भांगरभूंय | प्रतिनिधी
ज्येष्ठ सोंपता आनी आषाढ सुरू जाता म्हणल्यार गोंयांत भक्तीचें वातावरण सुरू जाता. सगल्याक रामकृष्ण हरी पांडुरंग हरी आयकूंक येता. दर वर्साची गजाल ही. पूण ह्या वर्सा मात तातूंत बदल जाल्लो दिसून येता. अंदूं सगल्याक गोविंदा रे गोपाळा कानार पडूंक लागलां. दर दिसा गोविंदाच्योच खबरी. गोविंद सरकारी कार्यावळीक आयलो ना. गोविंद वारकऱ्यां वांगडा चललो, गोविंदान लोटांगण घालें, गोविंद हें उलयलो आनी गोविंदान तें केलें. फक्त गोविंद गोविंद आनी गोविंद. जशें कितें गोविंदान सगलें वायटूच केलां आनी बाकी राजकारणी सामके धुल्ले तांदूळ. हातूंत लोकांचीय चूक करूंक जावची ना. जें कितें घडलां तातूंत गोविंदाचोय दोश आसा. मनशाचीं दोनूय पोंतां घट आसूंक जाय जाल्यारूच मनीस शिलवान जाता अशें आमचे जाणटेले म्हणटाले. तातूंत जिबेचें पोंत सामकें गरजेचें. हाड नाशिल्ली जीब कशीय वळोवं येता. आनी एकदां तोंडांतल्यान सुटिल्लें उतर फाटीं घेवंक मेळना. म्हणून मनशान कितेंय उलयतना सांबाळून उलोवंक जाय. सार्वजनीक जिवितांत आशिल्ल्या मनशान तर चडूच जबाबदारीन वागूंक जाय.
तातूंत आपणाक कोण गोडफादर ना हाची गोविंदाक जाणीव आसूंक जाय आसली. तीन वर्सां फाटीक लागुनूय एकाय दिल्लीश्ववराची भेट घडोवन दिनात हाचे वयल्यान आपणाक पक्षांत कितलें मोल आसा हाची जाण ताका येवंक जाय आसली. पक्ष कसो वागता, कोणाचो कसो उपयोग करून घेता आनी उपयोग जातकूच खोल्ले कशे करता हें पयलींच समजून घेतिल्लें जाल्यार आयज गोविंदाचेर दंडवत घालपाची पाळी येवची नासली काय दिसता. पूण घडपाचें तें घडलें आतां रडून कसलो फायदो? बरें, आतां तरी जिबेक लगाम जाय काय नाका? जर पक्षांत रावपाचें आसा, पक्ष सोडपाचो ना जाल्यार सगलें सोंसपाची तयारी आसचीच पडली ना. पूण ना हांव पक्षांत रावतलों आनी म्हाका जाय तें करतलों, जाय तें उलयतलों अशें कशें जावं येता? पक्षाची शिस्त, पक्षाचें धोरण मानचेंच पडटलें न्ही?
मनशान खंय मुये रुपान साकर खावंक शिकूंक जाय. जाका हें जमलां तो राजकारणांत तिगला. फोंडें तालुक्यांतल्या चार आमदारांचेंच उदाहरण घेवया. बाकीचे तीन आमदार आनी गोविंद कितलो फरक? बाकीचे तिगूय गोविंदा परस चड तेंप राजकारणांत आसात. पूण तांची केन्ना खळखळ आयकूंक येना. ते वेवस्थीत आपणांलें काम करतात, जाय तें सादोवन घेतात. तांतलो रवी तर कितले फावटी हेवटेन तेवटेन गेलो. जंय गेलो त्या पक्षांत आससर त्या पक्षा कडेन एकरूप जावन उरलो. सुदिन तर मंत्रीपद मेळोवंक अप्रत्यक्षपणान पक्षांतरां करीत आसता. पूण इतलें करुनूय तो सवळो. अजुनूय तो आपल्या पक्षाक धरून आसा म्हणटकूच पळेयात. गोविंदान हांचे पसून इल्लें कितेंय शिकूंक नाका आसलें?
गोविंदाची पयली चूक म्हणल्यार तो भाजपांत गेलो. वचूंक नासल्यार कितें जावपाचें? गोविंद वेंचून येवचो नासलो? खात्रीन येवपाचो. वेल्यान ताचो विरोधक जो दोन अडेजशें मतांनी पडला तो पांचश्यांनी पडपाचो. कारण जांकां भाजपा नाका आसली ते गोविंदा आड गेले. अपक्ष राविल्लो तोय मनांतल्यान भाजप, वेंचून आयल्यार भाजपाक तेंको दिवपाचो आनी गोविंद भाजपाचो अधिकृत उमेदवार. दोगूय नाका आशिल्ल्यांनी मगोक मतां घालीं. गोविंद अपक्ष रावल्यार तीं गोविंदाकूच पडपाचीं. प्रियोळचो इतिहास पळेयात, दर एकलो दोन फावटीच वेंचून येता. जल्मी, सावंत, सतरकार, ढवळीकार सगले दोन फावटीच वेंचून आयल्यात. मागीर ते मंत्री पदार आसूं वा नासूं. आतांय तेंच घडपाचें. पूण गोविंदाक कित्याक कोण जाणा भाजपांत वचन दिसलें. आपूण आपलें म्हत्व उणें करतां म्हणपाचेंय ताका कळ्ळें ना. अपक्षूच आशिल्लो जाल्यार आयचो हो खीण पळोवचो पडचो नासलो काय दिसता.
दुसरी चूक ताची जीब. गोविंदाक जिबेक वेसण घालूंक आयली ना. नाटकांतलो संभाजी ताच्यांत सामको दसून उरला कितें खबर ना पूण ताची उलोवपाची आनी वागपाची स्टायल तशीच दिसता. हाका लागून गोविंदान जायते दुस्मान तयार करून दवरल्यात. राजकारणांत ताका दुस्मान आसाच पूण जीं खातीं ताचे कडेन आसलीं त्या खात्यांनीय ताणें दुस्मान तयार केल्यात. गोविंदाक मंत्रीपदा वेल्यान काडलो आनी रोखडोच एक ओडियो सगल्याक भोंवक लागलो. गोविंद एका डायरेक्टराचेर तापता, सामकी कापपाची भास उलयता. आपूण एक मंत्री, आपणें एका डायरेक्टरा कडेन असली भास वापरची न्ही म्हणपाचें भान ताका उरना. खरें म्हणल्यार दुसऱ्याच्या खात्यांत आपणें लक्ष घालचें न्ही हें ताका कळूंक जाय आसलें. खंयचोय सरकारी ऑफिसर हो आपलो सायब सांगता तसो वागता. म्हणटकूच कितेंय चूक जाली तर त्या खात्याच्या मंत्र्याक कळोवंक जाय आसली. त्या खात्याच्या डायरेक्टराक असो तापोवप सारकें नासलें.
हातूंत आनीक एक गजाल लक्षांत घेवपा सारकी आसा. गोविंद फोन करून तापता आनी तें रिकोर्ड जाता. गोविंद फोन करून तापतलो म्हणपाचें पयलींच कोणाक तरी खबर आसलें? काय गोविंद तापचो आनी ट्रेप जावचो म्हणून कोणें हें सगलें घडोवन हाडिल्लें? काय सगल्याच मंत्र्यांचे फोन रिकोर्ड जातात? अशें आसल्यार हें भयानक म्हणचें पडटलें. जाणें हो फोन रिकोर्ड केला ताची चवकशी जावंक नाका आसली? हांतल्यान एक गजाल कळटा ती म्हणल्यार कसोय करून गोविंदाक भायर मारचो म्हणपाचें पयलीं सावन शिजतालें. गोविंदाक हें कळूंक जाय आसलें आनी ताणें आपलो सभाव बदलूंक जाय आसलो काय दिसता. पूण गोविंदान आपली तोफ चालूच दवरली आनी परिणाम जावपाचो तोच जालो. गोविंदान आपल्याच हातांनी आपल्या पांयांर फातोर मारून घेतलो म्हणल्यार अतिताय जावं नये.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
