भांगरभूंय | प्रतिनिधी
एके शांत रातीं कॉर्बेट राष्ट्रीय उद्यानांत हतयांचो एक पंगड रेल्वे रुळ हुपतना तांकां वेगान वचपी रेल्वेन टक्कर दिली. तेन्ना एके हत्तीणीक जाग्यारुच मरण आयलें. तिच्या म्हऱ्यांत एक णव म्हयनाचें पील (बाणी) आशिल्लें. तें आबूज जाल्लें. दोळ्यांत दुकां दाटिल्लीं. तें रडटनाय दिसलें. आपले ल्हान पांय जमनीचेर तेंकोवन तें उठपाचो यत्न करतालें. गांवांतलया लोकांनी हें दृश्य पळोवन रोखडीच उत्तराखंड रानां विभागाक खबर दिली. रानां विभागा उपरांत वायल्डलायफ एसओएस (Wildlife SOS) पसून मजतीक आयलें आनी बाणीक मथुराच्या हतयांच्या हॉस्पिटलांत घेवन गेले. हांगाच ताच्या जिविताचो नवो प्रवास सुरू जालो.
बाणीक जिवें दवरपाचो संघर्श
बाणी खूब जखमी जाल्ले. ताचो फाटीचो कणो दुखावल्लो. मणक्यांचे हाड मोडिल्ले. फाटल्या उजव्या पायान काम करप बंद केल्ले. स्पॅस्टिक पॅरापरेसिस नावाचें दुयेंस ताका जाल्ले. शिरांचे दुखीक लागून तें हाडा दुबळीं करता, मासपेशी कडक करता. वाइल्डलाईफ एसओएसाचे संस्थापक कार्तिक सत्यनारायण आनी गीता सेशामणी तशेंच व्हॅट दोतोरांनी बाणीक वाचोवपाची जापसालदारकी घेतली. बाणीक उदकाचीफिजिओथेरेपी, लेझर थेरपी, थायलॅण्डांतले इलेक्ट्रो एक्युपंक्चर उपचार आनी आयुर्वेदीक मसाज करकतच ताचे भलायकेंत मात्शी सुदारणा जाली. तें आयज उबें रावूंक शकता. ताणें चलपाकूय सुरवात केल्या. ताच्या उजव्या पांयांत अजून थोडी दुख आसा.
हतयांच्या मरणाचे प्रसंग
बाणीची ही एकूच घडणूक न्हय, तर दरवर्सा सरासरी वीस हती रेल्वेचो धपको बसून मरतात. रानांत रेल्वेचे रुळ आनी ताचेर कसलीस सुरक्षा वेवस्था नाशिल्ल्यान ह्यो घडणुको घडटा. हें थांबोवपाक भारतीय रेल्वेन ‘गजराज सुरक्षा’ हें एआय तंत्रज्ञान तयार केलां. ताचे वरलीं रुळा लागसार हती आयले की रेल्वे चलोवप्याक संकेत मेळटलो. ही पद्दत आसाम, अस्तंत बंगालांत वापरल्या. तातूंत 99 टक्के यश मेळ्ळां. तरी, अजून सुदारणा जावपाची गरजेची आसा. सगल्या धोकादायक जाग्यांचेर ही एआय सिस्टम बसोवप, रेल्वेचो वेग कमी करप आनी हतयांच्या मार्गांक सुरक्षित करप हें महत्त्वाचें काम.
वायल्डलायफ एसओएस हतयांक वाटावपाक विज्ञान सुदारणा, पुलीस यंत्रणेची सुदारणा आनी तंत्रज्ञान लोकां मेरेन पावोवपाक उर्बा दिता.
तुमी कितें करपाक शकतात?
बाणी सारक्या हतयांक वांचोवपाक वायल्डलायफ एसओएस संघटनेच्या लोकांक मजतीची गरज आसा. तांकां अर्थीक मजत केल्यार हतयांचें दुयेंसपण, उपचार, खावप- पिवप, जतनाय आनीक बरे तरेन करप शक्य जातलें. संघटनेन तयार केल्ले टीशर्ट, कॅप, स्टिलाच्यो बाटल्यो, नोटबूक आनी हेर वायल्डलायफचीं उत्पादना विकत घेतले. तर त्या पयशांचो उपेग हतयांच्या संरक्षणा खातीर जातलो. तुमी खंयच्याय जनावराक स्पाॅन्सर करूं शकतात. आशा आसा की हो लेख वाचून चडांत चड लोक मजत करतले. https://wildlifesos.org/ हे वेबसायटीचेर वचून तुमी म्हायती घेवपाक शकतात. हे संघटनेचें मुख्यालय नवी दिल्लींत आसा. डी- 210 डिफेन्स काॅलनी, नवी दिल्ली- 110024
बाणीचो जीव वाटावलो, ते खातीर ताणें स्वताय यत्न केले. हे घडणुकेक लागून आमचीय जबाबदारी सगल्यां मुखार आयल्या. दान करून ह्या विशयाचेर लोकांक म्हायती दिवन, रानां विभागाक, संस्थेक मजत करून आमी ह्या सुंदर जनावरांची राखण करची.
– श्वेता रामाणी
मुंबय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
