भांगरभूंय | प्रतिनिधी
इटली, खबरां संस्था: इटलींत १३ जून सावन जी ७ शिखर परिशदेक सुरवात जाल्या. १५ जून मेरेन चलपी हे परिशदेंत वांटो घेवपा खातीर प्रधानमंत्री नरेंद्र मोदी हांचे सयत अमेरिकेचे राष्ट्राध्यक्ष जो बिडेन, फ्रान्सचे राष्ट्राध्यक्ष इमॅन्युएल मॅक्रॉन, ब्रिटनाचे प्रधानमंत्री ऋषी सुनक, जपानचे प्रधानमंत्री फुमियो किशिदा, कॅनडाचे प्रधानमंत्री जस्टिन ट्रूडो आनी जर्मनीचे चांसलर ओलाफ स्कोल्झ पावल्यात. इटलीच्या अपुलिया वाठारांतल्या बोर्गो एग्नाझिया ह्या रिसॉर्टांत हें संमेलन जाता. हे परिशदेंत वांटेकार जावपाक आयिल्ल्या कांय परदेशी फुडाऱ्यांक इटलीची प्रधानमंत्री जाॅर्जिया मेलोनी हांणी ‘नमस्ते’ म्हणून येवकार दिलो.
आगळे वेगळे तरेन येवकार
प्रधानमंत्री जॉर्जिया मेलोनी हांणी कांय सोयर्यांक भारतीय पद्दतीन नमस्कार करून येवकार दिलो. तांणी जर्मनीचे कुलगुरू ओलाफ स्कोल्झ आनी युरोपियन कमिशनाची अध्यक्ष उर्सुला वॉन डर लेयन हांकां परबीं भेटयलीं. नमस्कार करून येवकार दिवपाचो व्हिडियो भारतांत सोशल मिडियाचेर व्हायरल जावपाक लागला. हजारांनी भारतीयांनी इटलीची प्रधानमंत्री मेलोनी हांची भारतीय संस्कृती प्रमाण नमस्कार केल्ले खातीर तुस्त केल्या. मात कांय फुडाऱ्यांक तिणें शेकहॅण्ड करून, वेंग मारून, पोल्याक पोलो लावन येवकार दिलो.
भारत हो सोयरो देश
प्रधानमंत्री नरेंद्र मोदी हे परिशदेक गेल्यात. तिसरे खेपे प्रधानमंत्री जाले उपरांत मोदीची ही पयली परदेश भोंवडी. खरें म्हणल्यार भारत जी ७ परिशदेंत सोयरो देश म्हूण वांटो घेता. जी-७ शिखर सभेंत भारताक वांटो घेवपाची ही ११ वी खेप. हे परिशदेंत मोदी जायत्या विशयांचेर उलयतले. ते जी- ७ परिशदेंत भारता सयत आशियेचेय मुद्दे मांडटले. जी-७ त अमेरिका, ब्रिटेन, फ्रान्स, इटली, जर्मनी, कॅनडा आनी जपानाचो आसपाव आसा. अंदूं इटली जी- ७ चें अध्यक्षपद सांबाळटा.
सध्या संवसारांत दोन झुजां चालू आसात. तशेंच चीन आनी अमेरिकेंत सर्त वाडल्या. देखून परिशदेंत जायत्या संवसारीक प्रस्नांचेर चर्चा जाता. चीन, युक्रेन, इस्रायल, हमास हांचे विशीं चर्चा जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
