भांगरभूंय | प्रतिनिधी
मदुराय, खबरां संस्था: तमिळनाडूंत एक अपूर्व राजकी कार्यावळ सध्या चर्चेचो विशय थारल्या. ‘नाम तमिळर कडची (एनटीके)’ ह्या प्रादेशिक पक्षान विरधनूर (मदुराय लागसार) आयोजीत ‘मेचाल निलम एंगल उरिमै’ (चरपाची जमीन, आमचो हक्क) हे कार्यावळींत शेकड्यांनी गायो, बैल, म्हशी आनी रेडे हे ‘प्रेक्षक’ म्हणून हाजीर आशिल्ले. ‘म्हज्या मोगाळ बैलांनो, गाय, म्हशी आनी रेड्यांनो,’ अशी हे सभेची घडये सुरवात जाल्या आसतली.
हे कार्यावळीचें खाशेलपण म्हणल्यार, राजकी फुडार्यांनी पयलेच फावट सरळ जनावरांक उद्देशून भाशणां केलें. पक्षाचे फुडारी सीमन हांणी ह्या वेळार वनविभागान चरपाच्या हक्काचेर घाल्ले बंदीचेर खर टिका केली.
राखण्यांच्या हक्का खातीर १५ मागण्यो
एनटीके पक्षान सभे वरवीं गुराखी समाजाच्या हक्का खातीर १५ मागण्यो मांडल्यो. त्यो अश्यो-
-चरपाच्यो जमनी वाटावपा खातीर स्वतंत्र कायदो तयार करचो.
-गांवांगांवांनी परंपरीक चरपाच्यो सुवातो (कुरणां) उक्त्यो करच्यो.
-रान खात्यान घाल्ले चरपाचे निर्बंध बेगोबेग काडून उडोवचे.
-गोठ्यां भोंवतणी आशिल्ल्या जमनींची राखण करची.
-गोरवां आनी बैलांच्या देशी जातींच्या संवर्धन आनी प्रजनना खातीर निधी उपलब्ध करून दिवचो.
-सेंद्रीय शेती आनी पशुपालना खातीर रिणाच्यो येवजण्यो सोप्यो करपाक जाय.
-गोरवां पोसपी समाजा खातीर वेगवेगळ्यो अर्थीक आनी समाजकल्याण येवजण्यो चालीक लावच्यो.
-गोरवां पोसपी भुरग्यांक फुकट शिक्षण आनी वसतीघरांची सुविधा दिवची.
-चरपी जमनीचेर अतिक्रमण करपी लोकांचेर खर कारवाय करची.
-पारंपारीक गोरवांचे मार्ग परतून उक्ते करचे.
-पशुवैजकी हॉस्पिटलांचो आंकडो वाडोवन सुसज्ज करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
