भांगरभूंय | प्रतिनिधी
बीड (महाराष्ट्र), खबरां संस्था ः भावकीच्या वादांक लागून जाल्ले झगडें आमकां खूबदां पळोवपाक मेळटा. पूण बीडांत सूड घेवपाच्या भावनेन एके बायलेन हुंदराक मारपाचें वखद घालून दोगां माणकुल्यांक मारलें. पुलिसांनी आरोपीक अटक केल्या. 29 डिसेंबर 2023 दिसा घडिल्ली ही घडणूक 20 दिसां उपरांत उक्ताडार आयली. मेल्ल्या ल्हान भुरग्यांची वळख तनुजा (2 वर्सां) आनी किशोर अमोल भावले (13 म्हयने) अशी आसा. स्वाती उमाजी भावले अशें दुबावीत बायलेचें नांव आसा.
पुलिसांक मेळिल्ले म्हायती प्रमाण, गेवराय तालुक्यांतल्या पांढरवाडींतल्या तनुजा आनी किशोर ह्या भयण – भावाक 29 डिसेंबराच्या दनपारां ओंकारी जावंक लागली. देखून सोयऱ्यांनी दोगांयक हॉस्पिटलांत व्हेलीं. 13 म्हयन्यांच्या किशोराक बीड खाजगी हॉस्पिटलांत, जाल्यार तनुजाक छत्रपती संभाजीनगरांतल्या खाजगी हॉस्पिटलांत दाखल केले. दोगांयचेर उपचार सुरू आसतना तनुजाक शेनवारा 30 डिसेंबराक मरण आयलें आनी किशोराक 1 जानेवारीक मरण आयलें. ह्या प्रकरणांत सुरवेक तलवाडा पुलिशेंत सैमीक मरण म्हणून नोंद जाली. पूण उपरांत तो एक खून आशिल्ल्याचे उजवाडाक आयलें.
शेजारी बायलेच्या सांगण्या वयल्यान केलो खून…
एक ते देड म्हयने आदीं शेजारी रावपी सखुबाई ज्योतिराम भावले हिणे दुबावीत स्वातीचो माव सुखदेव भावले हांणी म्हजी धूव वैशालीक सुखात रावूंक दिवंक ना. ताचो सूड घेवपाचो आशिल्ल्यान मेल्ल्या भुरग्यांची चुलती म्हळ्यार भुरग्यांक वखद दिवपी आरोपी स्वातीक सखुबाईन भुरग्यांक वखद दिवपाक सांगलें. पूण स्वातीन ते बायलेक न्हयकार दिलो. मागीर परत 15 दिसांनी शेजारी रावपी सखुबाई भावलेन स्वातीक सांगलें, ‘तुका चार लाख रुपया दिता, फकत इतलें काम कर, तुजो कोणाकच दुबाव येवचो ना, तु अशें केल्यार तुजें कुटुंब हांगा रावचें ना, मागीर तूं हांगा एकटीच रावपाची’ अशें सांगलें. ते प्रमाण सखुबाई भावले आनी स्वाती भावले ह्या दोगांयनी कट रचलो आनी 29 डिसेंबर दिसा दनपारां सखुबाईन हाडून दिल्ले हुंदराक मारपाचे वखद स्वातीन बोटाचेर घेवन तनुजा आनी किशोर ह्या दोगांयच्या तोंडात घालें. उपरांत तांकां ओंकारी सुरु जाली. मागीर दोगांयक मरण आयलें.
आनी मरणाचे खरें कारण सरलें भायर…
19 जानेवारीक शेतांत काम करतना मेल्ल्या भुरग्यांची चुलती स्वाती उमाजी भावले हिका कोणेतरी बरीच बडयली. हे विशीं सोयऱ्यांनी तिका विचारलें तेन्ना किशोर आनी तनुजाच्या मरणाची खबर कोणाक सांगची न्हय म्हणून शेजारच्या घरांत रावपी सखुबाई ज्योतिराम भावले हिणें दोन अनवळखी मनशांक म्हाका मारपाक धाडल्या, अशें तिणें कुटुंबाक सांगलें. आनी ते वेळार किशोर आनी तनुजाच्या मरणा फाटलें खरे कारण उजवाडाक आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
