भांगरभूंय | प्रतिनिधी
मडगांव: आम आदमी पक्षाची वरिश्ठ फुडारी आतिशी आपल्याक मेळ्ळी. तिचे कडेन सविस्तर चर्चा जाल्या. मात हे चर्चेंत कसलेच तरेचो निर्णय घेवंक ना, अशी म्हायती आदले मंत्री चर्चिल आलेमाव हांणी दिली.
येवपी विधानसभा वेंचणुकेचे फाटभूंयेर, ’आप’ची वरिश्ठ फुडारी आनी दिल्लीची आदली मुख्यमंत्री आतिशी हांणी कांय दिसां आदीं चर्चिल आलेमाव हांची भेट घेतिल्ली. हे भेटी विशीं अदीक म्हायती दितना चर्चिल हांणी सांगलें : आतिशी वांगडा हेरूय कांय जाणांनी म्हजी भेट घेतली. मात, राजकी नदरेन हांवें आजूनय कसलोच निर्णय घेवंक़ ना. राज्याच्या सगल्या मतदारसंघांनी आपल्याक मानपी व्हड वर्ग आसा, दरेका मतदारसंघांत सुमार चार हजार मतदार आजूय आपले वटेन उबे आसात अशें तांणी सांगलें.
स्वता चर्चिल वा तांची धूव वालंका आलेमाव ’आप’ची ऑफर स्विकारतलीं काय? ह्या प्रस्नाचेर तांणी सांगलें, हे गजालीचेर सध्या विचार चल्ला. हे विशीं आजूनय कसलोच निमाणो निर्णय जावंक ना. योग्य वेळार अधिकृत घोशणा करतले, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
