भांगरभूंय | प्रतिनिधी
सुभाष शिरोडकारः सांखळे राष्ट्रीय सहकार सप्तक उमेदीन
भांगरभूंय । प्रतिनिधी
दिवचलः फकत रीण दिवप आनी कळंतर घेवप इतले पुरतेच मर्यादीत रावचें न्हय. फुडारांत सगळ्या संस्थांनी भोवउद्देशी आनी भोवआयामी जावपाक जाय. फुडल्या वर्साचे अखेर मेरेन गोंयांत आनीक 200 नव्यो संस्था निर्माण करपाक जाय, अशें सहकार मंत्री सुभाष शिरोडकार हांणी सांगलें.
थ्रीफ्ट सहकारी संघटणा आनी उत्तर गोंयांतल्या आठ आघाडेच्या पतसंस्थांच्या जोडपालवान सांखळेच्या रवींद्र भवनांत राष्ट्रीय सहकार सप्तक आयोजीत केल्लें. त्या वेळार मंत्री शिरोडकार उलयताले. तांचे वांगडा माचयेर गोंय राज्य सहकारी बँकेचे अध्यक्ष उल्हास फळदेसाय, थ्रीफ्ट सहकारी संघटणेचे अध्यक्ष पांडुरंग कुट्टीकार, सहकारी पतसंस्था रजिस्ट्रार अधिकारी विशांत गावणेंकार आनी आठूय पतसंस्थांचे अध्यक्ष हाजीर आशिल्ले.
संस्था जर गिरेस्त करपाची आसत जाल्यार सरकारी येवजण्यांचो योग्य उपेग करून मजत करप, हें फक्त सहकारानूच शक्य आसा, अशें उल्हास फळदेसाय हांणी सांगलें.
एकनाथ कवठणकार हांणीय मार्गदर्शन केलें. तशेंच हाजीर आशिल्ल्या आठूय पतसंस्थांच्या अध्यक्षांनी आपले विचार मांडले.
ह्या वेळार उल्लेख करपा सारकी कामगिरी केल्ल्या पतसंस्थांच्या अध्यक्षांचो भोवमान केलो. तशेंच गरजेवंत विद्यार्थ्यांक मंत्र्या हस्तुकीं चॅक भेटयले. पांडुरंग कुट्टीकार हांणी येवकार दिलो. प्रिया तांगसाळी हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
