भांगरभूंय | प्रतिनिधी
एकदां आंगांत आळस भरलो वा आळसाय करपाची संवय लागली काय काम जायना. सरकारी, खाजगी नोकरी करप्यांक हाचो अणभव आसतलो. तातूंत थोडे मुळांतूच आळशी आसतात. थोड्यांक कामूय जमना. म्हणल्यार ते वशिल्यान लागिल्ले आसतात. हेच नोकरदार चड कामचुकारपणा करतात. कांय जाणांचें लक्ष फक्त सुटी केन्ना, रजा कितल्यो उरल्यात, पगार केन्ना वाडटलो हाचेरूच आसता. थोडे पिरायेचे पन्नाशीक लागीं पावले काय दुयेंत पडपाक लागतात. भलायकेचे समस्येक लागून तांकां दीसपट्टें काम करप पसून कठीण जाता. मागीर ह्या दुयेंत तशेंच आळशी, कामचुकार नोकरदारांच्या कामांचें वजें दुसऱ्यांचेर पडटा. तांचे वयलो ताण वाडटा. आळस करपाक लागले काय मुखार बडटी, पगारवाड मेळपाक आडमेळीं येतात, हाचें भान नोकरदारांक उरना. अशां खातीर सरकार अदीं मदीं स्वेच्छा निवृत्ती येवजण जाहीर करता. तांकां तांचे मेळपाचे आशिल्ले पयशे, निवृत्ती वेतन बी दिवपाक सरकाराचेर अर्थीक वजें पडटा, ही गजाल खरी, पूण प्रशासन सुरळीत चलपाक ताका हे निर्णय घेवचेच पडटात.
फाटीं सरकारान अनुदानीत शिक्षण संस्थांतल्या ‘क’ श्रेणी कर्मचाऱ्यां खातीर स्वेच्छा निवृत्ती येवजण जाहीर केल्ली. तिका आतां तीन म्हयन्यांची मुजतवाड दिल्या. संबंदीत कर्मचाऱ्यांक 14 डिसेंबर मेरेन अर्ज करपाक मेळटले. 30 जुलयाक ही येवजण जाहीर जाल्ली. मुख्याध्यापक, शिक्षण संस्थांच्या मुखेल्यांनी तांचे कडल्यान तशे अर्ज घेवचे, अशें शिक्षण खात्यान कळीत केलां. हे अर्ज दोन वांगड्यांचे समिती मुखार सादर करचे पडटले. संस्थेचे वेवस्थापन समितीचे अध्यक्ष आनी शिक्षण खात्याच्या संबंदीत विभागाचे उपसंचालक वा तांचो प्रतिनिधी हांची ही समिती. तांणी मान्यताय दिले उपरांतूच अर्ज शिक्षण खात्याक धाडचे, अशेंय तांकां सांगलां. कारण शिक्षण संस्थेक नाका त्या कर्मचाऱ्याचेर स्वेच्छा निवृत्ती खातीर चेपण येवंक शकता, स्वता त्या कर्मचाऱ्याच्या मनांत निवृत्त जावपाचें नासुंयेता. फाल्यां कायद्याची लढाय सुरू जावपाक नाका, म्हूण ही खबरदारी घेतल्या आसतली. आतां नेमके कितले कर्मचारी अर्ज करतात, तें वर्स अखेरेक कळटलेंच.
कांय म्हयन्यां पयलीं कामचुकार सरकारी नोकरदार, कामाचेर सोरो पियेवन येवपी, भलायकेचें कारण सांगून परत परत रजा घेवपी, उसरां कामार येवपी नोकरदारां खातीर स्वेच्छा निवृत्ती येवजण जाहीर केल्ली. संबंदीत विभाग मुखेल्यांक आपापल्या विभागांतल्या असल्या कर्मचाऱ्यांची वळेरी वयर धाडपाक सांगिल्ली. उपरांत कितल्या जाणांनी ती धाडली आनी कोणे हे येवजणेचो लाव घेतलो तें कळूंक ना. कारण उणें काम करून भरपूर पगार दिवपी नोकरी सहसा कोण सोडपाक सोदिनात. तरीय लोकांक दर्जेदार, वेगान चलपी प्रशासन दिवपाचें आसल्यार असल्या कर्मचाऱ्यांक घरा धाडल्यार कोणाक चुरचुरें दिसचें ना. सरकारी नोकरी म्हणजे मजा करपाचें थळ, हो समज जायत्या जाणांच्या मनांत तयार जाला. ताका धपको बसपाकूच जाय. कोर्टाचीं सोंपणा चडचीं पडलीं तरी सरकारान फाटीं सरपाक जायना.
ई- बसींक गर्दी, पूण….
स्मार्ट सिटी खाला पणजे सुरू जाल्ले ई- बसींक प्रवाशांचो बरो तेंको मेळटा, अशें स्मार्ट सिटी अधिकाऱ्यांनी जाहीर केलां. ह्या बसीं मुखार आशिल्लीं आडमेळीं पयस केल्यार ती आनीक फायद्यांत येतली. फाटल्या तीन म्हयन्यांत चार लाखां परस चड प्रवाशांनी तातूंतल्यान प्रवास केला. ह्या बसींनी सकाळीं आनी सांजवेळा गर्दी आसता. मात तांकां थारिल्लो मार्ग हुपपाक चड वेळ लागता. देखीक बालभवना कडल्यान सांतिनेज मार्गान बस स्टॅण्डाचेर वचपाक अर्द वरा परस चड वेळ घेवपी कांय ड्रायव्हर आसात. चवथीच्या दिसांनी होच प्रवास पंदरा मिणटांनी जातालो. रस्ते सामके इबाडल्यात. ते अशीर जाल्यात. तातूंत 18 जून रस्तो, चर्च, कोर्तींत, अटल सेतू हांगा येरादारी ठप्प जाताच. दोनूय वटेनच्यान पार्कींग आसतना थंय मदींच मोटारी उब्यो केल्ल्यो आसतात, ही उशीर जावपाचीं आनीक कांय कारणां. हाचेर उपाय काडप पालिकेक सोडात, खुद्द पुलिसांक पसून शक्य ना, अशें सध्या तरी दिसता. जांकां घरा वतना फुडली बस धरपाची आसता, सकाळीं वेळार कामार पावपाचें आसता, तांचे खातीर ह्यो स्मार्ट सिटी बसी न्हय. स्टॅण्डार वतना जुंता हावसा कडेन बस आडकल्यार त्या प्रवाशाचें फुडलें वेळापत्रक कोसळूं शकता. सध्या तिकेट 10 रुपया आसा, शारांत भितर वचपाक मेळटा आनी सीटी बसींचो वाज आयला म्हूण प्रवासी ह्यो बसी पसंत करतात, इतलेंच. ई- बस सेवेंत वेळा बाबतींत तरी सुदारणा जायच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
