भांगरभूंय | प्रतिनिधी
मुलाखतीचें पत्र उसरां मेळिल्ल्यान नोकरेची संद गेली
भांगरभूंय । प्रतिनिधी
फोंडें: इंटरनॅट युगांत सगळें कितें धपक्यांत उपलब्ध जाता. पूण उसगांव वाठारांत एक धपको दिवपी गजाल उजवाडाक आयल्या. नोकरे खातीर मुलाखत सकाळीं 9.30 वरांचेर आशिल्ली, पूण तें पत्र 10.30 वरांचेर मेळिल्ल्यान एका तरणाट्याची नोकरेची संद गेली. त्या वाठारांतलो पोस्टमन रजेर आशिल्ल्यान पत्र उसरां पावलें, अशें चवकशे उपरांत कळ्ळें.
उसगांव वाठारांतल्या एका कलाकारान कांय दिसां आदीं बालभवनांत एका पदा कातीर अर्ज दाखल केल्लो. बालभवनांतल्यान त्या कलाकाराक 1 मार्चाक पत्र धाडलें आनी 9 मार्चाक सकाळीं 9.30 वरांचेर मुलाखतीक येवपा विशीं कळयलें. पूण तें पत्र अर्जदाराक 9 मार्चाक सकाळीं 10.30 वरांचेर मेळ्ळें. ताका लागून पदा खातीर अर्ज केल्ल्या कलाकाराक कपलार हात मारून घेवचो पडलो.
अर्जदार तरणाट्यान पोस्ट कार्यलयांत चवकशी केली तेन्ना तें पत्र 4 मार्चाक उसगांव पोस्ट कार्यालयांत पाविल्ल्याचें कळ्ळें. पूण पोस्टमन कांय दीस रजेर गेल्ल्यान पत्र उसरां दिल्ल्याचें सांगलें. म्हत्वाचें म्हणल्यार पोस्टमनान आपूण रजेर गेल्ल्यान पत्र उसरां दिल्ल्याचें लेखी पत्र अर्जदाराक दिलां. उसगांव वाठारांतल्या कांय जाणांनी दिल्ले म्हायती प्रमाण फाटल्या कांय म्हयन्यां सावन उसगांव वाठारांतल्या लोकांक पत्रां उसरां मेळटात. येरादारी खात्या वतीन येरादारी परवाने पोस्टांतल्यान धाडटात. पूण लोकांक पोस्टांतल्यान येवपी येरादारी परवाने 20 ते 30 दिसां उपरांत मेळटात, अश्यो ह्या वाठारांतल्या लोकांच्यो कागाळी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
