भांगरभूंय | प्रतिनिधी
गीतेश नायकाचो अर्ज थारलो ग्राह्य
पणजी : प्रतिज्ञापत्रांत गुन्यांवाची म्हायती दिवंक ना म्हूण आप उमेदवार गीतेश नायक हांचे उमेदवारीक कॉंग्रेसीन घेतिल्ली हरकत वेंचणूक अधिकार्यान भायरायली. बुधवारा सुनावणी घेतले उपरांत वेंचणूक अधिकार्यान हरकत घेवपी अर्जाचेर निवाडो दिलो. हाका लागून फोंडें पोटवेंचणूक लडोवपाची गीतेश नायक हांची आडखळ पयस जाल्या.
कॉंग्रेस आमदार ऍड. कार्लुस फेरेरा हांंणी गीतेश नायक हांचेर जे आरोप केल्यात ताचेर तांंणी माफी मागची. ना जाल्यार अब्रू लुकसाणीचा खटलो घालपाची शिटकावणी आपचे संंघटक वाल्मिकी नायक हांंणी दिल्या.
फोंडें पोटवेंचणुकेंतले आप उमेदवार गितेश नायक हांणी प्रतिज्ञापत्रांत राजस्थान आनी बंगळूर हांगा आपणा आड नोंद जाल्ल्या गुन्यांवाची म्हायती नमूद करूंक ना. तशेंच रिण फारीक करूंक नाशिल्ल्या कारणान मालमत्ता जप्तीची म्हायती प्रतिज्ञापत्रांत दिवंक नाशिल्ल्याचो दावो करीत कॉंग्रेसीन आपचे गितेश नायक हांचे उमेदवारीक हरकत घेतिल्ली.
कॉंग्रेसीचे उमेदवार डॉ. केतन भाटीकार हांणी मंंगळारा वेंचणूक अधिकार्याक उमेदवारीक हरकत घेवपी अर्ज सादर केल्लो.
फोंडें पोटवेंचणुके खातीर ९ एप्रिलाक मतदान जातलें. पोटवेंचणुकेत रितेश नायक (भाजप), डॉ. केतन भाटीकार (कॉंग्रेस) आनी गीतेश नायक (आप) हे राजकी पक्षांचे उमेदवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
