भांगरभूंय | प्रतिनिधी
गाडी भायर काडटना टांकयेंत फावो तितलें पॅत्राॅल ना जाल्यार कितलो त्रास, धांवपळ जाता? पयलीं पॅत्राॅल पंपाचेर वच… थंय रांकेंत राव… आनी इंधन भरून फुडल्या प्रवासाक लाग. पॅत्राॅल उणें आसलें आनी पंप पयस आसलो जाल्यारुय आमकां हुस्को जाता. इंधन भरपाक विसरले आनी अचकीत गाडी रस्त्यार थांबली जाल्यार कितें करचें तें कांयच समजना. त्या वेळार पॅत्राॅल पंप तुमच्या गाडये कडेन आयलो जाल्यार!… हय, हें एक वास्तव. प्रत्यक्षांत तें घडलां. ड्रायव्हरांचो हुस्को मिटोवपा खातीर 2018 वर्सा दुबयंत इंधन वितरणाची एक आगळीच संकल्पना अस्तित्वांत आयली. आतां पांच वर्सांत ती खूब लोकप्रिय जाल्या. ही संकल्पना आतां भारतांतय मुळां धरपाक लागल्या.
जशें- जशें तंत्रगिन्यानाची विकसीत जाता तशी- तशी वेपाराची संकल्पनाय बदलत वतात. तंत्रगिन्यानाचो वापर करून चड गिरायक- प्रधान सेवा दिवपाचो वेपाऱ्यांचो यत्न आसता. देखूनच चडशा वेवसायिकांनी घरगुती वितरण सेवा दिवपाचें धोरण आपणायलां. हातूंत जेवणाची ऑर्डर दिवपा सावन व्हड मशीनां लेगीत ऑनलायन ऑर्डर दिले उपरांत घरांत पावयतात. दुबयच्या वेपाऱ्यांनी हें तंत्र वापरून एक पावल मुखार घालां. पॅत्राॅल, डिझेल, इंजिन आॅयल आनी वाहनांचे भाग, बॅटरी हांची घरगुती वितरणाची सेवा हांगा 2018 वर्सा सुरू जाल्या. फकत पांच वर्सांत हे सेवेक व्हड यश मेळ्ळां. हातूंत ड्रायव्हराक पॅत्राॅल पंपा कडेन वचपाची गरज ना. पॅत्राॅल पंप गाडये कडेन येता.
हांगाचे ड्रायव्हर मोबायल अॅप डावनलोड करून इंधनाची ऑर्डर दितात. गाडी खंयूय आसूं, एकदां थळ धाडले उपरांत कंपनीचो मोबायल पॅत्राॅल पंप मिनटां भितर थंय पावता आनी गाडयेंत पॅत्राॅल भरता. 108 सेवे सारकी ही सेवा. थंय अॅम्ब्युलन्स येता, हांगां पॅत्राॅलाची गाडी. वाहन क्रमांक, कितलें पॅत्राॅल भरपाचें आनी गाडयेचें ठिकाण भरून संदेश धाडलो, ऑनलायन फारीकणी केली काय पुरो.
ड्रायव्हर घरांत आसलो जाल्यार पसून डिलिव्हरी गाडी येवन पॅत्राॅल भरून मोबायलाचेर पावती दिवन भायर सरता. ड्रायव्हराक फकत टांकयेचें लॉक उक्तें दवरपाची गरज आसता. ही प्रक्रिया इतली पारदर्शक आसा की कोणाकूच फटोवंक मेळना. थंयच्या सरकाराचें ताचेर पुराय नियंत्रण आसा. हाका लागून वाहन चालकांक पॅत्राॅल पंप सोदपाक रांकेंत बसपाचो वा उबे रावपाचो त्रास ना जाला.
हो प्रयोग आतां भारतांत बेंगळुरू आनी हेर कांय व्हड शारांनीय सुरू जाला. पूण, अजून तो पुरायपणान यशस्वी जावंक ना. कारण भारत हो खंडीय देश. ही सेवा सामकी पयसुल्ल्या वाठारांनी पावोवपाक वेवसायीक कितले यशस्वी जातले तें फुडाराक पळोवचें पडटलें. पूण, अशी सुविधा सगळे कडेन सुरू केल्यार हांगाच्या वाहन चालकांक ताचो फायदो जातलो, हें मात निश्चीत.
संतोष गरुड
96371 96820
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
