भांगरभूंय | प्रतिनिधी
पणजीः आपत्ती वेवस्थापनांत स्वावलंबी जावपा खातीर गोंय काम करता. दर्यादेग वाठारांत येवपी हुंवार आनी सुनामीच्या धोक्या आड आमची तयारी बळीश्ट केल्या. आपत्ती वेवस्थापना वरवीं धोको वळखपाक गोंय फुडें आसा, अशें मुख्यमंत्री डॉ. प्रमोद सावंत हांणी सांगलें.
गोंय विद्यापिठाच्या परिशद सभाघरांत गोंय विद्यापीठ आनी इन्कोयस हांचे मदीं आपत्ती धोको वेवस्थापनाचेर समजीकायेची कबलात जाली. हे कार्यावळीचे मुखेल सोयरे ह्या नात्यान मुख्यमंत्री डॉ. प्रमोद सावंत उलयताले. ह्या वेळार गोंय विद्यापीठाचे कुलगूरू हरीलाल मेनन, इन्कोयसचे संचालक डॉ. बाळकृष्ण नायर, राष्ट्रीय धुव्रीय आनी समुद्री संसोधन केंद्राचे (एनसीपीओएर) संचालक डॉ. तांबण मेलोत, इन्कोयसचे संचालक डॉ. आदीम अर्शद हजर आशिल्ले.
पर्यटन, नुस्तेंमारी, बंदर, खाजन शेती, संरक्षणाक तेंको दिवपी गोंयचे १०८ किलोमिटर लांब दर्यादेगेर आमची तांक जावन आसा. तशेंच ही आमका कमकूवत लेगीत करता, अशें मुख्यमंत्र्यान सांगलें.
सकयल्या वाठारांत हुंवार हाडपी, आमच्या नुस्तेकारांक धोक्यांत उडोवपी तोंक्ते चक्रीवादळ तशेंच पर्यावरण प्रणाली आनी उपजीवीकेक लुकसाण करपी बदलपी दर्यांतले स्थितींक आमी तोंड दिलां. गोंय आपत्ती वेवस्थापना वरवीं आमी हे आपत्ती धोके वळखपाक फास्ट आसात. आमी आमची एसओपी विकसीत केल्या आनी समुदाय जागृती भितर भर दिला. आपत्ती वेवस्थापनांत गोंय स्वावलंबी जावपा खातीर काम करता, अशे मुख्यमंत्र्यान म्हणलें.
वेळावेळार शिटकावणी मेळपा खातीर आमी हवामान खातें आनी इन्कोयस हांचे वांगडा मेळून काम करता. वाडटो धोको आनी तांचे वाडटे खरपणाचे फाटभूंयेर आमी राज्य, राष्ट्र आनी समुदाय हांचे मदली भागीदारी बळीश्ट करपाक जाय जाका लागून एकूय गांव, एकूय नुस्तेंकार आनी एकूय पर्यटक राखण नासतना उरचो ना, असो विस्वास मुख्यमंत्र्यान उक्तायलो.
स्वयंपुर्ण गोंय २.० खाला आत्मनिर्भरतेचो आसपाव करून आमकां दरेक गांवांक जागृत, आत्मनिर्भर आनी तयार करपाक जाय. आमच्या नुस्तेकारांक तांच्या फोनाचेर दर्याच्यो सुचोवण्यो आनी संभाव्य नुस्तेमार मळावेले अदमास येतात. आपत्तीक पयलो प्रतिसाद दिवपी म्हण आमच्या दर्यादेग पंचायतींक प्रशिक्षण दिलां, अशें मुख्यमंत्र्यान म्हटला.
आपदा मित्र खाला ३०० तरणाटे तयारः मुख्यमंत्री
सरकारान उजो पालोवपी दळा वरवीं फुकट प्रशिक्षण दिवन ३०० चले आनी चली हांकां आपदा मित्र म्हण आसपावन घेतला. राज्यांतल्या दोन-तीन गांवां खातीर आपदा मित्र आसा. विद्यार्थ्यांनी आपदा मित्र म्हण प्रशिक्षण घेवचे ना जाल्यार हे कबलातीचो कांय उपेग जावचो ना, असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
