भांगरभूंय | प्रतिनिधी
संवसारीक टी-20 क्रिकेट सर्तीच्या सुपर आठ पांवड्याक आयच्यान सुरवात जाता. पयली मॅच येजमान यूएसए (अमेरिका) आनी दक्षीण आफ्रिका ह्या पंगडां मदीं हांगाच्या सर व्हिव्हीयन रिचर्ड्स मैदानाचेर जातली.
पयले खेपे संवसारीक टी-20 क्रिकेट सर्तींत खेळपी अमेरिकेच्या पंगडान अनपेक्षीत प्रदर्शन केलें. कॅनडाक 7 विकेटींनी हारयल्या उपरांत दुसरे मॅचींत बळिश्ट पाकिस्तानाक सुपर ओव्हरींत हारोवन सगल्यांक अजापाचो धपको दिलो. ते उपरांत भारता कडल्यान 7 विकेटींनी हारलो, जाल्यार आयर्लेण्डा आडची मॅच पावसाक लागून रद्द करची पडली.
दुसरे वटेन दक्षीण आफ्रिका पंगड न्युयॉर्कांतल्या आव्हानात्मक खेळपट्टीचेर तीन आनी किंग्सटावनांत एक मॅच खेळ्ळा. पूण, ताका एकूय मॅचींत 120 परस चड धांवड्यो करपाक जमूंक ना. पंगडांत क्विंटन डी कॉक, हॅन्रीक क्लासेन, ट्रिस्टन स्टब्स आनी डॅव्हिड मिलर सारके आक्रमक बॅट्समन आसा. पूण, एकल्याकूय अजून मेरेन म्हणपा सारकें प्रदर्शन करपाक जमूंक ना. आयचे मॅचींत वयले सुवाते वयल्या बॅट्समनांक बरें प्रदर्शन करपाचें चेपण आसतलें.
दक्षीण आफ्रिकेक गट पांवड्या वयले आपले निमाणे मॅचींत नेपाळा आड हारता हारता वाटाविल्ल. नेपाळाक फकत एके धांवडेन हार घेवची पडिल्ली. ताका लागून अमेरिका पंगडाक उणो लेखपाची चूक ताका म्हारग पडुये. ह्याच गटांत वॅस्ट इंडीज पंगड आसा. ताका लागून एक हार लेगीत दक्षीण आफ्रिकेचें आव्हान सोंपोवपाक शकता.
संवसारीक टी-20 सर्ती पयलीं आफ्रिके खातीर एनरीच नोर्खियाचो फॉर्म हुस्क्याचो विशय थाशिल्लो. पूण, गट पांवड्यार ताणें उत्कृश्ट प्रदर्शन करून आपूण फॉर्मांत आयिल्ल्याचे संकेत दिले. ताणें अजून मेरेन णव विकेटी घेतल्या.
अमेरिकेक आफ्रिकेच्या बॉलरां आड सादूर रावपाची गरज आसा. नोर्खिया खेरीत ओटनील बार्टमॅन, मार्को यानसेन आनी कगिसो रबाडा आसात. हे अणभव नाशिल्ली अमेरिकेची बॅटींग फळी गडगडावन उडोवपाक शकता.
अमेरिके खातीर मुखेली मोनांक पटेलाची तंदुरुस्ती हुस्क्याचो विशय आसा. भारता आडचे मॅची खातीर ताचो पंगडांत आस्पाव करूंक नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
