भांगरभूंय | प्रतिनिधी
मडगांव : बेतालभाटीचे शिमेचेर सुचवणी तकटे उबारून गांवांतल्यो गरजेच्यो सुविधा पुराय जाल्ल्यान प्रमोटर, डेव्हलपर्स आनी बिल्डर हांणी आपले जोखमीचेर जमीन विकत घेवची अशी शिटकावणी दिल्या. ग्रामसभेच्या थारावा प्रमाण हो तकटो उबारिल्ल्याचें सरपंच अँथनी फर्नांडीस हांणी सांगलें.
बेतालभाटी पंचायत वाठारांतले शिमेचेर शिटकावणी दिवपी सुचवणी तकटे उबारल्यात. हाचेर सांबाळून रावात, गांवांतली गरजेचीं संसाधनां सोंपल्यांत. गांवाची रावपाची, म्हणल्यार लोकांक आस्पावन घेवपाची तांकूय हुपल्या. हाका लागून बिल्डर, डेव्हलपर आनी प्रमोटर हांणी गांवांत जमनी घेतना आपले जोखिमेचेर घेवच्यो, असो संदेश दितनाच ग्रामसभा वांगड्यांच्या सुचवण्यां प्रमाण अशें सकयल नमूद केलां. ह्या तकट्याचे फोटो सोशल मिडियाचेर व्हायरल जाल्यात. तांतल्यान विवीध पांवड्या वेल्यान ह्या तकट्यांक फाटबळूय मेळटा. अशे तरेन हेर ग्रामपंचायतींनींय तकटे उबारून गांवांत येवपी प्रकल्पांक विरोध करचो आनी गांवांतल्या जमनींची राखण आनी सांबाळ करचो, अशे संदेश व्हायरल जातात.
हे विशीं सरपंच अँथनी फर्नांडीस हांकां विचारलें तेन्ना, गांवच्या लोकांकूच सध्या गरजेच्या प्रमाणांत वीज, उदक उपलब्ध जायना. हाका लागून ग्रामसभेंत नव्या प्रकल्पांक मंजुरी दिवची न्हय अशें सांगिल्लें. गांवच्या लोकांक उदकाचो प्रस्न आसतना नव्यान येवप्यांक ना हरकत दाखलो दितात. मात तांकां उदक उपलब्ध करतना पंचायतीक त्रास जातात. हे ग्रामसभेंत घेतिल्ल्या थारावाक कोणेंय विरोध करुंक ना. त्या थारावा प्रमाण गांवचे शिमेचेर सुचवणी करपी तकटे उबारल्यात. हें फकत म्हायती खातीर आसा. जमनी घेतले उपरांत तांचे मुखार आडखळ येवची न्हय, हाका लागून पयलींच ही शिटकावणी दिल्या. जमनी घेवं नाकात वा हेर कसलोच सल्लो दिवंक़ ना. हो तकटो फकत म्हायती खातीर लायला.
कांय प्रकल्पां वेळार नगर नियोजन खात्या कडल्यान गरजेची तात्रीक परवानगी मेळटात, मात प्रत्यक्ष जमनीचेर रस्त्याची लांबाय उणी आसप आनी हेर जायत्यो त्रुटी आसतात.
तशेंच थळाव्यां कडल्यान ग्रामसभेंत नव्या प्रकल्पांक परवानगी दिवची न्हय हे विशीं थाराव घेतात. मात सगल्यो तांत्रीक आनी हेर परवानग्यो घेतिल्ल्यान पंचायतीक कागदपत्रां पळोवन ना हरकत दाखलो दिवचो पडटा. केन्नाय भायल्यान आयिल्ल्या प्रकल्पाचेर कारवाय करपाक गेल्यार ते सुवातेर तशेच परवानगेेचेर थळाव्यांनीय प्रकल्प उबारिल्लो आसता. हाका लागून कायदो सगल्यांक समान आशिल्ल्यान पंचायतीक सबुरीन घेवप गरजेचें थारता. जमनी घेवन नव्यान प्रकल्प उबारप्यान पंचायतीक कांयच सांगूंक ना आनी आतां उदक आनी विजेची पुरवण जायना अशें म्हणचें न्हय देखूनच सुचवण्यो तकटे लायल्यात, अशें सरपंचाठ म्हणलें.
उपसरपंच इल्मा डायस हांणी सांगलें, गांवांत थळाव्यांनी गरजेची लायट आनी उदका पुरवण जायना. फाटल्या कांय वर्सां सावन अनियंत्रित तरेन सुरू आशिल्ल्या प्रकल्पाक लागून हो प्रस्न उप्रासला. ग्रामस्थांक ह्यान फुडें आनीक समस्यांक तोंड दिवचें पडचें न्हय हाका लागून सुचवण्यो तकट्यांची मागणी ग्रामसभेंत केल्ली. ते प्रमाण पंचायतीन ते लायल्यात. गांवांत सध्या कोयराचोय प्रस्न तोंड वयर काडटा. हाका लागून थळाव्यांक त्रास जाता जाल्यार नव्यान येवप्यांक गरजेच्यो सुविधा पंचायती वतीन दिवपाक शकनात, हें सांगपाक तकटे उबारल्यात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
