भांगरभूंय | प्रतिनिधी
प्रयागराज, खबरां संस्था: आग्रा रावपी सीमा आनी तिचो घोव रामनरेश सिंह म्हाकुंभांत संगमांत स्नान करपाक गेल्लीं. मात, सीमा आपल्या घोवा पसून कायमची पयस जाली. सोमारा तीं दोगांय संगमाचेर वांगडाच पावलीं. मात त्या दोगांय कडेन खूब सामान आशिल्ल्यान सीमा आनी रामनरेश हांणी एक- एक करून स्नान करपाचो विचार केलो. सीमान पयलीं आपल्या घोवाक स्नाना खातीर धाडलो. कपडे, मोबायल आनी हेर सामान घेवन घाटाच्या कांठार बसून ती रावली.
जेन्ना तिचो घोव एक वर जालें तरी संगमाच्यान परतूंक ना तेन्ना सीमा काळजी करपाक लागली. तिणें तिच्या घोवा विशीं लोकांक विचारपाक सुरवात केली. मजगतीं, कांय वेळा पयलीं एका मनशाक ऍम्बुलन्सींतल्यान हॉस्पिटलांत व्हेल्ल्याचें तिका सांगलें. उपरांत सीमा धांवत हॉस्पिटलांत गेली. थंय आपल्या घोवाची कडू पळोवन ती बेशुद्ध पडली.
सीमा संगमाचेर घोव येवपाची वाट पळयताली. ऍमबुलन्स तिच्या सामकी लागीं आयली. तातूंत तिच्या घोवाची कूड दवरिल्ली. मात सीमाक खबर नाशिल्लें एम्बुलन्सींत तिच्याच घोवाची कूड आसा म्हणून. तिका खात्री आशिल्ली, तिचो घोव संगमात स्नान करता म्हणून. तिच्या घोवाची कूड तिचे कुशीकच्यान गेली आनी तिका कळूंक लेगीत ना.
सैया पुलीस स्टेशन वाठारांतल्या आयला गांवांतलो रामनरेश सिंह (३५) पुण्यांत पेठा विकतालो. तो तिचे बायले सयत म्हाकुंभाक आयिल्लो. गांवांतल्या सुमार ६० लोक बस आरक्षीत करून प्रयागराजाक आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
