आफ्रिकन देश म्हणटात, गोंयचो सोरो, जिवाक बरो

भांगरभूंय | प्रतिनिधी

आफ्रिकेंतल्या धा, कॅरबियनांतल्या दोन देशांनी निर्गत

भांगरभूंय । प्रतिनिधी
पणजीः गोंयच्या सोऱ्याक सगळ्यांत चड मागणी आफ्रिकन देशांनी आसा. राज्यांतल्यान 76 टक्के सोऱ्याची निर्गत आफ्रिकन देशांत जाल्या. जाल्यार कॅरबियनांतल्या दोन देशांनीय ती जाल्या, अशी म्हायती शेतकी आनी प्रसंस्कृत उत्पन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ले आकडेवारी प्रमाण, अंदूंचे अर्थिक वर्स 2025- 26 त एप्रील ते जुलय ह्या चार म्हयन्यां मजगतीं राज्यांतल्यांन 2048 मेट्रीक टन सोऱ्याची भायल्या देशांनी निर्गत जावन सुमार तीन मिलियन युएस डॉलर म्हणल्यार 25 कोटी इतलें मोल फावो जालां.
संवसारांतल्या 13 देशांनी सोऱ्याची निर्गत जाल्या. तातूंत 10 आफ्रिकन देशाच्यो आस्पाव आसा. जाल्यार दोन कॅरिबयन देश क्युबा आनी जमैका आनी आशियांतल्या सिंगापूर देशाचो आस्पाव आसा.
13 देशां मदीं सगळ्यांत चड सोऱ्याची निर्गत जावपाचे वळेरेंत घाना देश पयलें सुवातेर आसात. घानांत 1,079 मेट्रीक टन सोऱ्याची निर्गत जावन 14.03 कोटी इतलो मोल आयलां, दुसरें सुवातेर जमैकांत 345 मेट्रीक टन सोऱ्याची निर्गत जावन 4.27 कोटी इतलो मोल आयलां, तिसरें सुवातेर कोंगोंत 256 मेट्रीक टन निर्गत जावन 2.24 कोटी इतलो मोल आयलां. जाल्यार क्युबांत 168 मेट्रीक टन सोऱ्याची निर्गत जावन 2.13 कोटी, नायजेरीयांत 40.08 मेट्रीक टन निर्गत जावन 52 लाख, तांझानियांत 4207 मेट्रीक टन निर्गत जावन 51 लाख, सिंगापुरांत 8.77 मेट्रीक टन निर्गत जावन 25 लाख, टोगो आनी बेनीन देशांत दरेकी 26 मेट्रीक टन निर्गत जावन 24 लाख, कॅप दे आयव्हरींत 15.23 मेट्रीक टन निर्गत जावन 21 लाख, अंगोलात 19.91 मेट्रीक टन निर्गत जावन 21 लाख, केनयांत 11.21 मेट्रीक टन निर्गत जावन 19 लाख आनी गबोनात 9.45 मेट्रीक टन निर्गत जावन 16 लाख इतलो मोल आयलां.
सगळ्यांत चड 737 मेट्रीक टन सोऱ्याची निर्गत जुलयांत जावन सगळ्यांत चड 11.24 कोटी इतलो मोल फावो जालां. जाल्यार एप्रिल ते जुन मजगतीं म्हयन्यांक सरासरी 400 मेट्रीक टन निर्गत जाल्या. एप्रिल म्हयन्यांत पयलीं 4 देशांनी, उपरांत मे म्हयन्यांत 7 देशांनी, जुन म्हयन्यांत 11 देशांनी आनी जुलय म्हयन्यांत 13 देशांनी निर्गत जाल्या.