भांगरभूंय | प्रतिनिधी
(ख्यास्त म्हण ताचे दोन सोरोप जप्त करून आमच्या सोरपाघरांत दवल्ले. ही घटना सगळ्यांच्या सामकारच घडली. ताका लागून मागीर आनीक कांयजाण कागाळ्यो घेवन येवपाक लागले…. आतां मुखार…)
एक फावट अशेंच कितें तरी विकपाक भायले तीगजाण आयिल्ले. तांणीं एकल्याचे पयशे चोरले. जाचे पयशे ना जाल्ले ताका ताणींच ते चोरल्यात म्हूण खातरी आसली; पूण ते तिगूय कबूल जायना आसले. मागीर सगळे म्हजे कडेन आयले. हांवें सगळ्यां पयलीं त्या तिगां मदल्या एकल्याक कुशीक व्हरून खरें कितें तें काडून घेवपाचो खूब येत्न केलो; पूण तो कसोच कांयच सांगना जालो. मागीर ताका सोडलो आनी हेर दोगांकय आपयलें. पयल्यान चोरिल्ले पयशे तुमकां खंय दवरपाक दिल्यात, असो थेट प्रस्न केलो. अनपेक्षीतपणान अशें विचारतकच तांकां दिसलें की पयलो कबूल जाला. म्हणटकच तांणीं रोखडेंच पयशे काडून दिले. एका ल्हानशा मांडणेन प्रस्न सुटलो.
एकदां एका पुलिसान एका गांवांतल्या बायलेचेर बळजबरी केली. हें कळटकच गांवांतल्या पांच- स तरणाट्यानीं ताका बरोच पेटलो, बांदूनय दवल्लो. ताणें रिव्हॉल्वर जोखलें, तर भुरग्यांनीं तेंय काडून घेतलें. मागीर तांच्या लक्षांत आयलें की अशें हत्यार काडून घेतलें म्हुणून हेर पुलिसांक कळ्ळें तर कितें जातलें? उपरांत ते रातचे म्हजे कडेन आयले. म्हाकाय खरें म्हणल्यार कांयच येवजना जालें. पूण हांवें तें रिव्हॉल्व्हर म्हजे कडेन दवल्लें. हे वटेन त्या पुलिसाक कळटकच ताका आनीक लज जाली.
“दोतोरसायबा कडेन कित्याक गेले? आमी आमच्या मदीं मिटोवपाक जातालें,” अशें तो म्हणपाक लागलो. मागीर ताका त्या भुरग्यांनीं सोडून दितकच तो ड्युटेर गेलो आनी ताणें रिव्हॉल्व्हर चोरयेक गेलें म्हूण सांगलें. ताणें आपणें केल्लो गुन्यांव मात कोणाक सांगलोना. पूण तरी खरो प्रकार सगळ्यांक कळ्ळोच. मागीर एक पुलीस अधिकारी तें पिस्तोल परत घेवन वचपाक म्हजे कडेन आयलो. त्या बायलेची कांयच कागाळ ना अशें परत परत सांगपाक लागलो. वंयेनच शेत खाल्यार ती बायल कागाळ करतली तरी कोणा कडेन ? आनी कागाळ करूनय केस चलतली, ख्यास्त जातली हाची खातरी कोण दितलो ?
हांवें त्या ऑफिसराक म्हणलें, “ हांव पिस्तोल परत दितां. पूण ज्या भुरग्यांनीं त्या पुलिसाक बडोवन ताचे पिस्तोल काडून घेतलें तांकां उपरांत तुमी कांयच त्रास करचे नात, अशें उतर दियात. कारण हे घडणुकेंत खरी चूक तांची नाच्च.” त्या अधिकाऱ्यान म्हणलें, “ हांव तुमकां उतर दितां. बरोवन दिवूं ?” म्हजो सभाव बरोवन घेवचे परस मनशाचेर विस्वास दवरपी. ताका लागून हांवें ताचे कडेन बरोवन बी घेतलेंना. पूण मागीर कितले तरी दीस त्या भुरग्यांक कितेंय त्रास जायत म्हण म्हाका हुस्को आसलो. पूण तांणीं आपलें उतर राखलें. त्या भुरग्यांक तांणीं हात लायलोना.
एकदां म्हजे कडेन एक वेगळीच केस आयली. एका गांवांतल्या तीन भावांची ही खबर. गांवांतलो एक मनीस ‘चेटूक, घाडीपण करता’ असो ह्या तिगांचो ताचेर दुबाव आसलो. ह्या चेटूक करपी मनशाक लागून आमचीं तीन भुरगीं मेलीं, अशें तांकां दिसतालें. सगळो कुड्डोविस्वास. एका मंत्रिकान सांगलें देखून तांणीं त्या मनशाक बुद्द शिकोवपाक बरोच बडयलो. पूण मागीर तेच ताका बैलांगाडयेंत घालून म्हजे कडेन उपचारा खातीर घेवन येताले. वाटेर तांच्या लक्षांत आयलें की तो मनीस मेलो. तांचो हेतू ताचो जीव घेवपाचो नासलो. पूण कोणाचो तरी मार ताच्या मरणाक कारण जाल्लो. हें सगळें जातकच ते म्हजे कडेन सल्लो मागूंक लागले. जें घडलें ताचो अर्थ स्पश्ट आसलो. हो सामको खुनाचो गुन्यांव आसलो. पूण तांच्या मदल्या कोणाच्या मारान तो मेलो हें सांगप कुस्तार आसलें. ते तिगुय भिल्ले, रडकुरे जाल्ले. आतां हें प्रकरण पुलिशेंत पावतलें आनी आपल्या फाटल्यान आपल्या कुटुंबाचे कितें जातलें, हो भंय तांकां दिसतालो. हांवें तांकां सुचयलें की तुमच्या मदल्या एकल्यान ह्या प्रकरणाची जापसालदारकी घेवची आनी बाकीच्यांनी ताच्या कुटुंबाची. तांकां तें पटलें. मागीर तांच्या मदल्या एका भावान ती जबाबदारी घेवन ख्यास्त भोगली. हेर दोगांनी ताचें कुटुंब सांबाळ्ळें. हांवें जें सुचयिल्लें ताका लागून केल्ल्या कृत्याची ख्यास्त तांकां भोगची पडलीच, पूण त्याच वेळार तीन कुटुंबां उगड्यार पडपा पासून वाचलीं.
(मुखार चलता)
प्रकाशवाटा (मूळ लेखक : डॉ. प्रकाश आमटे)
देविदास गजानन नायक
98505 35051
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
