भांगरभूंय | प्रतिनिधी
माणिकराव ठाकरे : भुमिका स्पश्ट करपाची कॉंग्रेसीची मागणी
पणजी : आम आदमी पक्षाक कोणा कडेन लढपाचें आसा? भाजपा काय कॉंग्रेसी कडेन? हें तांणी स्पश्ट करपाक जाय. आपल्या पक्षांत कितें चल्लां, हें तांणी पयलीं पळोवपाक जाय. देशाच्या बर्या खातीर आपान आपली भुमिका स्पश्ट करची, अशी मागणी कॉंग्रेसीचे गोंयचे प्रभारी माणिकराव ठाकरे हांणी केली.
फाटले दोन दीस ठाकरे गोंयांत आसात. प्रदेश वेंचणूक समितीची बसका घेतले उपरांत कॉंग्रेस हावजांत तांणी पत्रकार परिशद घेतली. तिका विधीमंडळ फुडारी युरी आलेमांव, आमदार कार्लुस फेरेरा, प्रदेश कॉंग्रेस अध्यक्ष अमित पाटकार, आदले खासदार फ्रान्सिस सार्दिन, कॉंग्रेस कार्यकारिणी वांगडी गिरीश चोडणकार हाजीर आशिल्ले.
गोंयांत भाजप सरकाराक कॉंग्रेसीचें प्रत्यक्ष वा अप्रत्यक्ष तरेन फाटबळ आसा, असो आरोप आपचे राष्ट्रीय संयोजक अरविंद केजरीवाल हांणी राज्यांत केलो. तांच्या ह्या आरोपाक लागून कॉंग्रेस आनी आपांत व्हड दरी निर्माण जाली. हेच फाटभूंयेर प्रभारी ठाकरे हांणी भुमिका स्पश्ट करपाचें आवाहन ‘आपा’क दिलां.
केजरीवाल हे फाटल्या दारान प्रधानमंत्री नरेंद्र मोदी हांची भेट घेतात. भारतीय जनता पक्षा कडेन कोणाचे संबंद आसात, हें उक्तें जालां. दिल्लीचे वेंचणुकेंत भाजपान आपाक सोपोवन उडयलां. देशांतली परिस्थिती आतां बदल्ल्या. गोंयां सयत पुराय भारतांत राहूल गांधींच्या नेतृत्वाक व्हड फाटबळ मेळटा. देशांत कॉंग्रेसी खातीर बरें वातावरण तयार जाता, अशें ठाकरे हांणी म्हणलें.
युती विशीं केंद्रीय नेतृत्व घेतलें निर्णय
गोंयांत भाजप विरोधी पक्षांनी भुमिका स्पश्ट करून कॉंग्रेसीक युती बाबत प्रस्ताव सादर करप गरजेचें. ह्या प्रस्तावाचेर केंद्रीय नेतृत्वा कडेन चर्चा जातली. केंद्रीय नेतृत्वाच्या मान्यताये उपरांत युतीचो निर्णय जातलो. युती खातीर हेर पक्षांनीय फुडाकार घेवपाची गरज आसा, अशें ठाकरे हांणी म्हणलें. प्रदेश कॉंग्रेस अध्यक्षपदा वेल्यान अमित पाटकार काडटले अशी चर्चा सुरू आसा. हे विशीं ठोस म्हायती दिवपाचें ठाकरे हांणी टाळ्ळें. हो भितरलो विशय. कॉंग्रेसीचे राष्ट्रीय अध्यक्ष आनी हेर फुडारी हे विशीं निर्णय घेतले. हांव निर्णय घेवपाक शकना, अशें ठाकरे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
