो. जाल्यार आफ्रिकेच्या खेळगड्यांनी मेळिल्ले संदीचो फायदो घेतलो.

क्विंटन डी कॉक आनी मार्करम हांचे खेळी उपरांत आफ्रिकेच्या बॉलरांनी बरें प्रदर्शन केलें. कागिसो रबाडान ताच्या पयल्याच स्पेलांत तीन व्हड धपके दिले. मार्को यानसेन आनी लुंगी एनगिडी हे ताचे मजतीक आशिल्लेच. ह्या जैतान आफ्रिकेन गुणतकट्यांत पयले सुवातेर उडी घेतली.

मिचेल मार्श (7) आनी डॅव्हिड वॉर्नर (13) हांकां वळेरेन मार्को यानसेन आनी लुंगी एनगिडी हाणें बाद केले. रबाडान पयल्या स्पेलांत 6-1-22-3 अशें उत्कृश्ट प्रदर्शन केलें. स्टिव्ह स्मिथ (19), जॉश इंग्लीश (5) आनी मार्कस स्टॉयनीस (5) ह्यो म्हत्वाच्यो विकेटी ताणें घेतल्यो. स्मिथ आनी स्टॉयनीस हांचे खातीर आफ्रिकेन डीआरएस घेतलो आनी दोनूय खेपे येसस्वी थारले.

ग्लॅन मॅक्सवॅल (3) हाका केशव महाराजान स्वताच्या बॉलाचेर कॅच धरून तंबूंत धाडलो. मिचेल स्टार्क आनी मार्नस लाबशेन खेळपट्टीचेर आशिल्ले. पूण, ऑस्ट्रेलियेक 20 ओव्हरींनी 187 धांवड्यांची गरज आशिल्ली.

स्टार्क आनी लाबशेन हांणी सातवे विकेटी खातीर 98 बॉलांनी 69 धांवड्यांची भागिदारी केल्ली. पूण, यानसेनान 34वे ओव्हरींत ही जोडी फोडली. स्टार्क 27 धांवड्यांचेर कॅच दिवन परतलो. ते उपरांत महाराजान लाबशेनाक (46) बाद केलो. महाराजान 30 धांवड्यांनी दोन विकेटी घेतल्यो.

तब्रेझ शम्सीन ताची पयली विकेटी घेतना पॅट कमिन्साक (22) तंबूंची वाट दाखयली. ताच्या फाटोफाट जोश हेझलवुडाक (2) बाद करून शम्सीन ऑस्ट्रेलियेचो डाव गुठलायलो.