भांगरभूंय | प्रतिनिधी
चंडिगढ : समाजांत दुस्वासी लोक थोडे नात. तांच्या करण्यांक लागून दुसऱ्यांक खूब त्रास, मनस्ताप जातात. पूण करतलो कितें, मनशाचो सभाव तो. पिरायेच्या तिसऱ्या वर्सा काफीचे दोळे गेले. कारण तांच्या कुटुंबाचो दुस्वास करपी शेजाऱ्यांनी ताचेर अॅसीड मारलें. दिल्लींतल्या अ. भा. आयुर्विज्ञान केंद्रांत ताचेर उपचार जाले. पूण नदर परत आयली ना. पिरायेच्या आठव्या वर्सा २०१६ त तें शाळेंत वचपाक लागलें. आतां तें सीबीएससी बारावेचे परिक्षेंत दृश्टीहिनां मदीं ९५.६ टक्के घेवन पयलें आयलां. धावेचे परिक्षेंतूय तें ९५.२ टक्के घेवन पयलें आयिल्लें. १७ वर्सांच्या दिल्ली विद्यापीठांतल्यान पाॅलिटीकल सायन्साची पदवी घेवन मुखार आएएस अधिकारी जावपाचें आसा.
हे संस्थेचे १६ य भुरगे बारावेंत पास जाले, तर धावेचे १३ भुरगे पास जाले. बारावेंत सुमंत पोतदार ९४ टकके गुण घेवन दुसरो तर गुरुसरन सिंग ९३.६ टक्के घेवन तिसरो आयलो.
दृश्टीहिन संस्थेच्या ह्या भुरग्यांनी एनसीईआरटीचीं आॅडियो पुस्तकां, ब्रेल लिपींतलीं पुस्तकां आनी युट्यूबाचो अभ्यासा खातीर वापर केलो. काफीचे आवयबापूय पांचवी मेरेन शिकल्यात. बापूय दिसवड्याचेर चंडिगड सेक्रेटेरियटांत प्युन म्हूण काम करता. २०१८ त हें कुटुंब चलयेच्या शिक्षणा खातीर चंडिगढांत आयलीं. लेखी परिक्षा पास जातकच काफीक पिरायेच्या आठव्या वर्सा सवेंत प्रवेश दिलो. ताणें शाळेंत आनी घरा कडेन नेटान अभ्यास करून हें येस मेळयलां.
काफी हें बुधना – हिसार गांवांतलें. ताचेर तीन वर्सांचे आसतना दुस्वासी शेजाऱ्यांनी अॅसिड मारलें. ताचें तोंड आनी हात लासले. दोळे गेले. तो दीस २०११ त लो, होळयेचो. त्या गुन्यांवकारांक अजून ख्यास्त जावंक ना, अशे काफी सांगता. तरीय काफीन आत्मविस्वास वगडाय नासतना आॅडियो पुस्तकां वापरून मुळावें शिक्षण पुराय केलें. ताका थेट सवेंत प्रवेश मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
