भांगरभूंय | प्रतिनिधी
म्हजें मत
आयज-काल आमकां एखादें काम करुन दाखोवपाचें आसल्यार वा एखादी जापसालदारकी निभावपाची आसल्यार आमचे भितरले शक्तीचो सोद घेवचो पडटा. ते खातीर आमी आमचे तांकीची जाणीव करून घेवपाक जाय, अशें म्हणटात. संवसारांक कोणाच कडेन ना अशी खंयची शक्त वा तांक म्हजे कडेन आसा, हें वळखूपाक आयलें जाल्यार जायत्यो गजाली सोंप्यो जातल्यो. थोडक्यांत, 1. आमचे मदीं अशी खंयची वेगळी शक्त आसा. 2. म्हज्यांत अशी खंयची वेगळी तांक आसा. 3. म्हजे भितरले तांकीचो हांव कसो उपेग करपाक शकतां? अशा कांय प्रस्नांच्यो जापो सोदपाक जाय. त्यो मेळ्ळ्यो जाल्यार हातांत घेतिल्लें काम पूर्ण करपाक एक वेगळीच उर्जा आमकां मेळटा. मात ही वा अशा प्रस्नांच्यो जापो भायली व्यक्ती दिवपाक शकतली, अशे मात जायना.
खरें तर ह्यो जापो आमचेच भितर लिपिल्ल्यो आसतात. त्यो स्वताच सोदच्यो पडटात. ते खातीर कांय गजाली आमकां प्रामाणीकपणान स्विकारच्यो पडटल्यो. स्वता विशींचे गैरसमज पयस करचे पडटले. आमचे भितर आशिल्ल्या शक्तींचो स्विकार करचे वांगडाच आमचे मदीं नाशिल्ल्या तांकीचो आमी पोको झेत मारतात तो कुशीक दवरचो पडटलो. ते खातीर खऱ्यो जापोय मेळनात. आपली शक्त, तांक, ध्यास वा आपल्या इत्सांचो सोद हो पयलीं आमचे भितर घेवचो पडटा. तो घेवपाक सुरवात करकतच हेर गजालीं कडेन आडनदर करची पडटा. आमचें लक्ष विचलीत करपी गजाली पयस दवरच्यो पडटात. हें सगलें जमल्यारुच तो सोदूय सार्थकी लागपाक शकता.
आमची अमुक इत्सा पूर्ण जावची, हे खातीर फक्त आंगवणी करून कांय जायना. आमी खरेपणान यत्न करीनात, तो मेरेन दैवपसून साथ दिना, अशें म्हणटात.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
