भांगरभूंय | प्रतिनिधी
न्यूयाॅर्क, खबरां संस्था ः नामनेची गायिका केटी पेरी हांचे सयत स बायलांनी सोमारा पयलेच फावट वांगडा अंतराळ प्रवास केलो. हातूंत अमेरिकन अब्जाधीश जेफ बेझोस हांची व्हंकल लॉरेन सांचेझ हिचोय आसपाव आसलो. तांणी हो प्रवास अमेरिकन उद्योगपती जेफ बेझोस हांच्या ब्लू ओरिजिन कंपनीच्या रॉकेटांतल्यान केला. टेक्सासच्या व्हॅपरतलेन हॉर्न लाँच पॅडा वेल्यान सांजेवेळार ७ वरांचेर रॉकेटाने उड्डाण केलें. सुमार ११ मिनटांनी मिशन परतलें.
ह्या काळांत रॉकेटान २०० किमी अंतर कापले. १९६३ उपरांत अंतराळ प्रवासाचेर वचपी ही पयली बायल क्रू जावन आसा. हाचे पयलीं १९६३ वर्सा रशियन अभियंता व्हॅलेंटिना तेरेशकोवा हिणें एकट्यान अंतराळ प्रवास केल्लो.
ह्या मिशना मजगतीं गायिका केटी पेरीन लुई आर्मस्ट्रॉंगच ’व्हॉट अ वंडरफुल वर्ल्ड’ हें गाणे गायलें. ब्लू ओरिजिन ही एक खाजगी अंतराळ कंपनी, जाची २००० वर्सा जेफ बेझोस हांणी स्थापन केल्ली. ब्लू ओरिजिनान तिकिटांचें पुराय मोल जारी करूंक नासलें तरी एका सीटाचें आरक्षण करपा खातीर १५०,००० डाॅलर (अदमास सुमार १.१४ कोटी रुपया) खर्च येता.
न्यू शेपर्ड रॉकेट हें परत वापरुंक मेळपी रॉकेट जावन आसा आनी ताचे बुस्टर दरेका उड्डाणा उपरांत उब्या लँडिंगां वरवीं लाँच पॅडाचेर परत येतात. ब्लू ओरिजिनच्या मतान, न्यू शेपर्ड क्रू दोन दिसांचें प्रशिक्षण घेता, जातूंत शरिरीत घटमूटपणां, आपत्कालीन प्रोटोकॉल, सुरक्षा आनी शून्य गुरुत्वाकर्शण प्रक्रियांचो आसपाव आसा.
न्यू शेपर्ड रॉकेट चलोवपाक पायलटची गरज ना. कॅप्सूलान पॅराशूटाचे मजतीन पृथ्वीचेर सॉफ्ट लँडिंग केलें, तर रॉकेट बूस्टर प्रक्षेपण थळा सावन सुमार दोन मैल आपूण जावन देंवलें.
अंतराळ पर्यटन म्हणजे?
हो म्हारग अंतराळ प्रवास. हातूंत प्रवाशांक कांय वरां वा मिनटां खातीर पृथ्वीचे कक्षेंत वा उपकक्षेंत धाडटात. तांकां ह्या काळांत शुन्य गुरुत्वाकर्शणाचो अणभव येता. म्हणल्यार उफेवंक मेळटा. ते थंयच्यान पुराय पृथ्वी पळोवपाक शकतात. हो अणभव अविस्मरणीय असो आसता. सध्या तो फक्त गिरेस्त लोकां खातीरुच आसा. काय वर्सांनी सामान्य मनशाकूय थंय वचपाक मेळटलें.
अमेरिकन उद्देगपती डेनिस टिटोन २००१ त रशियेचे मजतीन अंतराळ प्रवास केल्लो. आयज स्पेस एक्स, व्हर्जिन गॅलेक्टिक, ब्लू ओरिजिन सारक्यो खासगी कंपनी अंतराळ पर्यटन मळाचेर काम करतात. उड्डाणा पयलीं प्रवाशांक खास प्रशिक्षण दितात. हातूंत धोकोय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
