भांगरभूंय | प्रतिनिधी
(हांवें ‘ बरें ‘ म्हणलें खरें पूण अशी येवजण बी करपाक हांव सामकोच ‘ फाटीं ‘ आसलों. शेवटाक तांणींच येवजण तयार केली. … आतां मुखार…)
हांवें तांकां आमकां येतात त्यो अडचणी सांगल्यो. तपासणेघरांतल्या वखदांचो खर्च ही आमचे फुडली सगळ्यांत व्हडली अडचण आसा हें सांगलें. म्हजें म्हणणें तांणीं आयकून घेतलें आनी पयल्या वर्सा खातीर पांच लाख रुपया दितां म्हण सांगलें आनी अप्रुप म्हणल्यार रोखडेच तांणीं पयशे धाडून दिले. गुल असनानी हे अमेरिकेंतल्या रोटरी क्लबाचे वांगडी आसले. आमच्या सारक्या प्रकल्पांक रोटरी मजत करता, हें तांकां खबर आसलें. ताका लागून वखदां खातीर आनीक निधी मेळोवचो, अशी मांडणी तांणीं मांडली. भारतांतल्या खंयच्या तरी रोटरी क्लबान आमकां स्पॉन्सर करप आनी अमेरिकेंतल्या रोटरी क्लबा कडेन ह्या कार्याची शिफारस करप, अशें ह्या येवजणेचें पयलें पावल आसलें. जितलो निधी भारतांतलो क्लब उबो करतलो तितलो निधी अमेरिकेंतलो क्लब दितलो, अशी ही येवजण आसली. हांवें ही येवजण तकलेंत दवल्ली आनी नागपूरांतल्या दोतोर इश्टां कडेन गेलों. तांच्या सहकार्यान दोन वेगवेगळ्या क्लबां कडेन हांवें चर्चा केली. तांणीं आमकां मजत करपाचें उतर दिलें. तपासणेघराच्या खर्चा खातीर हांगच्या रोटरी क्लबान एक हजार डाॅलर्स आनी असनानींनी 15 हजार डॉलर्स अशे वट्ट 16 हजार डॉलर्स उबे केले.
मागीर असनानींनी अमेरिकेच्या रोटरी क्लबा वतीन तितलेच, म्हणल्यार 16 हजार डॉलर्स मेळोवन दिले. अशे तरेन एक रकमेन 32 हजार डॉलर्स म्हणजे लागीं- लागीं 15 लाखांची रक्कम आमकां मेळ्ळी. ही रोकड आमकां दोन वर्सां पावली. दोन वर्सांनी नागपूराच्या दुसऱ्या रोटरी क्लबान आमकां अशीच मजत केली. ते नंतर चाळीसगांवचे डॉ. महाजन, शशी धामणे हांचे कडेन हांव उलयलों. तेय मजती खातीर राजी जाले. मागीर तांच्या रोटरी क्लबा वतीन ही सगळी प्रक्रिया केली. अशा तरेन 2001 तें 2007 ह्या वर्सांत रोटरी क्लब आनी गुल असनानी हाणीं आमच्या वखदांचो खर्च उखल्लो. भुरग्यांच्या हॉस्टेला खातीरय ताणीं भरपूर मजत दिली. ह्या आदारा खातीर आमी आमचे वैजकी सेवेचो आवाठ वाडोवपाक शकले.
वैजकी सेवेचो विस्तार करपाक नागपूरांतल्या फिशाल दोतारांनींय आमकां खूब आदार दिलो. मंदाची भयण, तिचो घोव दोतोर. ते हेमलकसाक येवन गेल्ले आनी प्रभावित जाल्ले. हेमलकसाच्या तपासणेघरा विशीं ते आपल्या कांय दोतोर इश्टां कडेन उलयतकच तांकांय ह्या कामा विशीं खूब उमळशीक निर्माण जाली. ‘आमी तांकां थोडी मजत करया, थंय वचून शस्त्रक्रिया करया’……. तांची ही येवजण तांणीं आमच्या मुखार मांडली. ही येवजण खरी जावपाक शकतली काय म्हण म्हाका दुबाव आसलो. कारण हे सगळे दोतोर दर शेनवार-आयताराक नागपूरा सावन साडेतीनशें किलोमीटर प्रवास करून येतले, आनी हांगच्या थोड्याशा साधनांच्या आदारान हांगच्या ऑपरेशन थेटरांत ऑपरेशन करतले, हें म्हाका अशक्य दिसतालें. म्हणून हांवें तांकां म्हणलें,’ तुमी पयलीं हांगां येवन प्रकल्प पळयात, मागीर कितें तें थारायात.’
हांवें केल्ली सुचोवणी आयकून कांय दोतोर आयले. प्रकल्प पळोवन ते चकासूर जाले. आमकां कितें तरी करपाचेंच आसा, आमी कितें करपाक शकतात तें सांगात, अशें म्हणपाक लागले. हांवें तांकां सुचयलें की ट्यूमर, हर्निया, यूटेरस काडप अशो म्हत्वाच्यो शस्त्रक्रिया करपाक आमकां पेशंटांक नागपूराक धाडचें पडटा. तें बरेचदां सारकें जमना. कारण ते हांगच्यान भायर केन्नाच गेलेनात. भाशा येना, तांचे कडेन पयशेय नात. ह्यो शस्त्रक्रिया जर तुमी हांगां येवन केल्यो तर माडिया आदिवासी पेशंटांची बरी सोय जातली.…..तांकां तें पटलें. आनी मागीर डॉ. सुळे, डॉ. गोवर्धन, डॉ. राव, डॉ. जोगळेकर , डॉ. हाजरा अशे हे नागपूरांतले नावाजते दोतोर आमच्या कामांत वांटेकार जाले. दरेक आठवड्याक दोतोर येवन उपचार करपा जाग्यार दर वर्सा एक शस्त्रक्रिया कँप करप ह्या दोतोरांक आनी आमकांय योग्य दिसलें. कारण सदांच्या उपचारा खातीर आमी दोगांय आसलींच, पूण अवघड शस्त्रक्रिये खातीर हे खास तज्ञ दोतोर मेळप चड गरजेचें आसलें. असो पयलो शस्त्रक्रिया कँप 1986 वर्सा जालो. ताका वीस दोतोर आनी हेर वीस इश्ट आयिल्ले. कँपाची तारीख थारयतकच आमी आमच्या शाळेच्या भुरग्यांक शेनवार- आयताराक सायकली घेवन आशीकुशीच्या गांवांनी रकाद दिवन धाडले. जांचीं ऑपरेशनां आसलीं तांकां पयलींच आपयलें. तांचें ब्लडप्रेशर, हिमोग्लोबीन तपासून दवल्लें. ताकालागून दोतोर आयले की तांकां ऑपरेशनाक सुरवात करप सोपें जावचें.
(मुखार चलता)
प्रकाशवाटा (मूळ लेखक : डॉ. प्रकाश आमटे)
देविदास गजानन नायक
98505 35051
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
