भांगरभूंय | प्रतिनिधी
बिहारचो आडवाद सोडीत जाल्यार ह्या वर्सा आनीक खंयच्याच राज्यांत विधानसभा वेंचणुके खातीर राजकी पक्षांची धांवपळ चलिल्ली दिसून येना. बिहारांत वर्स सोंपता म्हणसर जावपी विधानसभा वेंचणुकेचे आघाडेर भारतीय जनता पक्ष बरोच मुखार गेला. जाल्यार काँग्रेसी सयत सगलेच विरोधी पक्ष अशा गोंदळांत सांपडल्यात की भाजपा कडेन झुजप जाल्यार कशें झुजप. बिहारांत इंडिया महागठबंधन परतून सक्रीय करपाचे दिशेन हालचाली सुरू आसल्यो तरी मुख्यमंत्रीपदा खातीर एकमत जावप बरेंच कठीण दिसता. काँग्रेस जाल्यार आतां बिहारांत चड सुवातांचेर दावो करपाचे मनस्थितींत दिसता. तेजस्वी यादवाक मुख्यमंत्रीपदा बगर आनीक कांयच दिसना. अशे परिस्थितींत बिहारांत वेंचणुकेचो निकाल कसो लागतलो हाचो अदमास आतांच बांदूंक येतलो. फुडल्या वर्सा आसाम, केरळ, तामीळनाडू, अस्तंत बंगाल ह्या चार राज्यांनी विधानसभा वेंचणुको जावपाच्यो आशिल्ल्यान ताचीय तयारी भाजप करतना दिसून येता. पूण ताचे आदीं सगल्यांचे लक्ष लागून आसा तें दिल्ली म्हापालिकेच्या म्हापौर आनी उपम्हापौरपदा खातीर ह्याच सप्तकांत जावपी तशेंच बृहन्मुंबय म्हानगरपालिके खातीर ह्याच वर्सा जावपी वेंचणुके कडेन. दिल्लींत विधानसभा वेंचणुकेंत आम आदमी पक्ष मातयेभरवण जाला जाल्यार ताचे पयली जाल्ल्या महाराष्ट्र विधानसभा वेंचणुकेंत उद्धव बाळासाहेब ठाकरे हांच्या फुडारपणा खालच्या शिवसेनेचें भेंड मोडपाचें काम भाजपप्रणीत राष्ट्रीय लोकाशाय आघाडीन केल्ल्यान आम आदमी आनी उबाठा शिवसेनेक आपआपले परीन ह्यो वेंचणुको खूब म्हत्वाच्यो थारल्यात.
राजधानी दिल्लींत खंयचेच परिस्थितींत आम आदमी पार्टीक परतून तकली वयर काडपाची संद दिवप ना हें लक्ष्य दोळ्यां मुखार दवरुनच भाजप थंय कामाक लागिल्ल्याचें स्पश्ट दिसून येता आनी देशाचे वेपारी राजधानितूय चित्र वेगळें आसा अशें म्हणूंक सुवात ना. भारतीय जनता पक्ष आनी शिवसेना हे दोगूय मेळून उबाठा शिवसेनेचें भूत पुरपा खातीर तयार जाल्यात जाल्यार विधानसभा वेंचणुकेंत गेल्ली लज म्हापालिका वेंचणुकेंत कांय प्रमाणांत परतून मेळोवपा खातीर उद्धव ठाकरे सेने कडल्यान यत्न जायत आसात. बृहन्मुंबय म्हानगरपालिके खातीर आतां केन्नाय वेंचणुको जाहीर जावंक शकतात हें गृहीत धरुनच दोनूय बाजू आपआपले पत्ते खेळत आसात. हे सर्तींत भरतीय जनता पक्षाक दिल्लींत म्हापौरपद मेळोवपाचें आसा जाल्यार मुंबयंत म्हानगरपालिकेचेरूय आपलोच बावटो हुबोवपाचो आसा. दिल्लींत जाल्यार विधानसभा वेंचणूक जिखत सावनच भारतीय जनता पक्षा आनी थंयचें सरकार अशे पद्दतीन कामाक लागलां की थंय खूबसो काळ सत्तेर आशिल्ली आम आदमी पार्टी आनी तिच्या फुडाऱ्यांक हताश जावन हें सगलें पळोवचें पडटा. दिल्ली म्हापालिकेंत आम आदमी पार्टी तीन वर्सां आदीं निर्विवादपणान सत्तेर आयिल्ल्यान ह्या वेळाय म्हापौरपद तांचेच कडेन उरतलें अशें दिसत आसलें तरी विधानसभा वेंचणुकेंन पुराय चित्रूच बदलून उडयलें. आम आदमी पक्षाच्या दिल्लींत अस्तित्वाक धोको निर्माण जावपाची शक्यताय खूबशा जाणांक दिसता.
प्रधानमंत्री नरेंद्र मोदी हांकां दिल्लींत सत्तेर येवपा खातीर नवो जल्म घेवचो पडटलो अशें सांगपी अरविंद केजरीवाल हांच्या पक्षाच्या सरकारान तेच धुंदीत जो व्हड प्रमाणांत भ्रश्टाचार केला तो आतां उक्तडार आयला आनी सर्वसामान्य लोकांकूय आम आदमीच्या नांवान दिल्लींत नेमके कितें चलिल्लें हाची कल्पना फाटल्या एक दोन म्हयन्यांत आयल्या. अशे परिस्थितींत अरविंद केजरीवाल आनी हेर फुडारी लोकां मुखार वचपा खातीरय थोडे आंखुडटात आनी ताचो राजकी फायदो भाजपान घेतलो नासत जाल्यार ती नविदाद न्हय. सद्याचे स्थितींत आम आदमी पक्षाक बरोच फटको बसूंक शकता असो राजकी निरिक्षकांचो अदमास आसून त्या पक्षाचे खूबशे फुडारी आपलो फुडार सुरक्षीत उरचो हे खातीर बाजू बदलपाचे तयारींत आशिल्ल्याचे संकेत मेळत आसात. आम आदमीचे खूबशे फुडारी अानी म्हानगरपालिकेंतले वांगडी भाजपाच्या वरिश्ठ फुडाऱ्यांच्या संपर्कांत आसून हातूंतल्या खूबशा जाणांनी भाजपांत प्रवेश करीत जाल्यार ताचें अजाप कोणाक दिसचें न्हय अशेंय सांगतात. विधानसभा वेंचणुके आदींच वट्ट राजकी वारें वळखून खूबशे वांगडी भाजपांत दाखल जाल्ले. तोच सिलसिलो मुखार चालू तर आसाच. पूण आम आदमी कडल्यान जे संघटणात्मक बदल हालींच जाहीर केले ताचोय फटको त्या पक्षाक बसतलो अशें स्पश्टपणान जाणवूंक लागलां. संघटणात्मक फेरबदला उपरांत आम आदमी पक्षांत असंतोष आनीक वाडला आनी ताचोय फटको म्हापौरपद वेंचणुकेंत तांकां बसूंक शकता.
दिल्लींत म्हापौरपदाचे वेंचणुकेंत 132 चो आंकडो गांठपा खातीर भाजपान जी गणितां मांडल्यांत तीं चुकीचीं थारचीं नात अशें सद्याचें चित्र पळयत जाल्यार दिसून येता. विधानसभा वेंचणुकेंतल्या निकालान तांकां वेगळेंच बळ दिलां. चार पांच दिसां भितर दिल्लींत आम आदमी पक्षाचेर आनीक एक संकश्ट येवपाक लागिल्लें आसतना थंय मुंबयंत उबाठाचे फुडारी आपली उरिल्ली सुरिल्ली लज म्हानगरपालिका वेंचणुकेंत वच्ची न्हय हे खातीर जिवाच्या आकांतान धांवपळ करीत आसात. हातूंतल्यानच उद्धव ठाकरे आनी महाराष्ट्र नवनिर्माण सेनेचे राज ठाकरे हे एकठांय येवंक शकतात आनी ताचो फायदो तांकां म्हानगरपालिका वेंचणुकेंत मेळूंक शकता असो एक बेठोच बोवाळ सुरू केला. आतां हातूंत कितले मेरेन तथ्य आसा हें रोखडेंच दिसून येतलें हातूंत दुबाव ना. मुंबय म्हानगरपालिकेचेर भाजपाक हे फावटी आपलो बावटो हुबोवपाचो आसा आनी तांकां ह्या वेळार ताचे पसून आडावप फक्त अशक्य दिसत आसतनाच उद्धव आनी राज ठाकरे एकठांय येत आशिल्ल्याचें एक पील वेवस्थीतपणान सोडलां. महाराष्ट्रा खातीर ताळी दिवपाची तयारी दाखयत आशिल्ल्याचें वयले वयर दिसत आसलें तरी हे दोगूय भाव एकठांय जावप तितलें सोंपें नाशिल्ल्याचेंय तांकां लागींच्यान वळखुप्यांचें मत आसा. बृहन्मुंबय म्हानगरपालिका वेंचणूक ह्या वर्सा जातली हातूंत दुबाव नासलो तरी उबाठा शिवसेना खंयचेच परिस्थितींत वरचड थारची ना हे खातीर तांचे यत्न आसतले. दिल्लींत आम आदमी पार्टी जाल्यार मुंबयंत उबाठा शिवसेने खातीर फुडारांतलो काळ खूबसो दगदगीचो आसतलो अशें ताका लागूनच म्हणचें पडटा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
