भांगरभूंय | प्रतिनिधी
मच्छिंद्र च्यारी: श्री सरस्वती हायस्कुलांत मनयलो गोंय क्रांती दीस
पणजी: जो समाज आपलो इतिहास विसरता तो समाज फुडें सरपाक शकना, अशें वास्तूविशारद मच्छिंद्र च्यारी हांणी म्हणलें.
विद्या भारती गोवा हांच्या जोड पालवान श्री सरस्वती हायस्कुलाच्या सभाघरांत गोंय क्रांती दीस उमेदीन मनयलो. हे कार्यावळीक मुखेल सोयरे ह्या नात्यान मच्छिंद्र च्यारी उलयताले. तांचे वांगडा माचयेर ज्येश्ठ शिक्षक श्रीनिवास पाटील हाजीर आशिल्ले.
कार्यावळीची सुरवात राममनोहर लोहिया हांकां आर्गां ओंपून जाली. ह्या वेळार विद्यार्थीनी ईश्वरी कांदोळकार, जिया सावंत आनी शर्वाणी जांभळे हांचीं क्रांती दिसाची म्हायती दिवपी भाशणां जालीं. तशेंच श्रेष्ठा फडके हांणी क्रांती दिसाचेर कविता सादर केली. गार्गी नायक हांणी क्रांती दिसाचेर पोवाडो सादर केलो.
हे कार्यावळीचें सुत्रसंचालन शिक्षक श्रीनिवास पाटील हांणी केलें. उपकार राजू परवार हांणी मानले. ही कार्यावळ येसस्वी करपा खातीर कृपा जोशी, अलका नायक, सुजाता देसाय, संजय मळीक आनी रोहन कळंगूटकार हांचें मोलादीक सहकार्य मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
