भांगरभूंय | प्रतिनिधी
अलीराजपूर/ पणजी: मध्यप्रदेशांतल्या अलीराजपूर जिल्ह्यांत एका खांप्या गुन्यांवकाराक अटक करपा खातीर गेल्ल्या गोंय पुलिसांच्या पंगडाचेर बुरखा घाल्ल्या १५ ते २० सशस्त्र गुंडांनी हल्लो करपाची घडणूक घडली. ह्या भिरांकूळ हल्ल्यांत एक उपनिरीक्षक आनी हवालदार गंभीर जखमी जाल्यात. सध्या तांचेर थळाव्या हॉस्पिटलांत उपचार सुरू आसात. धारदार शस्त्रां आनी फातरांनी केल्ल्या ह्या हल्ल्याक लागून पुराय गोंय पुलीस दळांत बोवाळ निर्माण जाला. उपनिरीक्षक सीताराम मळीक आनी बाबलो परब हांच्या फुडारपणा खाला पर्वरी आनी म्हापशें पुलीस पंगड दुबाविता धरपाक गेल्लो.
चड म्हायती प्रमाण, म्हापशें आनी पर्वरी वाठारांत जाल्ल्या घरफोडी आनी चोरयेच्या प्रकरणांतलो मुखेल दुबावीत ‘हीरा’चो सोद घेवपाक गोंयचे पुलीस अलीराजपूर जिल्ह्यांतल्या बोरी पुलीस स्टेशनाचे हद्दींत पाविल्ले. थळाव्या पुलिसांचे मजतीन कागदपत्रां पुराय करून आनी आरोपीची फाटभूंय जाणून घेतना, बिरेस्तारा सांजेवेळार ही धक्को दिवपी घडणूक घडली. पुलीस बोरी गांवांत अधिकृत कारवाय पुराय करून परततना, वाटेर पयलींच लिपून बशिल्ले गुन्यांवकारांचे टोळयेन पुलिसांचे गाडयेक लक्ष्य केलें.
गाडी पुलीस स्टेशना पसून कांय अंतराचेर पावतकच १५ ते २० मोटारसायकलीं वेल्यान तोंड बांदून आयिल्ल्या गुंडांनी पुलिसांची गाडी आडायली. आनी अचकीत गुंडें मारून हल्लो केलो. उपरांत त्या गुंडांनी धारेच्या शस्त्रांनी गाडयेचे हारशे फोडले आनी पुलीस कर्मचार्यांचेर वार केलो. हो हल्लो इतलो अचकीत आनी नियोजीत आशिल्लो, पुलीस पंगडाक स्वसंरक्षणाची संदूच मेळूंक ना. ह्या हल्ल्यांत उपनिरीक्षक आनी एक पुलीस रक्तांत माखले. युपी, बिहारांत जातात, तसो सिनेमा स्टायलींत जाल्लो हो हल्लो आशिल्लो.
हे घडणुकेची म्हायती मेळटांच अलीराजपूरचे पुलीस अधीक्षक रघुवंश सिंह भदौरिया हांणी बेगोबेग जोबट गांवांत धांव घेतली आनी जखमी पुलिसांच्या सुरक्षेची आनी उपचारांची वेवस्था केली. हल्ल्या उपरांत सगले आरोपी दुचाकींवेल्यान रानाचे आनी गांवगिर्या वाठाराचे दिकेन पळून गेले. हो हल्लो दुबावीत आरोपी ‘हीरा’ हांच्याच साथीदारांनी पुलिसांक धमकावपा खातीर आनी आरोपीक सोडपा खातीर केल्लो असो अदमास आसा. मध्यप्रदेश पुलिसांनी हल्लेखोरांचो सोद घेवपा खातीर विवीध जाग्यांचेर पंगड धाडल्यात. गुन्यांवकारांनी सरळ परराज्यांतल्या पुलिसांच्या पंगडाचेर हल्लो केल्ल्यान मध्यप्रदेशांतलो इबाडिल्लो कायदो आनी सुवेवस्थेचो प्रस्न परत एक फावटीं धड्यार आयला.
गोंयच्या वरीश्ठ पुलीस अधिकार्यांनीय हे घडणुकेची फाटपुरवण सुरू केल्या. ह्या हल्ल्याक लागून पुलिसांच्या तापसाचेर तात्पुरतो परिणाम जरी जाला तरी दुबाविताक अटक करपा खातीर परत व्हड बळा सयत कारवाय करपाचें तांणी थारायलां. अलीराजपूर जिल्लो आनी आशिकुशीकच्या वाठारांत नाकाबंदी केल्या. सध्या हल्लेकारांक धरपाची मोहीम झुजां पांवड्यार चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
