आनीक कागदपत्रां सादर केल्ल्यान तिरूमलाच्या अहवालाक कळाव

भांगरभूंय | प्रतिनिधी

पणजी : तिरूमला तिरूपती सहकारी क्रेडीट सोसायटीन सहकार निबंधक कार्यालयाक सोसायटी विशीं आनीक कागदपत्रां सादर केल्या. ह्या कागदपत्रांची तपासणी सुरू आसा. नव्यान कागदपत्रां सादर केल्ल्यान सरकाराक अहवाल दिवपाक सहकार निबंधकांक कळाव जातलो.

तिरूमला तिरूपती क्रेडीट सोसायटीन सादर केल्या कागदपत्रांची तपासणी करून खात्याक अहवाल सादर करपाक सरकारान सांगला. हे प्रमाण अहवाल तयार करपाचो वावर सहकार निबंधक कार्यालया कडल्यान सुरू आसा, अशी म्हायती सहकार निबंधक आशुतोश आपटे हांणी दिली.

नोटिसो जारी करून लेगीत ऑडीट अहवाल आनी गरजेची ती कागदपत्रांं सादर करूंक नाशिल्ले कारणान सहकार निबंधकांंनी तिरूमला तिरूपती मल्टीस्टेट सहकारी क्रेडीट सोसायटीची एनओसी रद्द करपाचो आदेश जारी केल्लो. हाका लागून सोसायटीक गोंंयांंत 13 शाखा सुरू करपाक दिल्ली मान्यताय रद्द जाली. हाका लागून गोंंयच्या गुंंतवणूकदारांं मदीं भिरांंत निर्माण जाली. हाचे उपरांंत सोसायटीच्या संंचालक मंंडळान मुख्यमंंत्री डॉ. प्रमोद सावंंत हांंची भेट घेतली.

ऑडीट अहवाल तशेंच सहकार निबंधकांनी मागिल्लीं कागदपत्रां बेगिनात बेगीन सादर करपाचे निर्देश मुख्यमंत्री डॉ. प्रमोद सावंत हांणी तिरूमला तिरूपती सोसायटीच्या संचालक/प्रतिनिधी मंडळाक भेटी वेळार दिले. हाचे उपरांत प्रतिनिधी मंडळान सहकार मंत्री सुभाष शिरोडकार हांची लेगीत भेट घेतली. ऑडीट अहवाल आनी कागदपत्रांची पळोवणी केल्या उपरांत फुडलो निर्णय जातलो. हाचे उपरांंत सोसायटीचे गोंंयचे प्रतिनिधी, संंचालक तशेच अधिकाऱ्यांंनी सहकार निबंंधकांंची भेट घेवन कागदपत्रांं सादर केल्या. ताणी पत्र बरोवन माफी मागली.

तिरूमला तिरूपती सोसायटीक गोंयांत 13 जाग्यांचेर फांटे सुरू करपा खातीर दिल्ली एनओसी रद्द करपाचो आदेश फाटले मंगळारा जारी जालो. ह्या आदेशा उपरांत राज्यांतल्या सहकार वाठारांत खवदळ निर्माण जाली. तिरूमला तिरूपती सोसायटीक 2023, 2024 आनी 2025 वर्सा नोटिसो जारी केल्यो. हे नोटिशीक तांणी कसलोच प्रतिसाद दिलो ना. हाका लागून एनओसी रद्द करपाची कारवाय जाली.