भांगरभूंय | प्रतिनिधी
दिसाक एक आपोल खायात आनी दोतोरा कडेन वचूं नाकात, अशें म्हणटात तें तुमी आयकलां आसतलें. हें बऱ्या प्रमाणांत खरें आसा. कारण आपोलांत पोशक तत्वां खूब आसतात आनी तुमचे भलायकेक जायते फायदे मेळटात. आपोल हो व्हिटॅमिन सी चो एक उत्कृश्ट स्रोत. हाचे भायर आपोलांत बी- कॉम्प्लेक्स आनी ई आनी के जीवनसत्वां लेगीत आसतात. हाचे भायर आपोलांत फायबर, पोटॅशियम, मॅग्नेशियम, बीटा कॅरोटीन सारकिले पोशक तत्व खूब प्रमाणांत आसतात, जे बरी भलायकी सांबाळपाक आदार करतात.
तुमच्या दिसपट्ट्या वेव्हारांत आपोल आस्पावपाक जाय जाल्यार तें खावपाचो सगळ्यांत बरो वेळ म्हणल्यार नाश्त्या उपरांत एक वर वा दीसभर. खरें म्हणल्यार रिकाम्या पोटार आपोल खाल्यार लोकांक तें पचपाक कठीण जाता. आतां दर दिसा आपोल खाल्यार कितें फायदे आसात तें पळोवया.
काळजाची भलायकी बरी उरता
दर दिसा एक आपोल खाल्यार काळीज निरोगी उरता. खरें म्हणल्यार तातूंत पोटॅशियम आसता, जें रगतदाब नियंत्रीत करपाक आदार करता. तशेंच ते खाल्यार वायट कोलेस्टेरॉल उणें करपाक आदार करता. आपोलांत जायते बळिश्ट अँटीऑक्सिडेंट आसतात, जे मुक्त कण आडावपाक मदत करतात.
पचन बरें जाता
कोठ्याची पिडा जाल्ल्या लोकांक दर दिसा एक आपोल खाल्यार पचन तंत्र सुदारपाक मदत जाता. तातूंत तंतू आसता जें पचनक्रिया सुदारपाक आदार करतात.
आपोल ऊर्जा दिता
जायत्या पोशक तत्वां वांगडाच आपोलांत फ्रुक्टोजय आसता, जें उर्जा दिवपाक मदत करता, देखून तुमी तें ऑफिसांतलो नाश्तो म्हणून वा नाश्त्या उपरांत घेवंक शकतात. आपोल सदांच ताजीं घेवन खावपाक जाय हें लक्षांत दवरचें.
काती खातीर फायदेशीर
दर दिसा एक आपोल खाल्यार कांय दिसां भितर तोंडार परिणाम दिसतले. आपोल नेमान सेवन केल्यार कात भितरल्यान निरोगी जाता आनी तोंडाक सैमीक गुलाबी चकचकीतपण येता.
गोडेंमूतांत फायदेशीर
गोडेंमूत जाल्ल्या दुयेंतींकय आपोल खावप फायद्याचें मानतात. तातूंत गोडसाण खूब आसली तरी रगतांतल्या साकरेच्या प्रमाणाचेर खूब उणो परिणाम जाता, कारण तातूंत हेर पोशक तत्वां आसतात, तशेंच तातूंत ग्लायसीमिक इंडेक्स उणो आसता, देखून गोडेंमूत जाल्ल्या लोकांक आपोल फायद्याचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
